Mahabharata · Chapter 13.252

atha vyomni mahāñśabdaḥ savidyutstanayitnumān /
meghaiśca gaganaṃ nīlaṃ saṃruddhamabhavaddhanaiḥ //

prāvṛṣīva ca parjanyo vavṛṣe nirmalaṃ payaḥ /
tamaśvaivābhavaddhoraṃ diśaśca na cakāśire //

tato devagirau tasminramye puṇye sanātane /
na śarvaṃ bhūtasaṅghaṃ vā dadṛśurmanayastadā //

vyabhraṃ ca gaganaṃ sadyaḥ kṣaṇena samapadyata /
tīrthayātrāṃ tato viprā jagmuścānye yathāgatam //

tadadbhutamacintyaṃ ca dṛṣṭvā te vismitā'bhavan /
śaṅkarasyomayā sārdhaṃ saṃvādaṃ tvatkathāśrayam //

sa bhavānpuruṣavyāghra brahmabhūtaḥ sanātanaḥ /
yadarthamanuśiṣṭā smo giripṛṣṭhe mahātmanā //

dvitīyaṃ tvadbhutamidaṃ tvattejaḥkṛtamadya vai /
dṛṣṭvā ca vismitāḥ kṛṣṇa sā ca naḥ smṛtirāgatā //

etatte devadevasya māhātmyaṃ kathitaṃ prabho /
kapardino girīśasya mahābāho janārdana //

ityuktāḥ sa tadā kṛṣṇastapovananivāsibhiḥ /
mānayāmāsa tānsarvānṛṣīndevakinandanaḥ //

atharṣayaḥ samprahṛṣṭāḥ punaste kṛṣmamabruvan /
punaḥpunardarśayāsmānsadaiva madhusūdana //

na hi naḥ sā rati svarge yā ca tvaddarśane vibho /
tadṛtaṃ ca mahābāho yadāha bhagavānbhavaḥ //

etatte sarvamākhyātaṃ rahasyamarikarśana /
tvameva hyartatattvajñaḥ pṛṣṭo'smānpṛcchase yadā //

tadasmābhiridaṃ guhyaṃ tvatpriyārthamudāhṛtam /
na ca te'viditaṃ kiñcittriṣu lokeṣu vidyate //

janma caiva prasūtiśca yaccānyatkāraṇaṃ vibho /
vayaṃ tu bahucāpalyādaśaktā guhyadhāraṇe //

tataḥ sthite tvayi vibho laghutvātpralapāmahe /
na hi kiñcittadāścaryaṃ yanna vetti bhavāniha //

divi vā bhuvi vā deva sarvaṃ hi viditaṃ tava /
sādhayāma vayaṃ kṛṣṇa buddhiṃ puṣṭimavāpnuhi //

putraste sadṛśastāta viśiṣṭo vā bhaviṣyati /
mahāprabhāvasaṃyukto dīptikīrtikaraḥ prabhuḥ //
bhīṣma uvāca /

tataḥ praṇamya deveśaṃ yādavaṃ puruṣottamam /
pradakṣiṇamupāvṛtya prajagmuste maharṣayaḥ //

soyaṃ nārāyaṇaḥ śrīmandīptyā paramayā yutaḥ /
vrataṃ yathāvattaccīrtvā dvārakāṃ punarāgamat //

pūrṇe ca daśame māsi putro'sya paramādbhutaḥ /
rukmiṇyāṃ sammato jajñe śūro vaṃśadharaḥ prabho //

sa kāmaḥ sarvabhūtānāṃ sarvabhāvagato nṛpa /
asurāṇāṃ surāṇāṃ ca caratyantargataḥ sadā //

soyaṃ puruṣaśārdūlo meghavarṇaścaturbhujaḥ /
saṃśritaḥ pāṇḍavānpremṇā bhavantaścainamāśritāḥ //

kīrtirlakṣmīrdhṛtiścaivaka svargamārgastathaiva ca /
yatraiṣa saṃsthitastatra devo viṣṇustrivikramaḥ //

sendrā devāstrayastriṃśadeṣa nātra vicāraṇā /
ādidevo mahādevaḥ sarvabhūtapratiśrayaḥ //

anādinidhano'vyakto mahātmā madhusūdanaḥ /
ayaṃ jāto mahātejāḥ surāṇāmarthasiddhaye //

sudustarārthatattvasya vaktā kartā ca mādhavaḥ /
tava pārtha jayaḥ kṛtsnastava kīrtistathā'tulā //

taveyaṃ pṛthivī devī kṛtsnā nārāyaṇāśrayāt /
ayaṃ nāthastavācintyo yasya nārāyaṇo gatiḥ //

sa bhavāṃstvamupādhvaryū raṇāgnau hutavānnṛpān /
kṛṣṇasruveṇa mahatā yugāntāgnisamena vai //

duryodhanaśca śocyosau saputrabhrātṛbāndhavaḥ /
kṛtavānyo'budhaḥ krodhāddharigāṇḍīvivigraham //

daiteyā dānavendrāśca mahākāyā mahābalāḥ /
cakrāgnau kṣayamāpannā dāvāgnau śalabhā iva //

pratiyoddhuṃ na śakyo hi mānuṣaireva saṃyuge /
vihīnaiḥ puruṣavyāghra sattvaśaktibalādibhiḥ //

jayo yogī yugāntābhaḥ savyasācī raṇāgragaḥ /
tejasā hatavānsarvaṃ suyodhanavalaṃ nṛpa //

yattu govṛṣabhāṅkena munibhyaḥ samudāhṛtam /
purāṇaṃ himavatpṛṣṭhe tanme nigadataḥ śṛṇu //

