Mahabharata · Chapter 13.212

devadeva namastubhyaṃ tryakṣa bho vṛṣabhadhvaja /
śrutaṃ me bhagavansarvaṃ tvatprasādānmaheśvara //

saṅgṛhītaṃ mayā tacca tava vākyamanuttamam /
idānīmasti sandeho mānuṣeṣviha kaścana //

tulyaprāṇaśiraḥkāyo rājā'yamiti mṛśyate /
kena karmavipākena sarvaprādhānyamarhati //

sa cāpi daṇḍayanmartyānbhartsayanvidhamannapi / pretyabhāve kathaṃ lokām̐llabhate puṇyakarmaṇā /
rājavṛttamahaṃ tasmācchrotumicchāmi mānada //
maheśvara uvāca /

tadahaṃ te pravakṣyāmi rājadharmaṃ śubhānane //

rājāyattaṃ hi yatsarvaṃ lokavṛttaṃ śubhāśubham /
mahatastapaso devi phalaṃ rājyamiti smṛtam //

tapodānamayaṃ rājyaṃ paraṃ sthānaṃ vidhīyate /
tasmādrājñaḥ sadā martyāḥ praṇamanti yatastataḥ //

nyāyatastvaṃ mahābhāge śrotukāmā'si bhāmini /
tasmāttasyaiva caritaṃ jagatpathyaṃ śṛṇu priye //

arājake purā tvāsītprajānāṃ saṅkulaṃ mahat / tadṛṣṭvā saṅkulaṃ brahmā manuṃ rājye nyavedayat /
tadāprabhṛti sandṛṣṭaṃ rājñāṃ vṛttaṃ śubhāśubham //

tanme śṛṇu varārohe tasya pathyaṃ jagaddhitam /
yathā pretya labhetsvargaṃ yathā vīryaṃ yaśastathā //

pitryaṃ vā bhūtapūrvaṃ vā svayamutpādya vā punaḥ /
rājyadharmamanuṣṭhāya vidhivadbhoktumarhati //

ātmānameva prathamaṃ vinayairupapādayet /
anu bhṛtyānprajāḥ paścādityeṣa vinayakramaḥ //

svāminaṃ coṣamāṃ kṛtvā prajāstadvṛttakāṅkṣayā /
svayaṃ vinayasampannā bhavantīha śubhekṣaṇe //

svasmātpūrvatarā rājā vinayatyeva vai prajāḥ /
apahāsyo bhavettādṛksvadoṣasyānavekṣaṇāt //

vidyābhyāsairvṛddhayogairātmānaṃ vinayaṃ nayet /
vidyā dharmārthaphalinī tadvido vṛddhasañjñitāḥ //

indriyāṇāṃ jayo devi ata ūrdhvamudāhṛtaḥ /
ajaye sumahāndoṣo rājānaṃ vinipātayet //

pañcaiva svavaśe kṛtvā tadarthānpañca śoṣayet / ṣaḍutsṛjya yathāyogaṃ jñānena vinayena ca /
sāstracakṣurnayaparo bhūtvā bhṛtyānsamāharet //

vṛttaśrutakulopetānupadhābiḥ parīkṣitān / amātyānupadhātītānsopasarpāñjitendriyān /
yojayeta yathāyogaṃ yathārhaṃ sveṣu karmasu //

amātyā buddhisampannā rāṣṭraṃ bahujanapriyam /
durādharṣaṃ puraśreṣṭhaṃ kośaḥ kṛcchrasahaḥ smṛtaḥ //

anuraktaṃ balaṃ sāmnāmadvaidhaṃ mantrameva ca / etāḥ prakṛtayaḥ sveṣu svāmī vinayatatvavit /

prajānāṃ rakṣaṇārthāya sarvametadvinirmitam /
ābhiḥ karaṇabhūtābhiḥ kuryāllokahitaṃ nṛpaḥ //

