Mahabharata · Chapter 13.253

kṛpayā parayā proktaḥ sarveṣāṃ pāpakarmaṇām /
jñānasya ca parasyeha tanme brūhi pitāmaha //
bhīṣma uvāca /

upāyo'yaṃ paraprāptau paramaḥ parikīrtitaḥ /
nārāyaṇāsyānudhyānamarcanaṃ yajanaṃ stutiḥ //

śravaṇaṃ tatkathānāṃ ca vidvatsaṃrakṣaṇaṃ tathā / vidvacchuśrūṣaṇaprītirupadeśānupālanam /
sa dhyānena japenanāśu mucyate prākṛtopi vā //

japaścaturvidhaḥ prokto vaidikastāntrikopi ca /
paurāṇikotha vidvadbhiḥ kathitaḥ smārta eva ca //

vidvacchuśrūṣayā jñānaṃ vidvatsaṃrakṣaṇena ca /
nāsādhyaṃ jñānināṃ kiñcittasmādrakṣyāstvayā dvijāḥ //

suvratā bandhuhīnaikā vane pūrvaṃ yamena tu /
āsīdāśvāsitā vidvatsaṃrakṣaṇaphalātkila //

viprasya maraṇe hetustatpatnī pitṛśokadā / vaiśyā tvamatilābho'yaṃ viprakanyeti sāmpratam /

ityuktā'śvāsitā'pṛcchatkenaivaṃ pāpasaṃyutā /
jātā viprakule samyak śreyaścāpi bravīhi me //
yama uvāca /

anyajanmani vidvāṃsaṃ prahārairabhipīḍitam /
coraśaṅkāvimokṣeṇa mokṣayitvā sujanmikā //

ityuktā'ṣṭākṣaradhyānajapādiśreyasaṃyutā /
yamenānugṛhītā'bhūtpuṇyalokanivāsinī //

tannityaṃ viduṣāṃ rakṣā tatparo'bhūrmahīpate /
teṣāṃ saṃrakṣaṇātsadyaḥ sarvapāpaiḥ pramucyate //