Mahabharata · Chapter 13.222

bhagavandevadeveśa śūlapāṇe vṛṣadhvaja / puṃścalya iva yā strīṣu nīcavṛttiratāḥ smṛtāḥ /
kena karmavipākena tanme śaṃsitumarhasi //
maheśvara uvāca /

yāḥ purā manujā devi buddhimohasamanvitāḥ /
kāmarāgasamāyuktāḥ patīnaticaranti vai //

pratikūlaparā yāstu patīnprati yathā tathā /
śaucaṃ lajjāṃ tu vismṛtya yatheṣṭaparicāraṇāḥ //

evaṃyuktasamācārā yamaloke sudaṇḍitāḥ / yadi vai mānuṣaṃ janma labheraṃstāstathāvidhāḥ /
bahusādhāraṇā eva puṃścalyaśca bhavanti tāḥ //

pauścalyaṃ yattu tadvṛttaṃ strīṇāṃ kaṣṭatamaṃ smṛtam /
tataḥprabhṛti tā devi patantyeva na saṃśayaḥ //

śocanti cettu tadvṛttaṃ manasā hitamāpnuyuḥ //
umovāca /
bhagavandevadeveśa pramadā vidhavā bhṛśam /

dṛśyante mānuṣā loke sarvakalyāṇavarjitāḥ /
kena karmavipākena tanme śaṃsitumarhasi //
maheśvara uvāca /

yāḥ purā manujā devi buddhimohasamanvitāḥ /
kuṭumbaṃ tatra ve patyurnāśayanti vṛthā tathā //

viṣadāścāgnidāścaiva patīnprati sunirdayāḥ /
anyāsāṃ hi patīnyānti svapatidveṣakāraṇāt //

evaṃyuktasamācārā yamaloke sudaṇḍitāḥ / nirayasthāściraṃ kālaṃ kathañcitprāpya mānuṣam /
tatra tā bhogarahitā vidhavāstu bhavanti vai //
umovāca /

bhagavanpramadā loke patyau jñātiṣu satsuca / liṅginyaḥ sampradṛśyante pāṣaṇḍaṃ matamāśritāḥ /
kena karmavipākena tanme śaṃsitumarhasi //
maheśvara uvāca /

yāḥ purā bhāvadoṣeṇi lobhamohasamanvitāḥ /
paradravyaparā lobhātpareṣāṃ dravyahārakāḥ //

abhyasūyāparā yāstu sapatnīnāṃ pradūṣakāḥ /
īrṣyāparāḥ kopanāśca bandhūnāṃ viphalāḥ sadā //

evaṃyuktasamācārāḥ punarjanmani tāḥ striyaḥ / alakṣaṇasamāyuktāḥ pāṣaṇḍaṃ dharmamāśritāḥ /
striyaḥ pravrājaśīlāśca bhavantyeva na saṃśayaḥ //
umovāca /

bhagavanmānuṣāḥ kecitkāruvṛttisamāśritāḥ / pradṛśyante manuṣyeṣu nīcakarmaratāstathā /
kena karmavipākena tanme śaṃsitumarhati //
maheśvara uvāca /

ye purā manujā devi stabdhamānayutā bhṛśam /
darpāhaṅkārasaṃyuktāḥ kevalātmaparāyaṇāḥ //

tādṛśā mānuṣā devi punarjanmani śobhane /
kātvo naṭagandharvāḥ sambhavanti yathā tathā //

nāpitā bandinaścaiva tathā vaitālikāḥ priye /
evambhūtāstvadhovṛttiṃ jīvantyāśritya mānavāḥ //

paraprasādhanakarāste paraiḥ kṛtavetanāḥ /
parāvamānasya phalaṃ bhuñjate paurvadaihikam //
umovāca /

bhagavandevadeveśa mānuṣeṣveva kecana /
dāsabhūtāḥ pradṛśyante sarvakarmaparā bhṛśam //

āghātabhartsanasahāḥ pīḍyamānāśca sarvaśaḥ /
kena karmavipākena tanme śaṃsitumarhasi //
maheśvara uvāca /

tadahaṃ te pravakṣyāmi śṛṇu kalyāṇi kāraṇam //

ye purā manujā devi pareṣāṃ vittahārakāḥ /
ṛṇavṛddhikaraṃ kṛṣyā nyāsadattaṃ tathaiva ca //

nikṣepakāraṇāddattaparadravyāpahāriṇaḥ /
pramādādvismṛtaṃ naṣṭaṃ pareṣāṃ dhanahārakāḥ //

vadhabandhaparikleśairdāsatvaṃ kurvate parān /
tādṛśā maraṇaṃ prāptā daṇḍitā yamaśāsanaiḥ //

kathañcitprāpya mānuṣyaṃ tatra te devi sarvathā /
dāsabhūtā bhaviṣyanti janmaprabhṛti mānavāḥ //

teṣāṃ karmāṇi kurvanti yeṣāṃ te dhanahārakāḥ /
āsamāpteḥ svapāpasya kurvantīti viniścayaḥ //

paśubhūtāstathā cānye bhavanti dhanahārakāḥ / tattathā kṣīyate karma teṣāṃ pūrvāparādhajam /
ato'nyathā na tacchakyaṃ karma bhoktuṃ surāsuraiḥ //

kintu mokṣavidhisteṣāṃ sarvatā tatprasādanam /
ayathāvanmokṣakāmaḥ punarjanmani ceṣyate //

mokṣakāmī yathānyāyaṃ kurvankarmāṇi sarvaśaḥ /
bhartuḥ prasādamākāṅkṣedāyāsānsarvathā sahan //

prītipūrvaṃ tu yo bhartrā mukto muktaḥ svapāpataḥ /
tathābhūtānkarmakarānsadā santoṣayetpatiḥ //

yathārhaṃ kārayetkarma daṇḍakāraṇataḥ kṣipet /
vṛddhānbālāṃstathā kṣīṇānpālayandharmamāpnuyāt //

iti te kathitaṃ devi bhūyaḥ śrotuṃ kimicchasi //