ātmarakṣā narendrasya prajārakṣārthamiṣyate /
tasmātsatatamātmānaṃ saṃrakṣedapramādavān //

bhojanācchādanasnānādbahirniṣkramaṇādapi /
nityaṃ strīgaṇasaṃyogādrakṣedātmānamātmavān //

svebhyaścaiva parebhyaśca śaśtrādapi viṣādapi /
satataṃ putradārebhyo rakṣedātmānamātmavān //

sarvebhya eva sthānebhyo rakṣedātmānamātmavān /
prajānāṃ rakṣaṇārthāya prajāhitakaro bhavet //

prajākāryaṃ tu tatkāryaṃ prajāsaukhyaṃ tu tatsukham / prajāpriyaṃ priyaṃ tasya svahitaṃ tu prajāhitam /
prajārtaṃ tasya sarvasvamātmārthaṃ na vidhīyate /

prakṛtīnāṃ hi rakṣārthaṃ rāgadveṣau vyudasya ca / ubhayoḥ pakṣayorvādaṃ śrutvā caiva yathātatham /
tamarthaṃ vimṛśedbuddhyā svayamātatvadarśanāt //

tatvavidbhiśca bahubhirvṛddhaiḥ saha narottamaiḥ /
kartāramaparādhaṃ ca deśakālau nayānayau //

jñātvā samyagyathāśāstraṃ tato daṇḍaṃ nayennṛṣu /
evaṃ kurvaṃllabheddharmaṃ pakṣapātavivarjanāt //

pratyakṣāptopadeśābhyāmanumānena vā punaḥ /
boddhavyaṃ satataṃ rājñā deśavṛttaṃ śubhāśubham //

cāraiḥ karmapravṛttyā ca tadvijñāya vicārayet /
aśubhaṃ nirharetsadyo joṣayecchubhamātmanaḥ //

garhyānvigarhayedeva pūjyānsampūjayettathā /
daṇḍyāṃśca daṇḍayeddevi nātra kāryā vicāraṇā //

pañcāvekṣansadā mantraṃ kuryādbuddhiyutairnaraiḥ /
kulavṛttaśrutopetairnityaṃ mantraparo bhavet //

kāmakāreṇa vai mukhyairna ca mantramanā bhavet /
rājā rāṣṭrahitāpekṣaṃ satyadharmāṇi kārayet //

sarvodyogaṃ svayaṃ kuryāddurgādiṣu sadā nṛṣu /
deśavṛddhikarānbhṛtyānapramādena kārayet //

deśakṣayakarānsarvānapriyāṃśca vivarjayet /
ahanyahani sampaśyedanujīvigaṇaṃ svayam //

sumukhaḥ supriyo dattvā samyagvṛttaṃ samācaret /
adharmyaṃ paruṣaṃ tīkṣṇaṃ vākyaṃ vaktuṃ na cārhati //

asaṃviśvāsya vacanaṃ vaktuṃ satsu na cārhati /
narenare guṇāndoṣānsamyagveditumarhati //

sveṅgitaṃ vṛṇuyāddhairyaṃ na kuryātkṣudrasaṃvidam /
pareṅgitajño lokeṣu bhūtvā saṃsargamācaret //

svataśca parataścaiva parasparabhayādapi /
amānuṣabhayebhyaśca svāḥ prajāḥ pālayennṛpaḥ //

lubdhāḥ kaṭhorāścāpyasya mānavā dasyuvṛttayaḥ /
nigrāhyā eva te rājñā saṅgṛhītvā yatastataḥ //

kumārānvinayodbodhairjanmaprabhṛti yojayet /
teṣāmātmaguṇopetaṃ yauvarājyena yojayet //

prakṛtīnāṃ yathā na syādrājyabhraṃśo bhavedbhayam /
etatsañcintayennityaṃ tadvidhānaṃ tathārhati //

arājakaṃ kṣaṇamapi rājyaṃ na syāddhi śobhane /
ātmano'nuvidhānāya yauvarājyaṃ sadeṣyate //

kulajānāṃ ca vaidyānāṃ śrotriyāṇāṃ tapasvinām /
anyeṣāṃ vṛttiyuktānāṃ viśeṣaṃ kartumarhati //

ātmārthaṃ rājyatantrārthaṃ kośārthaṃ ca samācaret /
durgādrāṣṭrātsamudrācca vaṇigbhyaḥ puruṣātyayāt //

parātmaguṇasārābhyāṃ bhṛtyapoṣaṇamācaret /
vāhanānāṃ prakurvīta poṣaṇaṃ yodhakarmasu //

sādaraḥ satataṃ bhūtvā avekṣāvratamācaret /
caturdā vibhajetkośaṃ dharmabhṛtyātmakāraṇāt //

