Mahabharata · Chapter 13.245

sāṅkhyajñānaṃ pravakṣyāmi yathāvatte śucismite /
yajjñātvā na punarmartyaḥ saṃsāreṣu pravartate //

jñānenaiva vimuktāste sāṅkhyāḥ sannyāsakovidāḥ / śarīraṃ tu tapo ghoraṃ sāṅkhyāḥ prāhurnirarthakam /

pañcaviṃśatikaṃ jñānaṃ teṣāṃ jñānamiti smṛtam /
mūlaprakṛtiravyaktamavyaktājjāyate mahān //

mahato'bhūdahaṅkārastasmāttanmātrapañcakam /
indriyāṇi daśaikaṃ ca tanmātrebhyo bhavantyuta //

tebhyo bhūtāni pañcāsya śarīraṃ yaiḥ pravartate / iti kṣetrasya sankṣepaṃ caturviṃśatiriṣyate /
pañcaviṃśatityāhuḥ puruṣeṇeha saṅkhyayā //

satvaṃ rajastamaśceti guṇāḥ prakṛtisambhavāḥ /
taiḥ sṛjatyakhilaṃ lokaṃ prakṛtiḥ svātmakairguṇaiḥ //

icchā dveṣaḥ sukhaṃ duḥkhaṃ sanghātaścetanā dhṛtiḥ /
vikārāḥ prakṛteścaite veditavyā manīṣibhiḥ //

lakṣaṇaṃ cāpi sarveṣāṃ vikalpaṃ cāditaḥ pṛthak /
vistareṇaiva vakṣyāmi tasya vyākhyāmahaṃ śṛṇu //

nityamekamaṇu vyāpi kriyāhīnamahetukam /
agrāhyamindriyaiḥ sarvairetadavyaktalakṣaṇam //

avyaktaṃ prakṛtirmūlaṃ pradhānaṃ yoniravyayam /
avyaktasyaiva nāmāni śabdaiḥ paryāyavācakaiḥ //

tatsūkṣmatvādanirdeśyaṃ tatsadityabhidhīyate /
tanmūlaṃ ca jagatsarvaṃ tanmūlā sṛṣṭiriṣyate //

satvādayaḥ prakṛtijā guṇāstānprabravīmyaham //

sukhaṃ tuṣṭiḥ prakāśaśca trayaste sātvikā guṇāḥ / rāgadveṣau sukhaṃ duḥkhaṃ stambhaśca rajaso guṇāḥ /
aprakāśo bhayaṃ mohastandrī ca tamaso guṇāḥ //

śraddhā praharṣo vijñānamasammoho dayā dhṛtiḥ /
satve pravṛtte vardhante viparīte viparyayaḥ //

kāmakrodhau manastāpo lobho mohastathāmṛṣā /
pravṛddhe parivardhante rajasyetāni sarvaśaḥ //

viṣādaḥ saṃśayo mohastandrī nidrā bhayaṃ tathā /
tamasyetāni vardhante pravṛddhe hetvahetukam //

evamanyonyametāni vardhante ca punaḥpunaḥ /
hīyante ca tathā nityamabhibhūtāni bhūriśaḥ //

tatra yatprītisaṃyuktaṃ kāyena manasā'pi vā /
vartate sātviko bhāva ityupekṣeta tattathā //

yadā santāpasaṃyuktaṃ cittakṣobhakaraṃ bhavet /
vartate raja ityeva tadā tadabhicintayet //

yadā sammohasaṃyuktaṃ yadviṣādakaraṃ bhavet /
apratārkyamavijñeyaṃ tamastadupadhārayet //

samāsātsātviko dharmaḥ samāsādrājasaṃ dhanam /
samāsāttāmasaḥ kāmastrivarge triguṇāḥ kramāt //

brahmādidevasṛṣṭiryā sātvikīti prakīrtyate /
rājasī mānavī sṛṣṭistiryagyonistu tāmisī //

ūrdhvaṃ gacchanti satvasthā madhye tiṣṭhanti rājasāḥ /
jaghanyaguṇavṛtactisthā adho gacchanti tāmasāḥ //

devamānuṣatiryakṣu yadbhūtaṃ sacarācaram /
ādiprabhṛti saṃyuktaṃ vyāptamebhistribhirguṇaiḥ //

ataḥ paraṃ pravakṣyāmi mahadādīni liṅgataḥ /
vijñānaṃ ca vivekaśca mahato lakṣaṇaṃ bhavet //

mahānbuddhirmatiḥ prajñā nāmāni mahato viduḥ /
ahaṅkāraḥ sa vijñeyo lakṣaṇena samāsataḥ //

ahaṅkāreṇa bhūtānāṃ sargo nānāvidho bhavet /
ahaṅkāranivṛttirhi nirvāṇāyopapadyate //

khaṃ vāyuragniḥ salilaṃ pṛthivī ceti pañcamī /
mahābhūtāni bhūtānāṃ sarveṣāṃ prabhavāpyayau //

