Mahabharata · Chapter 13.198

ke bhojyā brāhmaṇasyeha ke bhojyāḥ kṣatriyasya ha /
tathā vaiśyasya ke bhojyāḥ ke śūdrasya ca bhārata //
bhīṣma uvāca /

brāhmaṇā brāhmaṇasyeha bhojyā ye caiva kṣatriyāḥ /
vaiśyāścāpi tathā bhojyāḥ śūdrāśca parivarjitāḥ //

brāhmaṇāḥ kṣatriyā vaiśyā bhojyā vai kṣatriyasya ha /
varjanīyāstu vai śūdrāḥ sarvabhakṣā vikarmiṇaḥ //

vaiśyāstu bhojyā viprāṇāṃ kṣatriyāṇāṃ tathaiva ca /
nityāgnayo viviktāśca cāturmāsyaratāśca ye //

śūdrāṇāmatha yo bhuṅkte sa bhuṅkte pṛthivīmalam /
malaṃ nṛṇāṃ sa pibati malaṃ bhuṅkte janasya ca //

śūdrāṇāṃ yastathā bhuṅkte sa bhuṅkte pṛthivīmalam /
pṛthivīmalamaśnanti ye dvijāḥ śūdrabhojinaḥ //

śūdrasya karmaniṣṭhāyāṃ vikarmasthopi pacyate /
brāhmaṇaḥ kṣatriyo vaiśyo vikarmasthaśca pacyate //

svādhyāyaniratā viprāstathā svastyayane nṛṇām /
rakṣaṇe kṣatriyaṃ prāhurvaiśyaṃ puṣṭyarthameva ca //

karoti karma yadvaiśyastadgatvā hyupajīvati /
kṛṣigorakṣyavāṇijyamakutsā vaiśyakarmaṇi //

śūdrakarma tu yaḥ kuryādavahāya svakarma ca /
sa vijñeyo yathā śūdro na ca bhojyaḥ kadācana //

cikitsakaḥ kāṇḍapṛṣṭhaḥ purā'dhyakṣaḥ purohitaḥ /
sāṃvatsaro vṛthādhyāyī sarve te śūdrasammitāḥ //

śūdrakarmasvathaiteṣu yo bhuṅkte nirapatrapaḥ /
abhojyabhojanaṃ bhuktvā bhayaṃ prāpnoti dāruṇam //

kulaṃ vīryaṃ ca tejaśca tiryagyonitvameva ca /
sa prayāti yathā śvā vai niṣkriyo dharmavarjitaḥ //

bhuṅkte cikitsakasyānnaṃ tadannaṃ ca purīṣavat /
puṃścalyannaṃ ca mūtraṃ syātkārukānnaṃ ca śoṇitam //

vidyopajīvino'nnaṃ ca yo bhuṅkte sādhusammataḥ /
tadapyannaṃ yathā śaudraṃ tatsādhuḥ parivarjayet //

vacanīyasya yo bhuṅkte tamāhuḥ śoṇitaṃ hradam /
piśunaṃ bhojanaṃ bhuṅkte brahmahatyāsamaṃ viduḥ //

asatkṛtamavajñātaṃ na bhoktavyaṃ kadācana //

vyādhiṃ kulakṣayaṃ caiva kṣipraṃ prāpnoti brāhmaṇaḥ /
nagarīrakṣiṇo bhuṅkte śvapacapravaṇo bhavet //

goghne ca brāhmaṇaghne ca surāpe gurutalpage /
bhuktvā'nnaṃ jāyate vipro rakṣasāṃ kulavardhanaḥ //

nyāsāpahāriṇo bhuktvā kṛtaghne klībavartini /
jāyate śabarāvāse madhyadeśabahiṣkṛte //

abhojyāścaiva bhojyāśca mayā proktā yathāvidhi / kimanyadadya kaunteya mattastvaṃ śrotumicchasi // ] //