Mahabharata · Chapter 13.234

etadarthamavāpnoti naraḥ pretya śubhekṣaṇe // umovāca /

lokasiddhaṃ tu yaddravyaṃ sarvasādhāraṇaṃ bhavet / tadadatsarvisāmānyaṃ kathaṃ dharmaṃ labhennaraḥ /
evaṃ sādhāraṇe dravye tasya svatvaṃ kathaṃ bhavet // maheśvara uvāca /

loke bhūtamayaṃ dravyaṃ sarvasādhāraṇaṃ tathā /
tathaiva taddadanmartyo labhetpuṇyaṃ sa tacchṛṇu //

dātā pratigrahītā ca deyaṃ sopakramaṃ tathā / deśakālau ca yattvetaddānaṃ ṣaṅguṇamucyate /
teṣāṃ sampadviśeṣāṃśca kīrtyamānānnibodha me //

ādiprabhṛti yaḥ śuddho manovākkāyakarmabhiḥ / satyavādī jitakrodhastvalubdho nābhyasūyakaḥ / śruddhāvānāstikaścaivaka evaṃ dātā praśasyate //

śudro dānto jitakrodhastathā dīnakulodbhavaḥ /
śrutacāritrasampannastathā bahukalatravān //

pañcayajñaparo nityaṃ nirvikāraśarīravān /
etānpātraguṇānviddhi tādṛkpātraṃ praśasyate //

pitṛdevāgnikāryeṣu tasya dattaṃ mahāphalam / yadyadarhati yo loke pātraṃ tasya bhavecca saḥ / mucyedāpada āpanno yena pātraṃ tadasya tu //

annasya kṣudhitaṃ pātraṃ tṛṣitastu jalasya vai /
evaṃ pātreṣu nānātvamiṣyate puruṣaṃ prati //

jāraścoraśca ṣaṇḍaśca hiṃsraḥ samayabhedakaḥ /
lokavighnakarāścānye varjitavyāḥ sarvaśaḥ priye //

paropaghātādyaddravyaṃ cauryādvā labhyate nṛbhiḥ /
nirdayāllabhyate yacca dhūrtabhāvena vai tathā //

adharmādarthamohādvā bahūnāmuparodhanāt /
yallabhyate dhanaṃ devi tadatyantavigarhitam //

tādṛśena kṛtaṃ dharmaṃ niṣphalaṃ viddhi bhāmini /
tasmānnyāyāgatenaiva dātavyaṃ śubhamicchatā //

yadyadātmapriyaṃ nityaṃ tattaddeyamiti sthitiḥ /
upakramamimaṃ viddhi dātṝṇāṃ paramaṃ hitam //

pātrabhūtaṃ tu dūrasthamabhigamya prasādya ca / dātā dānaṃ tathā dadyādyathā tuṣyeta tena saḥ / eṣa dānavidhaiḥ śreṣṭhaḥ samāhūya tu madhyamaḥ //

pūrvaṃ ca pātratāṃ jñātvā samāhūya nivedya ca /
śaucācamanasaṃyuktaṃ dātavyaṃ śraddhayā priye //

yācitṝṇāṃ tu paramamābhimukhyaṃ puraskṛtam /
sammānapūrvaṃ saṅgrāhyaṃ dātavyaṃ deśakālayo //

apātrebhyopi cānyebhyo dātavyaṃ bhūtimicchatā // pātrāṇi samparīkṣyaiva dātrā vai nāmamātrayā /

atiśaktayā paraṃ dānaṃ yathāśakti tu madhyamam /
tṛtīyaṃ cāparaṃ dānaṃ nānurūpamivātmanaḥ //

yathā sambhāṣitaṃ pūrvaṃ dātavyaṃ tattathaiva ca / puṇyikṣetreṣu yaddattaṃ puṇyakāleṣu vā yathā / tacchobhanataraṃ viddhi gauravāddeśakālayoḥ // umovāca /

yaśca puṇyatamo deśastathā kālaśca śaṃsa me // maheśvara uvāca /

kurukṣetraṃ mahānanyo yaśca devarṣisevitaḥ / girirvaraśca tīrthāni deśabhāgeṣu pūjitaḥ /
grahītumīpsito yatra tatra dattaṃ mahāphamal //

śaradvasantakālaśca puṇyamāsastathaiva ca /
śuklapakṣaśca pakṣāṇāṃ paurṇamāsī ca parvasu //

pitṛdaivatanakṣatranirmalo divasastathā /
tacchobhanataraṃ viddhi candrasūryagrahe tathā //

pratigrahīturyaḥ kālo manasā kīrtitaḥ śubhe /
evamādiṣṭakāleṣu dattaṃ dānaṃ mahadbhavet //

dātā deyaṃ ca pātraṃ ca upakramayutā kriyā /
deśakālaṃ tathā teṣāṃ sampacchuddhiḥ prakīrtitā //

yathaiva yugapatsampattatra dānaṃ mahadbhavet //

atyalpamapi yaddānamebhiḥ ṣaḍbhirguṇairyutam /
bhūtvā'nantaṃ nayetsvargaṃ dātāraṃ doṣavarjitam //

sumahadvā'pi yaddānaṃ guṇairebhirvinākṛtam / atyalpaphalaniryogamaphalaṃ vā phaloddhatam // umovāca /

evanguṇayutaṃ dānaṃ dattaṃ ca phalatāṃ vrajet / tadasti cenmahaddeyaṃ tanme śaṃsitumarhasi // maheśvara uvāca /

tadapyasti mahābhāge narāṇāṃ bhāvadoṣataḥ //

kṛtvā dharmaṃ tu vidhivatpaścāttāpaṃ karoti cet /
ślāghayā vā yadi brūyādvṛthā saṃsadiṃ yatkṛtam //

prakalpayecca manasā tatphalaṃ pretyabhāvataḥ / karma dharmakṛtaṃ yacca satataṃ phalakāṅkṣayā / etatkṛtaṃ vā dattaṃ vā paratra viphalaṃ bhavet //

ete doṣā vivarjyāśca dātṛbhiḥ puṇyakāṅkṣibhiḥ /
sanātanamidaṃ vṛttaṃ sadbhirācaritaṃ tathā //

anugrahātpareṣāṃ tu gṛhasthānāmṛṇaṃ hi tat /
ityevaṃ mana āviśya dātavyaṃ satataṃ budhaiḥ //

evameva kṛtaṃ nityaṃ sukṛtaṃ tadbhavenmahat /
sarvasādhāraṇaṃ dravyamevaṃ dattvā mahatphalam //