Mahabharata · Chapter 13.269

nābhāgadheyaḥ prāpnoti dhanaṃ subalavānapi /
bhāgadheyānvitastvarthānkṛśo bālaśca vindati //

nālābhakāle labhate prayatne'pi kṛte sati /
lābhakāle'prayatnena labhate vipulaṃ dhanam //

kṛtayatnāphalāścaiva dṛśyante śataśo narāḥ /
ayatnenaidhamānāśca dṛśyante bahavo janāḥ //

yadi yatno bhavenmartyaḥ sa sarvaṃ phalamāpnuyāt /
nālabhyaṃ copalabhyeta nṛṇāṃ bharatasattama //

prayatnaṃ kṛtavantopi dṛśyante hyaphalā narāḥ /
mārgatyāgaśatairarthānamārgaścāparaḥ sukhī //

akāryamasakṛtkṛtvā dṛśyante hyadhanā narāḥ /
dhanayuktāḥ svakarmasthā dṛśyante cāpare'dhanāḥ //

adhītya nītiśāstrāṇi nītiyukto na dṛśyate /
anabhijñaśca sācivyaṃ gamitaḥ kena hetunā //

vidyāyukto hyavidyaśca dhanavāndurmatistathā /
yadi vidyāmupāśritya naraḥ sukhamavāpnuyāt //

na vidvānvidyayā hīnaṃ vṛttyarthamupasaṃśrayet /
yathā pipāsāṃ jayati puruṣaḥ prāpya vai jalam //

iṣṭārtho vidyayā hyeva na vidyāṃ prajahennaraḥ //

nāprāptakālo mriyate viddhaḥ śaraśatairapi /
tṛṇāgreṇāpi saṃspṛṣṭaḥ prāptakālo na jīvati //
bhīṣma uvāca /

īhamānaḥ samārambhānyadi nāsādayeddhanam /
ugraṃ tapaḥ samārohenna hyanuptaṃ prarohati //

dānena bhogī bhavati medhāvī vṛddhasevayā /
ahiṃsayā ca dīrghāyuriti prāhurmanīṣiṇaḥ //

tasmāddadyānna yāceta pūjayeddhārmikānapi /
subhāṣī priyakṛcchāntaḥ sarvasatvāvihiṃsakaḥ //

yadā pramāṇaṃ prasavaḥ svabhāvaśca sukhāsukhe /
daṃśakīṭapipīlānāṃ sthiro bhava yudhiṣṭhira //