Mahabharata · Chapter 13.197

mamāpyanumato dharmastaṃ śṛṇudhvaṃ samāhitāḥ /
nīlaṣaṇḍasya śṛṅgābhyāṃ gṛhītvā mṛttikāṃ tu yaḥ //

abhiṣekaṃ tryahaṃ kuryāttasya dharmaṃ nibodhata /
śodhayedaśubhaṃ sarvamādhipatyaṃ paratra ca //

yāvacca jāyate martyastāvacchūro bhaviṣyati /
idaṃ cāpyaparaṃ guhyaṃ sarahasyaṃ nibodhata //

pragṛhyaudumbaraṃ pātraṃ pakvānnaṃ madhunā saha /
somasyottiṣṭhamānasyi paurṇamāsyāṃ baliṃ haret //

tasya dharmaphalaṃ nityaṃ śraddadhānā nibodhata / sādhyā rudrāstathā'dityā viśvedevāstathā'śvinau

maruto vasavaścaiva pratigṛhṇanti taṃ balim /
somaśca vardhate tena samudraśca mahodadhiḥ //

eṣa dharmo mayoddiṣṭaḥ sarahasyaḥ sukhāvahaḥ //
viṣṇuruvāca /

dharmaguhyāni sarvāṇi devatānāṃ mahātmanām /
ṛṣīṇāṃ caiva guhyāni yaḥ paṭhedāhnikaṃ sadā //

śṛṇuyādvā'nasūyuryaḥ śraddadhānaḥ samāhitaḥ /
nāsya vighnaḥ prabhavati bhayaṃ cāsya na vidyate //

ye ca dharmāḥ śubhāḥ puṇyāḥ sarahasyā udāhṛtāḥ /
teṣāṃ dharmaphalaṃ tasya yaḥ paṭheta jitendriyaḥ //

nāsya pāpaṃ prabhavati na ca pāpena lipyate /
paṭhedvā śrāvayedvā'pi śrutvā vā labhate phalam //

bhuñjate pitaro devā havyaṃ kavyamathākṣayam /
śrāvayaṃścāpi viprendrānparvasu prayato naraḥ //

ṛṣīṇāṃ devatānāṃ ca pitṝṇāṃ caiva nityadā /
bhavatyabhimataḥ śrīmāndharmeṣu prayataḥ sadā //

kṛtvā'pi pāpakaṃ karma mahāpātakavarjitam /
rahasyadharmaṃ śrutvemaṃ sarvapāpaiḥ pramucyate //
bhīṣma uvāca /

etaddharmarahasyaṃ vai devatānāṃ narādhipa /
vyāsoddiṣṭaṃ mayā proktaṃ sarvadevanamaskṛtam //

pṛthivī ratnasampūrṇā jñānaṃ cedamanuttamam /
idameva tataḥ śrāvyamiti manyeta dharmavit //

nāśraddadhānāya na nāstikāya na naṣṭadharmāyi na nirghṛṇāya /
na hetuduṣṭāya gurudviṣe vā nānātmabhūtāya nivedyametat //