Mahabharata · Chapter 13.246

sāṅkhyajñāne niyuktānāṃ yathāvatkīrtitaṃ mayā /
yogadharmaṃ punaḥ kṛtsnaṃ kīrtayiṣyāmi te śṛṇu //

sa ca yogo dvidhā bhinno brahmidevarṣisammataḥ /
samānamubhayatrāpi vṛttaṃ śāstrapracoditam //

ca cāṣṭaguṇamaiśvaryamadhikṛtya vidhīyate /
sāyujyaṃ sarvadevānāṃ yogadharmaṃ paraṃ śritāḥ //

jñānaṃ sarvasya yogasya mūlamityavadhāraya /
vratopavāsaniyamaistatsarvaṃ cāpi bṛṃhayet //

aikātmyaṃ buddhimanasorindriyāṇāṃ ca sarvaśaḥ /
ātmano veditaṃ prājñe jñānametattu yoginām //

arcayedbrāhmaṇānagniṃ devatāyatanāni ca /
varjayedaśivaṃ bhāvaṃ sarvasattvamupāśritaḥ //

dānamadhyayanaṃ śruddhā vratāni niyamāstathā / satyamāhāraśuddhiśca śaucamindriyanigrahaḥ /
etaiśca vardhate tejaḥ pāpaṃ cāpyavadhūyate //

nirdhūtapāpastejasvī laghvāhāro jitendriyaḥ /
amodho nirmalo dāntaḥ paścādyogaṃ samācaret //

avarudhyātmanaḥ pūrvaṃ matsyaghāta ivāmiṣam / ekānte vijane deśe sarvataḥ saṃvṛte śucau /
kalpayedāsanaṃ tatra svāstīrṇaṃ mṛdubhiḥ kuśaiḥ //

upaviśyāsane tasminnṛjukāyaśirodharaḥ / avyagraḥ sukhamāsīnaḥ svāṅgāni na vikampayet /
samprekṣya nāsikāgraṃ svaṃ diśaścānavalokayan //

mano'vasthāpanaṃ devi yogasyopaniṣadbhavet /
tasmātsarvaprayatnena mano'vasthāpayetsadā //

tvakchrotraṃ ca tato jihvā ghrāṇaṃ cakṣuśca saṃharet /
pañcendriyāṇi sandhāya manasi sthāpayedbudhaḥ //

sarvaṃ cāpohya saṅkalpamātmani sthāpayenmanaḥ /
yadaitānyavatiṣṭhante manaḥṣaṣṭhāni cātmani //

prāṇāpānau tadā tasya yugapattiṣṭhato vaśe /
prāṇe hi vaśamāpanne yogasiddhirdhruvā bhavet //

śarīraṃ cintayetsarvaṃ vipāṭya ca samīpataḥ /
antardehagatiṃ cāpi prāṇānāṃ paricintayet //

tato mūrdhānamagniṃ ca śarīraṃ paripālayet /
prāṇo mūrdhani ca śvāso vartamāne viceṣṭate //

sajjastu sarvabhūtātmā puruṣaḥ sa sanātanaḥ /
mano buddhirahaṅkāro bhūtāni viṣayāṃśca saḥ //

bastirmūlaṃ gudaṃ caiva pāvakaṃ ca samāśritaḥ /
vahanmūtraṃ purīṣaṃ ca sadā'pānaḥ pravartate //

ataḥ pravṛttirdehaṣu karma cāpānasaṃyutam / udīrayansarvadhātūnanta ūrdhvaṃ pravartate /
udāna iti taṃ vidyuradhyātmakuśalā janāḥ //

sandhausandhau sa nirviṣṭaḥ sarvaceṣṭāpravartakaḥ /
śarīreṣu manuṣyāṇāṃ vyāna ityupadiśyate //

dhātuṣvagnau ca vitataḥ samāno'gniḥ samīraṇaḥ /
sa eva sarvaceṣṭānāmantakāle nivartakaḥ //

prāṇānāṃ sannipāteṣu saṃsargādyaḥ prajāyate /
ūṣmā sogniriti jñeyaḥ sonnaṃ pacati dehinām //

apānaprāṇayormadhye vyānodānāvupāśritau /
samanvitaḥ samānena samyakpacati pāvakaḥ //

