Mahabharata · Chapter 13.256

ke pūjyāḥ ke namaskāryā kathaṃ varteta keṣu ca /
kimācāraḥ kīdṛśeṣu pitāmaha na riṣyate //
bhīṣma uvāca /

brāhmaṇānāṃ paribhavaḥ sādayedapi devatāḥ /
brāhmaṇāṃstu namaskṛtya yudhiṣṭhira na riṣyate //

te pūjyāste namaskāryā vartethāsteṣu putravat /
te hi lokānimānsarvāndhārayanti manīṣiṇaḥ //

brāhmaṇāḥ sarvalokānāṃ mahānto dharmasetavaḥ //
dhanatyāgābhirāmāsci vāksaṅgamadhurāśca ye //

ramaṇīyāśca bhūtānāṃ niyamena dhṛtavratāḥ /
praṇetāraśca kośānāṃ śāstrāṇāṃ ca yaśasvinaḥ //

tapo yeṣāṃ dhanaṃ nityaṃ vākcaiva vipulaṃ balam /
prasavāścaiva dharmāṇāṃ dharmajñāḥ sūkṣmadarśinaḥ //

dharmakāmāḥ sthitā dharme sukṛtairdharmasevataḥ /
yānsamāśritya tiṣṭhanti prajāḥ sarvāścaturvidhāḥ //

panthānaḥ sarvanetāro yajñavāhāḥ sanātanāḥ /
pitṛpaitāmahīṃ gurvīmudvahanti dhuraṃ sadā //

dhuri ye nāvasīdanti viṣame saddhayā iva /
pitṛdevātithimukhā havyakavyāgrabhojinaḥ //

bhojanādeva lokāṃstrīṃstrāyante mahato bhayāt /
dīpaḥ sarvasya lokasya cakṣuścakṣuṣmatāmapi //

sarvaśilpādinidhayo nipuṇāḥ sūkṣmadarśinaḥ /
gatijñāḥ sarvabhūtānāmadhyātmagaticintakāḥ //

ādimadhyāvasānānāṃ jñātāraśchinnasaṃśayāḥ /
parāvaraviśeṣajñā gantāraḥ paramāṃ gatim //

vimuktā dhūtapāpmāno nirdvandvā niṣparigrahāḥ /
mānārhā mānitā nityaṃ jñānavidbhirmahātmabhiḥ //

candane malapaṅke ca bhojane'bhojane samāḥ /
samaṃ yeṣāṃ dukūlaṃ ca śāṇakṣaumājināni ca //

tiṣṭheyurapyabhuñjānā bahūni divasānyapi /
śoṣayeyuśca gātrāṇi svādhyāyaiḥ saṃyatendriyāḥ //

adaivaṃ daivataṃ kuryurdaivataṃ cāpyadaivatam /
lokānanyānsṛjeyuste lokapālāṃśca kopitāḥ //

apeyaḥ sāgaro yeṣāmapi sāpānmahātmanām /
yeṣāṃ kopāgniradyāpi daṇḍake nopaśāmyati //

devānāmapi ye devāḥ kāraṇaṃ kāraṇasya ca /
pramāmasya pramāṇaṃ ca tasmānnābhibhavedbudhaḥ //

teṣāṃ vṛddhāśca bālāśca sarve sanmārgadarśinaḥ /
tapovidyāviśeṣāttu mānayanti parasparam //

avidvānbrāhmaṇo devaḥ pātraṃ vai pāvanaṃ mahat /
vidvānbhūyastaro devaḥ pūrṇasāgarasannibhaḥ //

avidvāṃścaiva vidvāṃśca brāhmaṇo daivataṃ mahat /
praṇītaścāpraṇītaśca yathā'gnirdaivataṃ mahat //

śmaśāne hyapi tejasvī pāvako naiva duṣyati /
haviryajñe ca vidhivadbhūya evābhiśobhate //

evaṃ yadyapyaniṣṭeṣu vartate sarvakarmasu /
sarvathā brāhmaṇo mānyo daivataṃ viddhi tatparam //