āpadarthaṃ ca nītijño deśakālavaśena tu /
anāthānvyathitānvṛddhānsve deśe poṣayennṛpaḥ //

sandhiṃ ca vigrahaṃ caiva tadviśeṣāṃstathā pāran /
yathāvatsaṃvimṛśyaiva buddhipūrvaṃ samācaret //

sarveṣāṃ sampriyo bhūtvā maṇḍalaṃ satataṃ caret /
śubheṣvapi ca kāryeṣu ca caikāntaḥ samācaret //

svataśca parataścaiva vyasanāni vimṛśya saḥ /
pareṇi dhārmikānyogānnātīyāddveṣalobhataḥ //

rakṣyatvaṃ vai prajādharmaḥ kṣatradharmastu rakṣaṇam /
kunṛpaiḥ pīḍitāstasmātprajāḥ sarvatra pālayet //

yātrākāle'navekṣyaiva paścātkopaphalodayaḥ /
tadyuktāścāpadaścaiva śāsanāditi cintayet //

vyasanebhyo balaṃ rakṣennayato vyayatopi vā /
prāyaśo varjayedyuddhaṃ prāṇarakṣaṇakāraṇāt //

kāraṇādevi yoddhavyaṃ nātmanaḥ paradoṣataḥ /
suyuddhe prāṇamokṣaśca tasya dharmāya iṣyate //

abhiyukto balavatā kuryādāpadvidhiṃ nṛpaḥ /
anunīya tathā sarvānprajānāṃ hitakāraṇāt //

anyaprakṛtiyuktānāṃ rājñāṃ vṛttivicāriṇām /
anyāṃścāpatprapannānāṃ na tānsaṃyoktumarhati //

śubhāśubhaṃ yadā devi vrataṃ tūbhayasādhanam / ātmaiva tacchubhaṃ kuryādaśubhaṃ yojayetparān /

evamuddeśataḥ proktamalepatvaṃ yathā bhavet /
eṣa devi samāsena rājadharmaḥ prakīrtitaḥ //

evaṃ saṃvartamānastu daṇḍayanbhartsayanprajāḥ /
niṣkalmaṣamavāpnoti padmapatramivāmbhasā //

evaṃ saṃvartamānasya kāladharmo yadā bhavet /
svargaloke tadā rājā tridaśaiḥ saha toṣyate //

dvividhaṃ rājyavṛttaṃ ca nyāyabhāgyasamanvitam /
evaṃ nyāyānugaṃ vṛttaṃ kathitaṃ te śubhekṣaṇe //

rājyaṃ nyāyānugaṃ tāta buddhiśāstrānugaṃ bhavet /
dharmyaṃ pathyaṃ yaśasyaṃ ca svargyaṃ caiva tathā bhavet //

rājyaṃ bhāgyānugaṃ nāma ayathāvatpradṛśyate / tattu śāstravinirmuktaṃ satāṃ kopakaraṃ bhavet /
adharmyamayaśasyaṃ ca durantaṃ ca bhaveddhruvam //

yatra svacchandataḥ sarvaṃ kriyate karma rājabhiḥ /
tatra bhāgyavaśādbhṛtyā labhante na viśeṣataḥ //

yatra daṇḍyā na daṇḍyante pūjyante vā narādhamāḥ /
yatra santopi hanyante tatra bhāgyānugaṃ bhavet //

śubhāśubhaṃ yathā yatra viparītaṃ pradṛśyate /
rājñi cāsurapakṣe tu tatra bhāgyānugaṃ bhavet //

bhāgyānuge tu rājāno vartamānā yathātathā /
prāpyākīrtimanarthaṃ ca iha loke śubhekṣaṇe //

paratra sumahāghoraṃ tamaḥ prāpya duratyayam /
tiṣṭhanti narake devi pralayāntāditi sthitiḥ //

mokṣaṃ duṣkṛtināṃ cāpi vidyate kālaparyayāt /
nāstyeva mokṣaṇaṃ devi rājñāṃ duṣkṛtikāriṇām //

etatsarvaṃ samāsena rājavṛttaṃ śubhāśubham /
kathitaṃ te mahābhāge bhūyaḥ śrotuṃ kimicchasi //