śarīramadhye nābhiḥ syānnābhyāmagniḥ pratiṣṭhitaḥ /
agnau prāṇāśca saṃyuktāḥ prāṇeṣvātmā vyavasthitaḥ //

pakvāśayastvadho nābherūrdhvamāmāśayastathā /
nābhirmadhye śarīrasya sarvaprāṇāśca saṃśritāḥ //

sthitāḥ prāṇādayaḥ sarve tiryagūrdhvamadhaśvarāḥ /
vahantyannarasānnāḍyo daśaprāṇāgnicoditāḥ //

yogināmeṣa mārgastu pañcasveteṣu tiṣṭhati /
jitaśramaḥ samāsīno mūrdhanyātmānamādadhet //

mūrdhanyātmānamādhāya bhruvormadhye manastathā /
sannirudhya tataḥ prāṇānātmānaṃ cintayetparam //

prāṇe tvapānaṃ yuñjīta prāṇāṃścāpānakarmaṇi /
prāṇāpānagatī ruddhvā prāṇāyāmaparo bhavet //

evamantaḥ prayuñjīta pañca prāṇānparasparam /
vijane sammitāhāro munastūṣṇīṃ nirucchvasan //

aśrāntaścintayedyogī utthāya ca punaḥpunaḥ /
tiṣṭhangacchansvapaṃscāpi yuñjītaivamatandritaḥ //

evaṃ niyuñjatastasya yogino yuktacetasaḥ /
prasīdati manaḥ kṣipraṃ prasanne dṛśyate param //

vidhūma iva dīpto'gnirāditya iva raśmivān /
vaidyuto'gnirivākāśe puruṣo dṛśyate'vyayaḥ //

dṛṣṭvā tadātmano jyotiraiśvaryāṣṭaguṇairyutaḥ /
prāpnoti paramaṃ sthānaṃ spṛhaṇīyaṃ surairapi //

imānyogasya doṣāṃśca daśaiva paricakṣate /
doṣairvighne varārohe yogināṃ kavibhiḥ smṛtāḥ //

kāmaḥ krodho bhayaṃ svapnaḥ snehamatyaśanaṃ tathā /
vaicityaṃ vyādhirālasyaṃ lobhaṃ ca daśamaṃ smṛtam //

etaisteṣāṃ bhavedvighno daśabhirdevakāritaiḥ /
tasmādetānapāsyādau yuñjīta ca paraṃ manaḥ //

imānapi guṇānaṣṭau yogasya paricakṣate /
guṇaistairaṣṭabhirdravyamaiśvaryamadhigamyate //

aṇimā mahimā caiva prāptiḥ prākāmyameva hi /
īśitvaṃ ca vaśitvaṃ ca yatra kāmāvasāyitā //

etānaṣṭau guṇānprāpya kathañcidyogināṃ varāḥ /
īśāḥ sarvasya lokasya devānapyatiśerate //

yogosti naivātyaśino na caikāntamanaśnataḥ /
na cātisvapnaśīlasya nātijāgatarastathā //

yuktāhāravihārasya yuktaceṣṭasya karmasu /
yuktasvapnāvabodhasya yogo bhavati duḥkhahā //

anenaiva vidhānena sāyujyaṃ tatprakalpyate /
sāyujyaṃ devasātkṛtvā prayuñjītātmabhaktitaḥ //

ananyamanasā devi nityaṃ tadgatacetasā /
sāyujyaṃ prāpyate devairyatnena mahatā cirāt //

havirbhirarcanairhomaiḥ praṇāmairnityacintayā /
arcayitvā yathāśakti svakaṃ deśaṃ viśanti te //

sāyujyānāṃ viśiṣṭaṃ ca māmakaṃ vaiṣṇavaṃ tathā /
māṃ prāpya na nivartante viṣṇu vā śubhalocane //

iti te kathito devi yogadharmaḥ sanātanaḥ /
na śakyaḥ praṣṭumanyena yogadharmastvayā vinā //