Mahabharata · Chapter 13.266

yudhiṣṭhira mahābāho mahābhāgyaṃ mahātmanaḥ /
rudrāya bahurūpāya bahunāmne nibodha me //

vadantyugraṃ mahādevaṃ tathā sthāṇuṃ maheśvaram /
ekākṣaṃ tryambakaṃ caiva viśvarūpaṃ śivaṃ tathā //

dve tanū tasya devasya vedajñā brāhmaṇā viduḥ /
ghorāmanyāṃ śivāmanyāṃ te tanū bahudhā punaḥ //

ugrā ghorā tanuryā'sya so'gnirvidyutsa bhāskaraḥ /
śivā saumyā ca yā tvasya dharmastvāpotha candramāḥ //

ātmano'rdhaṃ tu tasyāgniḥ somo'rdhaṃ punarucyate /
brahmacaryaṃ caratyekā śivā cāsya tanustathā //

yā'sya ghoratamā mūrtirjagatsaṃharate tathā /
īśvaratvānmahattvācca maheśvara iti smṛtaḥ //

yannirdahati yattīkṣṇo yadugro yatpratāpavān /
māṃsaśoṇitamajjādo yattato rudra ucyate //

devānāṃ sumahānyacca yaccāsya viṣayo mahān /
yacca viśvaṃ jagatpāti mahādevastataḥ smṛtaḥ //

dhūmrarūpā jaṭā yasmāddhūrjaṭītyata ucyate //

sa medhayati yannityaṃ sarvānvai sarvakarmabhiḥ /
śivamicchanmanuṣyāṇāṃ tasmādeṣa śivaḥ smṛtaḥ //

dahatyūdhvaṃ sthito yacca prāṇānnṝṇāṃ sthiraśca yat /
sthiraliṅgaśca yannityaṃ tasmātsthāṇuriti smṛtaḥ //

yadasya bahudhā rūpaṃ bhūtaṃ bhavyaṃ bhavattathā /
sthāvaraṃ jaṅgamaṃ caiva bahurūpastataḥ smṛtaḥ //

viśvedevāśca yattasminviśvarūpastataḥ smṛtaḥ / sahasrākṣo'yutākṣo vā sarvatokṣimayopi vā /
cakṣuṣaḥ prabhavaṃ tejaḥ sarvataścakṣureva tat //

sarvathā yatpaśūnpāti taiśca yadramate saha /
teṣāmadhipatiryacca tasmātpaśupatiḥ smṛtaḥ //

nityena brahmacaryeṇa liṅgamasya yadā sthitam / bhaktānugrahaṇārthāya gūḍhaliṅgastataḥ smṛtaḥ /
mahayatyasya lokaśca priyaṃ hyetanmahātmanaḥ //

vigrahaṃ pūjayedyo vai liṅgaṃ vā'pi mahātmanaḥ /
liṅgaṃ pūjayitā nityaṃ mahatīṃ śriyamaśnute //

ṛṣayaścāpi devāśca gandharvāpsarasastathā / liṅgamevārcayanti sma yattadūrdhvaṃ samāsthitam /

pūjyamāne tatastasminmodate sa maheśvaraḥ /
sukhaṃ dadāti prītātmā bhaktānāṃ bhaktavatsalaḥ //

eṣa eva śmaśāneṣu devo vasati nirdahan /
yajante ye janāstatra vīrasthānaniṣeviṇaḥ //

viṣamasthaḥ śarīreṣu sa mṛtyuḥ prāṇināmiha /
sa ca vāyuḥ śarīreṣu prāṇapālaḥ śarīriṇām //

tasya ghorāṇi rūpāṇi dīptāni ca bahuni ca /
loke yānyasya pūjyante viprāstāni vidurbudhāḥ //

nāmadheyāni deveṣu bahūnyasya yathārthavat /
nirucyante mahattvācca vibhutvātkarmabhistathā //

vede cāsya vidurviprāḥ śatarudrīyamuttamam /
vyāsenoktaṃ ca yaccāpi upasthānaṃ mahātmanaḥ //

pradātā sarvalokānāṃ viśvasākṣī nirāmayaḥ /
jyeṣṭhabhūtaṃ vadantyenaṃ brāhmaṇā ṛṣayo'pare //

prathamo hyeṣa devānāṃ mukhādagnimajījanat /
grahairbahuvidhaiḥ prāṇānsaṃruddhānutsṛjatyapi //

vimokṣayati tuṣṭātmā śaraṇyaḥ śaraṇāgatān /
āyurārogyamaiśvaryaṃ hitaṃ kāmāṃśca puṣkalān //

sa dadāti manuṣyebhyaḥ sa evākṣipate punaḥ /
śakrādiṣu ca deveṣu tasya caiśvaryamucyate //

sa eva sthāpako nityaṃ trailokyasya śubhāśubhe /
aiśvaryāccaiva kāmānāmīśvaraḥ punarucyate //

maheśvaraśca lokānāṃ mahātāmīśvaraśca saḥ / bahubhirvividhai rūpairviśvaṃ vyāptamidaṃ jagat /
tasya devasya yadvaktraṃ samudre vaḍaṃvāmukhaṇ //