yāvattasya bhavetpuṣṭistejo jīptiḥ parākramaḥ /
prabhāvaḥ sannatirjanma kṛṣṇe tattriguṇaṃ vibho //

kaḥ śaknotyanyathā kartuṃ tadyadi syāttathā śṛṇu /
yatraḥ kṛṣṇo hi bhagavāṃstatra puṣṭiranuttamā //

vayaṃ tvihālpamatayaḥ paratantrāḥ suviklabāḥ /
jñānapūrvaṃ prapannāḥ smo mṛtyoḥ panthānamavyayam //

bhavāṃścāpyārjavaparaḥ pūrvaṃ kṛtvā pratiśrayam /
rājavṛttaṃ na labhate pratijñāpālane rataḥ //

atyevātmavadhaṃ loke rājaṃstvaṃ bahu manyase /
na hi pratijñā yā dattā tāṃ prahātumarindama //

kālenāyaṃ janaḥ sarvo nihato raṇamūrdhani /
vayaṃ ca kālena hatāḥ kālo hi parameśvaraḥ //

na hi kālena kālajñaḥ spṛṣṭaḥ śocitumarhasi /
kālo lohitaraktākṣaḥ kṛṣṇo daṇḍī sanātanaḥ //

tasmātkuntīsuta jñātīnneha śocitumarhasi /
vyapetamanyurnityaṃ tvaṃ bhava kauravanandana //

mādhavasyāsya mahātmyaṃ śrutaṃ yatkathitaṃ mayā /
tadeva tāvatparyāptaṃ sajjanasya nidarśanam //

vyāsasya vacanaṃ śrutvā nāradasya ca dhīmataḥ /
svayaṃ caiva mahārāja kṛṣṇasyārhatamasya vai //

prabhāvaścarṣipūgasya kathitaḥ sumahānmayā /
maheśvarasya saṃvādaṃ śailaputryāśca bhārata //

dhārayiṣyati yaścainaṃ mahāpuruṣasambhavam /
śṛṇuyātkathayedvā yaḥ sa śreyo labhate param //

bhavitāraśca tasyātha sarve kāmā yathepsitāḥ /
pretya svargaṃ ca labhate naro nāstyatra saṃśayaḥ //

nyāyyaṃ śreyobhikāmena pratipattuṃ janārdanaḥ /
eṣa evākṣayo vipraiḥ stuto rājañjanārdanaḥ //

maheśvaramukhotsṛṣṭā ye ca dharmaguṇāḥ smṛtāḥ /
te tvayā manasā dhāryāḥ kururāja divāniśam //

evaṃ te vartamānasya samyagdaṇḍadharasya ca /
prajāpālanadakṣasya svargaloko bhaviṣyati //

dharmoṇāpi sadā rājanprajā rakṣitumarhasi /
yastasya vipulo daṇḍaḥ samyagdharmaḥ sa kīrtyate //

ya eṣa kathito rājanmayā sajjanasannidhau /
śaṅkarasyomayā sārdhaṃ saṃvādo dharmasaṃhitaḥ //

śrutvā vā śrotukāmo vā'pyarcayedvṛṣabhadhvajam /
viśuddheneha bhāvena ya icchedbhūtimātmanaḥ //

eṣa tasyānavadyasya nāradasya mahātmanaḥ /
sandeśo devapūjārthaṃ taṃ tathā kuru pāṇḍava //

etadatyadbhutaṃ vṛttaṃ puṇye hi bhavati prabho /
vāsudevasya kaunteya sthāṇoścaiva svabhāvajam //

daśavarśasahasrāṇi badaryāmeṣa śāśvataḥ /
tapaścacāra vipulaṃ saha gāṇḍīvadhanvanā //

triyugau puṇḍarīkākṣau vāsudevadhanañjayau /
viditau nāradādetau mama vyāsācca pārthiva //

bāla eva mahābāhuścakāra kadanaṃ mahat /
kaṃsasya puṇḍarīkākṣo jñātitrāmārthakāraṇāt //

karmaṇāmasya kaunteya nāntaṃ saṅkhyātumutsahe /
śāśvatasya purāṇasya puruṣasya yudhiṣṭhira //

dhruvaṃ śreyaḥ paraṃ tāta bhaviṣyati tavottamam /
yasya te puruṣavyāghraḥ sakhā cāyaṃ janārdanaḥ //

duryodhanaṃ tu śocāmi pretya loke'pi durmatim /
yatkṛte pṛthivī sarvā vinaṣṭā sahayadvipā //

duryodhanāparādhena karṇasya śakunestathā /
duḥśāsanavaturthānāṃ kuravo nidhanaṃ gatāḥ //
vaiśampāyana uvāca /

evaṃ sambhāṣamāṇe tu gāṅgeye puruṣarṣabhe /
tūṣṇīṃ babhūva kauravyo madhye teṣāṃ mahātmanām //

tacchrutvā vismayaṃ jagmurdhṛtarāṣṭrādayo nṛpāḥ /
sampūjya manasā kṛṣṇaṃ sarve prāñjalaya'bhavan //

ṛṣayaścāpi te sarve nāradapramukhāstadā /
pratigṛhyābhyanandanta tadvākyaṃ pratipūjya ca //

ityetadakhilaṃ sarvaiḥ pāṇḍavo bhrātṛbhiḥ saha /
śrutavānsumahāścaryaṃ puṇyaṃ bhīṣmānuśāsanam //
vaiśampāyana uvāca /

yudhiṣṭhirastu gāṅgeyaṃ viśrāntaṃ bhūridakṣiṇam /
punareva mahābuddhiḥ paryapṛcchanmahīpatiḥ //