Mahabharata · Chapter 13.267

ityuktavati tadvākyaṃ kṛṣṇe devakinandane /
bhīṣmaṃ śāntanavaṃ bhūyaḥ paryapṛcchadyudhiṣṭhiraḥ //

nirṇaye vā mahābuddhe sarvadharmavidāṃvara /
pratyakṣamāgamo veti kiṃ tayoḥ kāraṇaṃ bhavet //
bhīṣma uvāca /

nāstyatri saṃśayaḥ kaściditi me vartate matiḥ /
śṛṇu vakṣyāmi te prājña samyaktvaṃ me'nupṛcchasi //

saṃśayaḥ sugamastatra durgamastasya nirṇayaḥ /
dṛṣṭaṃ śrutamanantaṃ hi yatra saṃśayadarśan //

pratyakṣaṃ kāraṇaṃ dṛṣṭaṃ haitukaṃ prājñamāninaḥ /
nāstītyevaṃ vyavasyanti satyamāgamameva vā //

tadayuktaṃ vyavasyanti bālāḥ paṇḍitamāninaḥ /
atha sañcintyamevaikaṃ kāraṇaṃ kiṃ bhavediti //

śakyaṃ dīrgheṇa kālena yuktenāmantritena ca /
prāṇayātrāmanekāṃ ca kalpayānena bhārata //

tatpareṇaiva nānyena śakyate tattu kāraṇam /
hetūnāmantamāsādya vipulaṃ jñānamuttamam //

jyotiḥ sarvasya lokasya vipulaṃ pratipadyate / na tveva gamanaṃ rājanhetuto gamanaṃ tathā /
agrāhyamanibaddhaṃ ca vācā samparivarjayet //
yudhiṣṭhira uvāca /

pratyikṣaṃ lokataḥ siddhirlokaścāgamapūrvakaḥ /
śiṣṭācāro bahuvidhastanme brūhi pitāmahaḥ //
bhīṣma uvāca /

dharmasya hriyamāṇasya balavadbhirdurātmabhiḥ /
saṃsthā yatnairapi kṛtā kālena pratibhidyate //

adharmo dharmarūpeṇa tṛṇaiḥ kūpa ivāvṛtaḥ /
tatastairbhidyate vṛttaṃ śṛṇu caiva yudhiṣṭhira //

avṛttyā ye tu nindani śrutatyāgaparāyaṇāḥ /
dharmavidveṣiṇo mandā ityuktasteṣu saṃśayaḥ //

atṛpyantastu sādhūnāṃ yāvadāgamabuddhayaḥ /
paramityeva santuṣṭāstānupāssva ca pṛccha ca //

kāmārthau pṛṣṭhataḥ kṛtvā lobhamohānusāriṇau /
dharma ityeva sambuddhastānupāssva ca pṛccha ca //

na teṣāṃ bhidyate vṛttaṃ yajñāḥ svādhyāyakarma ca /
ācāraḥ kāraṇaṃ caiva dharmaścaikastrayaṃ punaḥ //
yudhiṣṭhira uvāca /

punareva hi me buddhi saṃśaye parimuhyati /
aparo majjamānasya paraṃ tīramapaśyataḥ //

vedaḥ pratyakṣamācāraḥ pramāṇaṃ tattrayaṃ yadi /
pṛthaktvaṃ labhyate caiṣāṃ dharmaścaitattrayaṃ katham //
bhīṣma uvāca /

dharmasya hriyamāṇasya balavadbhirdurātmabhiḥ /
yadyevaṃ manyase rājaṃstridhā dharmavicāraṇā //

eka eveti jānīhi tridhā dharmasya darśanam /
pṛthaktve ca na me buddhistrayāṇāmapi vai tathā //

[ukto mārgastrayāṇāṃ ca tattathaiva samācara /
jijñāsā na tu kartavyā dharmasya paritarkaṇāt //

sadaiva bharataśreṣṭha mā te bhūdatra saṃśayaḥ /
andho jaḍa ivāśaṅkī yadbravīmi tadācara //

ahiṃsā satyamakrodho dānametaccatuṣṭayam / ajātaśatro sevasya dharma eṣa sanātanaḥ // ]

brāhmaṇeṣu ca vṛttiryā pitṛpaitāmahocitā /
tāmanvehi mahābāho dharmasyaite hi deśikāḥ //

pramāṇamapramāṇaṃ vai yaḥ kuryādabudho janaḥ /
na sa pramāṇatāmarho viṣādajanano hi saḥ //

brāhmaṇāneva sevasva satkṛtya bahumānya ca /
eteṣveva tvime lokāḥ kṛtsnā iti nibodha tān //