Mahabharata · Chapter 13.255

pitāmaha mahāprājña sarvaśāstraviśārada /
kiṃ japyaṃ japato nityaṃ bhaveddharmaphalaṃ mahat //

prasthāne vā praveśe vā pravṛtte vā'pi karmaṇi /
daive vā śrāddhakāle vā kiṃ japyaṃ karmasādhanam //

śāntikaṃ pauṣṭikaṃ rakṣā śatrughnaṃ bhayanāśanam /
japyaṃ yadbrahma samitaṃ tadbhavānvaktumarhati //
bhīṣma uvāca /

vyāsaproktamimaṃ mantraṃ śṛṇuṣvaikamanā nṛpa /
sāvitryā vihitaṃ divyaṃ sadyaḥ pāvavimocanam //

śṛṇu mantravidhiṃ kṛtsnaṃ procyamānaṃ mayā'nagha /
yaṃ śrutvā pāṇḍavaśreṣṭha sarvapāpaiḥ pramucyate //

rātrāvahani dharmajña japanpāpairna lipyate /
tatte'haṃ sampravakṣyāmi śṛṇuṣvaikamanā nṛpa //

āyuṣmānbhavate caiva yaṃ śrutvā pārthivātmaja /
puruṣastu susiddhārthaḥ pretya ceha ca modate //

sevitaṃ satataṃ rājanpurā rājarṣisattamaiḥ /
kṣatradharmapairarnityaṃ satyavrataparāyaṇaiḥ //

idamāhnikamavyagraṃ kurvadbhirniyataiḥ sadā /
nṛpairbharataśārdūla prāpyate śrīranuttamā //

namo vasiṣṭhāya mahāvratāya parāśaraṃ vedanidhaiṃ namaste /
namostvanantāya mahoragāya namostu siddhebhya ihākṣayebhyaḥ //

namostvṛṣibhyaḥ paramaṃ pareṣāṃ deveṣu devaṃ varadaṃ varāṇām /
sahasraśīrṣāya namaḥ śivāya sahasranāmāya janārdanāya //

ajaikapādahirbudhnyaḥ pinākī cāparājitaḥ /
ṛtaśca pitṛrūpaśca tryambakaśca maheśvaraḥ //

vṛṣākapiśca śambhuśca havano'theśvarastathā /
ekādaśaite prathitā rudrāstribhuvaneśvarāḥ //

śatametatsamāmnātaṃ śatarudre mahātmanām //

aṃśo bhagaśca mitraśca varuṇaśca jaleśvaraḥ /
tathā dhātā'ryamā caiva jayanto bhāskarastathā //

tvaṣṭā pūṣā tathaivendro dvādaśo viṣṇurucyate /
ityete dvādaśādityāḥ kāśyapeyā iti śrutiḥ //

dharo dhruvaśca somaśca sāvitro'thānilo'nalaḥ /
pratyūṣaśca prabhāsaśca vasavoṣṭau prakīrtitāḥ //

nāsatyaścāpi dasraśca smṛtau dvāvaśvināvapi /
mārtaṇḍasyātmajāvetau sañjñānāsāvinirgatau //

ataḥ paraṃ pravakṣyāmi lokānāṃ karmasākṣiṇaḥ /
api yajñasya vettāro dattasya sukṛtasya ca //

adṛśyāḥ sarvabhūteṣu paśyanti tridaśeśvarāḥ /

śubhāśubhāni karmāṇi mṛtyuḥ kālaśca sarvaśaḥ //

viśvedevāḥ pitṛgaṇā mūrtimantastapodhanāḥ / munayaścaiva siddhāśca tapomokṣaparāyaṇāḥ /
śucismitāḥ kīrtayatāṃ prayacchanti śubhaṃ nṛṇām //

prajāpatikṛtānetānlokāndivyena tejasā /
vasanti sarvalokeṣu prayatāḥ sarvakarmasu //

prāṇānāmīśvarānetānkīrtayanprayato naraḥ /
dharmārthakāmairvipulairyujyate saha nityaśaḥ //

lokāṃśca labhate puṇyānviśveśvarakṛtāñśubhān /
ete devāstrayastriṃśatsarvabhūtagaṇeśvarāḥ //

nandīśvaro mahākāyo grāmaṇīrvṛṣabhadhvajaḥ /
īśvarāḥ sarvalokānāṃ gaṇeśvaravināyakāḥ //

saumyā raudrā gaṇāścaiva yogabhūtagaṇāstathā /
jyotīṃṣi sarito vyoma suparṇaḥ patageśvaraḥ //

pṛthivyāṃ tapasā siddhāḥ sthāvarāśca carāsca ha /
himavāngirayaḥ sarve catvāraśca mahārṇavāḥ //

bhavasyānucarāścaiva haratulyaparākramāḥ /
viṣṇurdevotha jiṣṇuśca skandaścāmbikayā saha //

kīrtayanprayataḥ sarvānsarvapāpaiḥ pramucyate /
ata ūrdhvaṃ pravakṣyāmi mānavānṛṣisattamān //

yavakrītaśca raibhyaśca arvāvasuparāvasū /
auśijaścaiva kakṣīvānbalaścāṅgirasaḥ sutaḥ //