śabdaḥ śrotraṃ tathā khāni trayamākāśasambhavam /
sparśavatprāṇināṃ ceṣṭā pavanasya guṇāḥ smṛtāḥ //

rūpaṃ pākokṣiṇī jyotiścatvārastejaso guṇāḥ /
rasaḥ snehastathā jihvā śaityaṃ ca jalajā guṇāḥ //

gandho ghrāṇaṃ śarīraṃ ca pṛthivyāste guṇāstrayaḥ /
iti sarvaguṇā devi vikhyātāḥ pāñcabhautikāḥ //

guṇānpūrvasyapūrvasya prāpnuvantyuttarāṇi tu /
tasmānnaikaguṇāśceha dṛśyante būtasṛṣṭayaḥ //

upalabhyāpsu ye gandhaṃ kecidbrūyuranaipuṇāḥ /
apāṃ gandhaguṇaṃ prājñā necchanti kamalekṣaṇe //

tadgandhatvamapāṃ nāsti pṛthivyā eva tadguṇaḥ / bhūmirgandhe rase sneho jyotiścakṣuṣi saṃsthitam /
prāṇāpānāśrayoḥ vāyuḥ kheṣvākāśaḥ śarīriṇāṃ

keśāsthinakhadantatvakpāṇipādaśirāṃsi ca /
pṛṣṭhodarakaṭigrīvāḥ sarvaṃ bhūmyātmakaṃ smṛtam //

yatkiñcidapi kāye'smindhātudoṣamalāśritam /
tatsarvaṃ bhautikaṃ viddhi dehairevāsya svāmikam //

buddhīndriyāṇi karṇatvakcakṣurjihvā'tha nāsikā /
karmendriyāṇi vākpāṇipādau meḍhraṃ gudastathā //

śabdaḥ sparśaśca rūpaṃ ca raso gandhaśca pañcamaḥ /
buddhīndriyārthāñjānīyādbhūtebhyastvabhiniḥsṛtān //

vākyaṃ kriyā gatiḥ prītirutsargaśceti pañcadhā /
karmendriyārthāñjānīyātte ca bhūtodbhavā matāḥ //

indriyāṇāṃ tu sarveṣāmīśvaraṃ mana ucyate /
prārthanālakṣaṇaṃ tacca indriyaṃ tu manaḥ smṛtam //

niyuṅkte ca sadā tāni bhūtāni manasā saha /
niyame ca visarge ca manasaḥ kāraṇaṃ prabhuḥ //

indriyāṇīndriyārthāśca svabhāvaścetanā dhṛtiḥ /
bhūtābhūtavikāraśca śarīramiti saṃsmṛtam //

śarīrācca paro dehī śarīraṃ ca vyapāśritaḥ /
śarīriṇaḥ śarīrasya so'ntaraṃ vetti vai muniḥ //

rasaḥ sparśasca gandhaśca rūpaṃ śabdavivarjitam / aśarīraṃ śarīreṣu didṛkṣeta nirindriyam /

avyaktaṃ sarvadeheṣu martyeṣvamaramāśritam /
yaḥ paśyetparamātmānaṃ bandhanaiḥ sa vimucyate //

naivāyaṃ cakṣuṣāṃ grāhyo nāparairindriyairapi /
manasaiva pradīptena mahānātmā pradṛśyate //

sa hi sarveṣu bhūteṣu sthāvareṣu careṣu ca /
vasatyeko mahāvīryo nānābhāvasamanvitaḥ //

naiva cordhvaṃ na tiryakca nādhastānna kadācana /
indriyairiva buddhyā vā na dṛśyeta kadācana //

navadvāraṃ puraṃ gatvā sthito'sau niyato vaśī /
īśvaraḥ sarvalokeṣu sthāvarasya carasya ca //

tamevāhuraṇubhyo'ṇuṃ tu mahadbhyo mahattaram /
bahudhā sarvabhūtāni vyāpya tiṣṭhati śāśvatam //

kṣetrajñamekataḥ kṛtvā sarvaṃ kṣetramathaikataḥ /
evaṃ sa vimṛśejjñānī saṃyataḥ satataṃ hṛdi //

puruṣaḥ prakṛtistho hi bhuṅkte prakṛtijānguṇān /
akartā lepako nityo madhyasthaḥ sarvakarmaṇām //

kāryakāraṇakartṛtve hetuḥ prakṛtirucyate /
puruṣaḥ sukhaduḥkhānāṃ bhoktṛtve heturucyate //

ajayyo'yamacintyo'yamavyakto'yaṃ sanātanaḥ /
dehī tejomayo dehi tiṣṭhatītyapare viduḥ //

jñānamūṣmā ca vāyuśca śarīre jīvasañjñakaḥ /
ityete niścitā buddhyā tatraite buddhicintakāḥ //

apare sarvalokāṃśca vyāpya tiṣṭhantamīśvaram /
bruvate kecidatraiva tilatailavadāsthitam //

apare nāstikā mūḍhā hīnatvātsthūlalakṣaṇaiḥ /
nāstyātmeti viniścityāprajñāste nirayālayāḥ //

evaṃ nānāvidhā naiva vimṛśanti maheśvaram //
umovāca /

bhagavanbrāhmaṇo loke nityamakṣaramavyayam /
astyātmā sarvabhūteṣu hetustatra sudurgamaḥ //
maheśvara uvāca /

ṛṣibhiścāpi devaiśca vyaktameṣa na dṛśyate /
dṛṣṭvā tu taṃ mahātmānaṃ punastu na nivartate //

tasmāttaddarśanādeva vindate paramāṃ gatim / iti te kathito devi sāṅkhyadharmaḥ sanātanaḥ /
kapilādibhirācāryaiḥ sevitaḥ paramarṣibhiḥ //