મહાભારત · અધ્યાય 13.197

મમાપ્યનુમતો ધર્મસ્તં શૃણુધ્વં સમાહિતાઃ ।
નીલષણ્ડસ્ય શૃઙ્ગાભ્યાં ગૃહીત્વા મૃત્તિકાં તુ યઃ ॥

અભિષેકં ત્ર્યહં કુર્યાત્તસ્ય ધર્મં નિબોધત ।
શોધયેદશુભં સર્વમાધિપત્યં પરત્ર ચ ॥

યાવચ્ચ જાયતે મર્ત્યસ્તાવચ્છૂરો ભવિષ્યતિ ।
ઇદં ચાપ્યપરં ગુહ્યં સરહસ્યં નિબોધત ॥

પ્રગૃહ્યૌદુમ્બરં પાત્રં પક્વાન્નં મધુના સહ ।
સોમસ્યોત્તિષ્ઠમાનસ્યિ પૌર્ણમાસ્યાં બલિં હરેત્ ॥

તસ્ય ધર્મફલં નિત્યં શ્રદ્દધાના નિબોધત । સાધ્યા રુદ્રાસ્તથાઽદિત્યા વિશ્વેદેવાસ્તથાઽશ્વિનૌ

મરુતો વસવશ્ચૈવ પ્રતિગૃહ્ણન્તિ તં બલિમ્ ।
સોમશ્ચ વર્ધતે તેન સમુદ્રશ્ચ મહોદધિઃ ॥

એષ ધર્મો મયોદ્દિષ્ટઃ સરહસ્યઃ સુખાવહઃ ॥
વિષ્ણુરુવાચ ।

ધર્મગુહ્યાનિ સર્વાણિ દેવતાનાં મહાત્મનામ્ ।
ઋષીણાં ચૈવ ગુહ્યાનિ યઃ પઠેદાહ્નિકં સદા ॥

શૃણુયાદ્વાઽનસૂયુર્યઃ શ્રદ્દધાનઃ સમાહિતઃ ।
નાસ્ય વિઘ્નઃ પ્રભવતિ ભયં ચાસ્ય ન વિદ્યતે ॥

યે ચ ધર્માઃ શુભાઃ પુણ્યાઃ સરહસ્યા ઉદાહૃતાઃ ।
તેષાં ધર્મફલં તસ્ય યઃ પઠેત જિતેન્દ્રિયઃ ॥

નાસ્ય પાપં પ્રભવતિ ન ચ પાપેન લિપ્યતે ।
પઠેદ્વા શ્રાવયેદ્વાઽપિ શ્રુત્વા વા લભતે ફલમ્ ॥

ભુઞ્જતે પિતરો દેવા હવ્યં કવ્યમથાક્ષયમ્ ।
શ્રાવયંશ્ચાપિ વિપ્રેન્દ્રાન્પર્વસુ પ્રયતો નરઃ ॥

ઋષીણાં દેવતાનાં ચ પિતૄણાં ચૈવ નિત્યદા ।
ભવત્યભિમતઃ શ્રીમાન્ધર્મેષુ પ્રયતઃ સદા ॥

કૃત્વાઽપિ પાપકં કર્મ મહાપાતકવર્જિતમ્ ।
રહસ્યધર્મં શ્રુત્વેમં સર્વપાપૈઃ પ્રમુચ્યતે ॥
ભીષ્મ ઉવાચ ।

એતદ્ધર્મરહસ્યં વૈ દેવતાનાં નરાધિપ ।
વ્યાસોદ્દિષ્ટં મયા પ્રોક્તં સર્વદેવનમસ્કૃતમ્ ॥

પૃથિવી રત્નસમ્પૂર્ણા જ્ઞાનં ચેદમનુત્તમમ્ ।
ઇદમેવ તતઃ શ્રાવ્યમિતિ મન્યેત ધર્મવિત્ ॥

નાશ્રદ્દધાનાય ન નાસ્તિકાય ન નષ્ટધર્માયિ ન નિર્ઘૃણાય ।
ન હેતુદુષ્ટાય ગુરુદ્વિષે વા નાનાત્મભૂતાય નિવેદ્યમેતત્ ॥