ṛṣirmedhātitheḥ putraḥ kaṇvo barhiṣadastathā /
brahmatejomayāḥ sarve kīrtitā lokabhāvanāḥ //

labhante hi śubhaṃ sarve rudrānalavasuprabhāḥ /
bhuvi kṛtvā śubhaṃ karma modante divi daivataiḥ //

mahendraguravaḥ sapta prācīṃ vai diśamāśritāḥ /
prayataḥ kīrtayedetāñśakraloke mahīyate //

unmucuḥ pramucuścaiva svastyātreyaśca vīryavān /
dṛḍhavyaścordhvabāhuśca tṛṇasomāṅgirāstathā //

mitrāvaruṇayoḥ putrastathā'gastyaḥ pratāpavān /
dharmarājartvijaḥ sapta dakṣiṇāṃ diśamāśritāḥ //

dṛḍheyuśca ṛteyuśca parivyādhaśca kīrtimān /
ekataśca dvitaścaiva tritaścādityasannibhāḥ //

atreḥ putraśca dharmātmā ṛṣiḥ sārasvatastathā /
varuṇasyartvijaḥ sapta paścimāṃ diśamāśritāḥ //

atrirvasiṣṭho bhagavānkaśyapaśca mahānṛṣiḥ /
gautamaśca bharadvājo viśvāmitrotha kauśikaḥ //

ṛcīkatanayaścogro jamadagniḥ pratāpavān /
dhaneśvarasya guravaḥ saptaite uttarāśritāḥ //

apare munayaḥ sapta dikṣu sarvāsvadhiṣṭhitāḥ /
kīrtisvastikarā nṝṇāṃ kīrtitā lokabhāvanāḥ //

dharmaḥ kāmaśca kālaśca vasurvāsukireva ca /
anantaḥ kapilaścaiva saptaite dharaṇīdharāḥ //

rāmo vyāsastathā drauṇiraśvatthāmā ca lomaśaḥ /
ityete munayo divyā ekaikaḥ saptasaptadhā //

śāntisvastikarā loke diśāmpālāḥ pratīrtitāḥ /
yasyāṃyasyāṃ diśi hyete tanmukhaḥ śaraṇaṃ vrajet //

sraṣṭāraḥ sarvabhūtānāṃ kīrtitā lokapāvanāḥ /
saṃvarto merusāvarṇo mārkaṇḍeyaśca dhārmikaḥ //

sāṅkhyayogau nāradaśca durvāsāśca mahānṛṣiḥ /
atyantatapaso dāntāstriṣu lokeṣu viśrutāḥ //

apare rudrasaṅkāśāḥ kīrtitā brahmalaukikāḥ /
aputro labhate putraṃ daridro labhate dhanam //

tathā dharmārthakāmeṣu siddhiṃ ca labhate naraḥ /
pṛthuṃ vainyaṃ nṛpavaraṃ pṛthvī yasyābhavatsutā //

prajāpatiṃ sārvabhaumaṃ kīrtayedvasudhādhipam /
ādityavaṃśaprabhavaṃ mahendrasamavikramam //

purūravasamailaṃ ca triṣu lokeṣu viśrutam /
budhasya dayitaṃ putraṃ kīrtayedvasudhādhipam //

trilokaviśrutaṃ vīraṃ bharataṃ ca prakīrtayet /
gavāmayena yajñena yeneṣṭaṃ vai kṛte yuge //

rantidevaṃ mahādevaṃ kīrtayetparamadyutim /
viśvajittapasopetaṃ lakṣaṇyaṃ lokapūjitam //

tathā śvetaṃ ca rājarṣiṃ kīrtayetparamudyatim /
sagarasyātmajā yena plāvitāstāritāstathā //

hutāśanasamānetānmahārūpānmahaujasaḥ /
ugrakāyānmahāsatvānkīrtayetkīrtivardhanān //

devānṛṣigaṇāṃścaiva nṛpāṃśca jagatīśvarān /
sāṅkhyaṃ yogaṃ ca paramaṃ havyaṃ kavyaṃ tathaiva ca //

kīrtitaṃ paramaṃ brahma sarvaśrutiparāyaṇam /
maṅgalyaṃ sarvabhūtānāṃ pavitraṃ bahu kīrtitam //

vyādhipraśamanaṃ śreṣṭhaṃ pauṣṭikaṃ sarvakarmaṇām /
prayataḥ kīrtayeccaitānkalyaṃ sāyaṃ ca bhārata //

