Mahabharata · Chapter 13.251

pinākinbhaganetraghna sarvalokanamaskṛta /
mahātmyaṃ vāsudevasya śrotumicchāma śaṅkara //
īśvara uvāca /

pitāmahādapi varaḥ śāśvataḥ puruṣo hariḥ /
kṛṣṇo jāmbūnadābhāso vyabhre sūrya ivoditaḥ //

daśabāhurmahātejā devatāriniṣūdanaḥ /
śrīvatsāṅko hṛṣīkeśaḥ sarvadaivatapūjitaḥ //

brahmā tasyodarabhavastasyāhaṃ ca śirobhavaḥ /
śiroruhebhyo jyotīṃṣi romabhyaśca surā'surāḥ //

ṛṣayo dehasambhūtāstasya lokāśca śāśvatāḥ /
pitāmahagṛhaṃ sākṣātsarvadevagṛhaṃ ca saḥ //

sosyāḥ pṛthivyāḥ kṛtsnāyāḥ sraṣṭā tribhuvaneśvaraḥ /
saṃhartā caiva bhūtānāṃ sthāvarasya carasya ca //

sa hi devavaraḥ sākṣāddevanāthaḥ parantapaḥ /
sarvajñaḥ sarvasaṃśliṣṭaḥ sarvagaḥ sarvatomukhaḥ //

paramātmā hṛṣīkeśaḥ sarvavyāpī maheśvaraḥ /
na tasmātparamaṃ bhūtaṃ triṣu lokeṣu kiñcana //

sanātano vai madhuhā govinda iti viśrutaḥ /
sa sarvānpārtivānsaṅkhye ghātayiṣyati mānadaḥ //

surakāryārthamutpanno mānuṣaṃ vapurāsthitaḥ /
na hi devagaṇāḥ śaktāstrivikramavinākṛtāḥ //

bhuvane devakāryāṇi kartuṃ nāyakavarjitāḥ /
nāyakaḥ sarvabhūtānāṃ sarvadevanamaskṛtaḥ //

etasya devanāthasya devakāryaparasya ca /
brahmabhūtasya satataṃ brahmarṣiśaraṇasya ca //

brahmā vasati garbhasthaḥ śarīre sukhasaṃsthitaḥ /
śarvaḥ sukhaṃ saṃśritaśc śarīre sukhasaṃsthitaḥ //

sarvāḥ sukhaṃ saṃśritāśca śarīre tasya devatāḥ /
sa devaḥ puṇḍarīkākṣaḥ śrīgarbhaḥ śrīsahoṣitaḥ //

śārṅgacakrāyudhaḥ khaḍgī sarvanāgaripudhvaja /
uttamena sa śīlena damena ca śamena ca //

parākrameṇa vīryeṇa vapuṣā darśanena ca /
āroheṇi pramāṇena dhairyeṇārjavasampadā //

ānṛśaṃsyena rūpeṇa balena na samanvitaḥ /
astraiḥ samuditaḥ sarvairdivyairadbhutadarśanaiḥ //

yogamāyaḥ sahasrākṣo nirapāyo mahāmanāḥ /
vīro mitrajanaślāghī jñātibandhujanapriyaḥ //

kṣamāvāṃścānahaṃvādī brahmaṇyo brahmanāyakaḥ /
bhayahartā bhayārtānāṃ mitrāṇāṃ nandivardhanaḥ //

śaraṇyaḥ sarvabhūtānāṃ dīnānāṃ pālane rataḥ /
śrutavānarthasampannaḥ sarvabhūtanamaskṛtaḥ //

samāśritānāṃ varadaḥ śatrūṇāmapi dharmavit /
nītijño nītisampanno brahmavādī jitendriyaḥ //

bhavārthamiha devānāṃ buddhyā paramayā yutaḥ /
prājāpatye śubhe mārge mānave dharmasaṃskṛte //

samutpatsyati govindo manorvaṃśe mahātmanaḥ /
aṅgo nāma manoḥ putro antardhāmā tataḥ paraḥ //

antardhāmno havirdhāmā prajāpatiraninditaḥ /
prācīnabarhirbhavitā havirdhāmnaḥ suto mahān //

tasya pracetaḥpramukhā bhaviṣyanti daśātmajāḥ /
prācetasastathā dakṣo bhaviteha prajāpatiḥ //

dākṣāyaṇyāstathā'dityo manurādityatastathā /
manośca vaṃśaja ilā sudyumnaśca bhaviṣyati //

budhātpurūravāścāpi tasmādāyurbhaviṣyati /
nahuṣo bhavitā tasmādyayātistasya cātmajaḥ //

yadustasmānmahāsatvaḥ kroṣṭā tasmādbhaviṣyati /
kroṣṭuścaiva mahānputro vṛjinīvānbhaviṣyati //

vṛjinīvataśca bhavitā uṣaṅguraparājitaḥ / uṣaṅgorbhavitā putraḥ śūraścitrarathastathā /
tasya tvavarajaḥ putraḥ śūro nāma bhaviṣyati //

teṣāṃ vikhyātavīryāṇāṃ caritraguṇaśālinām /
yajvanāṃ suviśuddhānāṃ vaṃśe brāhmaṇasammate //

sa śūraḥ kṣatriyaśreṣṭho mahāvīryo mahāyaśāḥ / svavaṃśavistarakaraṃ janayiṣyati mānadaḥ /
vasudeva iti khyātaṃ putramānakadundubhim //

tasya putraścaturbāhurvāsudevo bhaviṣyati // dātā brāhmaṇasatkartā brahmabhūto dvijapriyaḥ /

rājño māgadhasaṃruddhānmokṣayiṣyati yādavaḥ //

jarāsandhaṃ tu rājānaṃ nirjitya girigahvare /
sarvapārthivaratnāḍhyo bhaviṣyati sa vīryavān //

pṛthivyāmapratihato vīryeṇa ca bhaviṣyati /
vikrameṇa ca sampannaḥ sarvapārthivapārthivaḥ //

