Mahabharata · Chapter 13.229

bhagavansarvalokeśa tripurārdana śaṅkara /
kīdṛśā yamadaṇḍāste kīdṛśāḥ paricārakāḥ //

kathaṃ mṛtāste gacchanti prāṇino yamasādanam / kīdṛśaṃ bhavanaṃ tasya kathaṃ daṇḍayati prajāḥ /
etatsarvaṃ mahādeva śrotumicchāmyahaṃ prabho //
maheśvara uvāca /

śṛṇu kalyāṇi tatsarvaṃ yatte devi manaḥpriyam /
dakṣiṇasyāṃ diśi śubhe yamasya sadanaṃ mahat //

vicitraṃ ramaṇīyaṃ ca nānābhāvasamanvitam /
pitṛbhiḥ pretasaṅghaiśca yamadūtaiśca santatam //

prāṇisaṅghaiśca bahubhiḥ karmavaśyaiśca pūritam /
tatrāste daṇḍayannityaṃ yamo lokahite rataḥ //

māyayā satataṃ vetti prāṇināṃ yacchubhāśubham /
māyayā saṃharaṃstatra prāṇisaṅghānyatastataḥ //

tasya māyāmayāḥ pāśā na vedyante surāsuraiḥ /
ko hi mānuṣamātrastu devasya caritaṃ mahat //

evaṃ saṃvasatastasya yamasya paricārakāḥ / gṛhītvā sannayantyeva prāṇinaḥ kṣīṇakarmaṇaḥ /
yana kenāpadeśena tvapadeśasamudbhavāḥ //

karmaṇā prāṇino loke uttamādhamamadhyamāḥ /
yathārhaṃ tānsamādāya nayanti yamasādanam //

dhārmikānuttamānviddhi svargiṇaste yathā'marāḥ / triṣu janma labhante ye karmaṇā madhyamāḥ smṛtāḥ /
tiryaṅanarakagantāro hyadhamāste narādhamāḥ //

panthānastrividhā dṛṣṭāḥ sarveṣāṃ gatajīvinām /
ramaṇīyaṃ nirābādhaṃ durdarśamiti nāmataḥ //

ramaṇīyaṃ tu yanmārgaṃ patākādhvajasaṅkulam /
dhūpitaṃ siktasammṛṣṭaṃ puṣpamālābhisaṅkulam //

manoharaṃ sukhasparśaṃ gacchatāmeva tadbhavet /
nirābādhaṃ yathālokaṃ supraśastaṃ kṛtaṃ bhavet //

tṛtīyaṃ yattu durdarśaṃ durgandhi tamasā vṛtam / paruṣaṃ śarkarākīrṇaṃ śvadaṃṣṭrābahulaṃ bhṛśam /
kimikīṭasamākīrṇaṃ bhajatāmatidurgamam //

mārgairevaṃ tribhirnityamuttamādhamamadhyamān /
sannayanti yathā kāle tanme śṛṇu śucismite //

uttamānantakāle tu yamadūtāḥ susaṃvṛtāḥ /
nayanti sukhamādāya ramaṇīyapathena vai //
umovāca /

bhagavaṃstatra cātmānaṃ tyaktadehaṃ nirāśrayam /
adṛśyaṃ kathamādāya sannayanti yamāntikam //
maheśvara uvāca /

śṛṇu bhāmini tatsravaṃ trividhaṃ dehakāraṇam /
karmavaśyaṃ bhogavaśyaṃ duḥkhavaśyamiti priye //

mānuṣaṃ karmavaśyaṃ syāddvitīyaṃ bhogasādhanam / tṛtīyaṃ yātanāvaśyaṃ śarīraṃ māyayā kṛtam /
yamaloke na cānyatra dṛśyate yātanāyutam //

śarīrairyātanāvaśyairjīvānāmucya bhāmini /
nayanti yāmikāstatra prāṇino māyayā mṛtān //

madhyamānyodhaveṣeṇa madhyamena pathā tathā //

caṇḍālaveṣāstvadhamāngṛhītvā bhartsatarjanaiḥ /
ākarṣantastathā pāśairdurdarśena nayanti tān //

trividhānevamādāya nayanti yamasādanam /
dharmāsanagataṃ dakṣaṃ bhrājamānaṃ svatejasā //

lokapālaṃ sahādhyakṣaṃ tathaiva pariṣadgatam / darśayanti mahābhāge yāmikāstaṃ nivedya te // pūjayandaṇḍayankāṃścitteṣāṃ śṛṇvañśubhāśubham /
vyāhṛto bahusāhasraistatrāste satataṃ yamaḥ //

gatānāṃ tu yamasteṣāmuttamānabhipūjayā / abhisaṅgṛhya vidhivatpṛṣṭvā svāgatakauśalam /
prastutya tatkṛtaṃ teṣāṃ lokaṃ sandiśate yamaḥ //

yamenaivamanujñātā yānti paścāttriviṣṭapam //

madhyamānāṃ yamasteṣāṃ śrutvā karma yathātatham /
jāyantāṃ mānuṣeṣveva iti sandiśate ca tān //

adhamānpāśasaṃyuktānyamo nāvekṣate gatān / yamasya puruṣā ghorāścaṇḍālasamadarśanāḥ /
yātanāḥ prāpayantyetām̐llokapālasya śāsanāt //

bhindantaśca tudantaśca prakarṣanto yatastataḥ /
krośantaḥ pātayantyetānmitho garteṣvavāṅmukhān //

saṃyāminyaḥ śilāsteṣāṃ patanti śirasi priye /
ayomukhāḥ kaṅkavalā bhakṣayanti sudāruṇāḥ //

asipatravane ghore cārayanti tathā parān /
tīkṣṇadaṃṣṭrāstathā śvānaḥ kāṃścittatra hyadanti vai //

tatra vaitaraṇī nāma nadī grāhasamākulā / duṣpraveśā ca ghorā ca mūtraśoṇitavāhinī /
tasyāṃ sammajjayantyete tṛṣitānpāyayanti tān //

āropayanti vai kāṃścittatra kaṇṭakaśalmalīm /
yantracakreṣu tilavatpīḍyante tatra kecana //

aṅgareṣu ca dahyante tathā duṣkṛtakāriṇaḥ /
kumbhīpākeṣu pacyante pacyante sikatāsu vai //

pāṭyante taruvacchastraiḥ pāpinaḥ krakacādibhiḥ /
bhidyante bhāgaśaḥ śūlaistudyante sūkṣmasūcibhiḥ //

evaṃ tvayā kṛtaṃ doṣaṃ tadarthaṃ daṇḍanaṃ tviti /
vācaiva ghoṣayanti sma daṇḍamānāḥ samantataḥ //

evaṃ te yātanāṃ prāpya śarīrairyātanāśayaiḥ /
prasahantaśca tadduḥkhaṃ smarantaḥ svāparādhajam //

krośantaśca rudrantaśca na mucyante kathañcana /
smarantastatra tapyante pāpamātmakṛtaṃ bhṛśam //

evaṃ bahuvidhā daṇḍā bhujyante pāpakāribhiḥ /
yātanābhiśca pacyante narakeṣu punaḥ punaḥ //

apare yātanāṃ bhuktvā mucyante tatra kilbiṣāt / pāpadoṣakṣayakarā yātanāḥ saṃsmṛtā nṛṇām /
bahutaptaṃ yathā lohamamalaṃ tattathā bhavet //