ete vai yānti varṣanti bhānti vānti sṛjanti ca /
ete vināyakāḥ śreṣṭhā dakṣāḥ kṣāntā jitendriyāḥ //

narāṇāmaśubhaṃ sarve vyapohanti prakīrtitāḥ /
sākṣibhūtā mahātmānaḥ pāpasya sukṛtasya ca //

etānvai kalyamutthāya kīrtayañśubhamaśnute /
nāgnicorabhayaṃ tasya na mārgapratirodhanam //

etānkīrtayatāṃ nityaṃ duḥsvapno naśyate nṛṇām /
mucyate sarvapāpebhyaḥ svastimāṃśca gṛhānvrajet //

dīkṣākāleṣu sarveṣu yaḥ paṭhenniyato dvijaḥ /
nyāyavānātmanirataḥ kṣānto dānto'nasūyakaḥ //

rogārto vyādhiyukto vā paṭhanpāpātpramucyate /
vāstumadhye tu paṭhataḥ kule svastyayanaṃ bhavet //

kṣetramadhye tu paṭhataḥ sarvaṃ sasyaṃ prarohati /
gacchataḥ kṣemamadhvānaṃ grāmāntaragataḥ paṭhan //

ātmanaśca sutānāṃ ca dārāṇāṃ ca dhanasya ca /
bījānāmoṣadhīnāṃ ca rakṣāmetāṃ prayojayet //

etānsaṅgrāmakāle tu paṭhataḥ kṣatriyasya tu /
vrajanti ripavo nāśaṃ kṣemaṃ ca parivartate //

etāndaive ca pitrye ca paṭhataḥ puruṣasya hi /
bhuñjate pitaraḥ kavyaṃ havyaṃ ca tridivaukasaḥ //

na vyādhiśvāpadabhayaṃ na dvipānna hi taskarāt /
kaśmalaṃ laghutāṃ yāti pāpmanā ca pramucyate //

yānapātre ca yāne ca pravāse rājaveśmani /
parāṃ siddhimavāpnoti sāvitrīṃ hyuttamāṃ paṭhan //

na ca rājabhayaṃ teṣāṃ na piśācānna rākṣasāt /
nāgnyambupavanavyālādbhayaṃ tasyopajāyate //

caturṇāmapi varṇānāmāśramasya viśeṣataḥ /
karoti satataṃ śāntiṃ sāvitrīmuttamāṃ paṭhan //

nāgnirdahati kāṣṭhāni sāvitrī yatra paṭhyate /
na tatra bālo mriyate na ca tiṣṭhanti pannagāḥ //

na teṣāṃ vidyate duḥkhaṃ gacchanti paramāṃ gatim /
ye śṛṇvanti mahadbrahma sāvitrīguṇakīrtanam //

gavāṃ madhye tu paṭhato gāvo'sya bahuvatsalāḥ /
prasthāne vā pravāse vā sarvāvasthāṃ gataḥ paṭhet //

japatāṃ juhvatāṃ caiva nityaṃ ca prayatātmanām /
ṛṣīṇāṃ paramaṃ japyaṃ guhyametannarādhipa //

yāthātathyena siddhasya itihāsaṃ purātanam /
parāśaramataṃ divyaṃ śakrāya kathitaṃ purā //

tadetatte samākhyātaṃ tathyaṃ brahma sanātanam /
hṛdayaṃ sarvabhūtānāṃ śrutireṣā sanātanī //

somādityānvayāḥ sarve rāghavāḥ kuravastathā /
paṭhanti śucayo nityaṃ sāvitrīṃ prāṇināṃ gatiṃ //

abhyāse nityaṃ devānāṃ saptarṣīṇāṃ dhruvasya ca /
mokṣaṇaṃ sarvakṛcchrāṇāṃ mocayatyaśubhātsadā //

vṛddhaiḥ kāśyapagautamaprabhṛtibhirbhṛgvaṅgirotryādibhiḥ śukrāgastyabṛhaspatiprabhṛtibhirbrahmahmarṣibhiḥ sevitam /
bhāradvājamataṃ ṛcīkatanayaiḥ prāptaṃ vasiṣṭhātpunaḥ sāvitrīmadhigamya śakravasubhiḥ kṛtsnā jitā dānavāḥ //

yo gośataṃ kanakaśṛṅgamayaṃ dadāti viprāya vedaviduṣe ca bahuśrutāya /
divyāṃ ca bhāratakathāṃ kathayecca nityaṃ tulyaṃ phalaṃ bhavati tasya ca tasya caiva //

dharmo vivardhati bhṛgoḥ parikīrtanena vīryaṃ vivardhati pasiṣṭhanamonatena /
saṅgrāmajidbhavati caiva raghuṃ namasya- nsyādaśvinau ca parikīrtayato na rogaḥ //

eṣā te kathitā rājansāvitrī brahmaśāśvatī /
vivakṣurasi yaccānyattatte vakṣyāmi bhārata //