śūraseneṣu bhūtvā sa dvārakāyāṃ vasanprabhuḥ /
pālayiṣyati gāṃ devīṃ vijitya nayavitsadā //

taṃ bhavantaḥ samāsādya vāṅbhālyairarhaṇairvaraiḥ /
arcayantu yathānyāyaṃ brahmāṇamiva śāśvatam //

yo hi māṃ draṣṭumiccheta brahmāṇaṃ ca pitāmaham /
draṣṭavyastena bhagavānvāsudevaḥ pratāpavān //

dṛṣṭe tasminnahaṃ dṛṣṭo na me'trāsti vicāraṇā /
pitāmaho vā deveśa iti vitta tapodhanāḥ //

sa yasya puṇḍarīkākṣaḥ prītiyukto bhaviṣyati /
tasya devagaṇaḥ prīto brahmapūrvo bhaviṣyati //

yaśca taṃ mānave loke saṃśrayiṣyati keśavam /
tasya kīrtirjayaścaiva svargaścaiva bhaviṣyati //

dharmāṇāṃ deśikaḥ sākṣātsa bhaviṣyati dhaṟmibhāk /
dharmavadbhiḥ sa deveśo namaskāryaḥ sadodyataiḥ //

dharma eva paro hi syāttasminnabhyarcite vibhau /
sahi devo mahātejāḥ prajāhitacikīrṣayā //

dharmārthaṃ puruṣavyāghra ṛṣikoṭīḥ sasarja ha /
tāḥ sṛṣṭāstena vibhunā parvate gandhamādane //

sanatkumārapramukhāstiṣṭhanti tapasā'nvitāḥ /
tasmātsa vāgmī dharmajño namasyo dvijapuṅgavāḥ //

divi śreṣṭho hi bhagavānharirnārāyaṇaḥ prabhuḥ / vandito hi sa vandeta mānito mānayīta ca /
arhitaścārhayennityaṃ pūjitaḥ pratipūjayet //

dṛṣṭaḥ paśyedaharahaḥ saṃśritaḥ pratisaṃśrayet /
arcitaścārcayennityaṃ sa devo dvijasattamāḥ //

etattasyānavadyasya viṣṇorvai paramaṃ vratam /
ādidevasya mahataḥ sajjanācaritaṃ sadā //

bhuvane'bhyarcito nityaṃ devairapi sanātanaḥ /
abhayenānurūpeṇi yujyante tamanuvratāḥ //

karmaṇā manasā vācā sa namasyo dvijaiḥ sadā /
yatnavadbhirupasthāya draṣṭavyo devakīsutaḥ //

eṣa vo'bhihito mārgo mayā vai munisattamāḥ /
taṃ dṛṣṭvā sarvaśo devaṃ dṛṣṭāḥ syuḥ surasattamāḥ //

mahāvarāhaṃ taṃ devaṃ sarvalokapitāmaham /
ahaṃ caiva namasyāmi nityameva jagatpatim //

tatra ca tritayaṃ dṛṣṭaṃ bhaviṣyati na saṃśayaḥ /
samastā hi vayaṃ devāstasya dehe vasāmahe //

tasya caivāgrajo bhrātā sitādrinicayaprabhaḥ /
halī bala iti khyāto bhaviṣyati dharādharaḥ //

triśirāstasya divyaśca sātakumbhamayo drumaḥ /
dhvajastṛṇendro devasya bhaviṣyati rathāśritaḥ //

śiro nāgairmahābhogaiḥ parikīrṇaṃ mahātmabhiḥ /
bhaviṣyati mahābāhoḥ sarvalokeśvarasya ca //

cintitāni sameṣyanti śastrāṇyastrāṇi caiva ha /
anantaśca sa avokto bhagavānhariravyayaḥ //

samādiṣṭaśca vibudhairdarśaya tvamiti prabho / suparṇo yasya vīryeṇa kaśyapasyātmajo balī /
antaṃ naivāśakaddraṣṭuṃ devasya paramātmanaḥ //

sa ca śeṣo vicarate parayā vai mudā yutaḥ /
antarvasati bhogena parirabhya vasundharām //

ya eva viṣṇuḥ so'nanto bhagavānvasudhādharaḥ /
yo rāmaḥ sa hṛṣīkeśo yocyutaḥ sa dharādharaḥ //

tāvubhau puruṣavyāghrau divyau divyaparākramau /
draṣṭavyau mānanīyau ca cakralāṅgaladhāriṇau //

eṣa vo'nugrahaḥ prokto mayā puṇyastapodhanāḥ /
yadbhavanto yaduśreṣṭhaṃ pūjayeyuḥ prayatnataḥ //