Mahabharata · Chapter 13.192
paradāreṣu ye saktā akṛtvā dārasaṅgraham /
nirāśāḥ pitarasteṣāṃ śrāddhakāle bhavanti vai //
paradāraratiryaśca yaśca vandhyāmupāsate /
brahmasvaṃ harate yaśca samadoṣā bhavanti te //
asambhāṣyā bhavantyete pitṝṇāṃ nātra saṃśayaḥ /
devatāḥ pitaraścaiṣāṃ nābhinandanti taddhaviḥ //
tasmātparasya vai dārāṃstyajedvandhyāṃ ca yoṣitam /
brahmasvaṃ hi na hartavyamātmano hitamicchatā //
śrūyatāṃ cāparaṃ guhyaṃ rahasyaṃ dharmasaṃhitam /
śraddadhānena kartavyaṃ guruṇāṃ vacanaṃ sadā //
dvādaśyāṃ paurṇamāsyāṃ ca māsimāsi ghṛtākṣatam /
brāhmaṇebhyaḥ prayaccheta tasya puṇyaṃ nibodhata //
somaśca vardhate tena samudraśca mahodadhiḥ /
aśvamedhacaturbhāgaṃ phalaṃ sṛjati vāsavaḥ //
dānenaitena tejasvī vīryavāṃśca bhavennaraḥ /
prītaśca bhagavānsoma iṣṭānkāmānprayacchati //
śrūyatāṃ cāparo dharmaḥ sarahasyo mahāphalaḥ /
idaṃ kaliyugaṃ prāpya manuṣyāṇāṃ sukhāvahaḥ //
kalyamutthāya yo martyaḥ snātaḥ śuklena vāsasā /
tilapātraṃ prayaccheta brāhmaṇebhyaḥ samāhitaḥ //
tilodakaṃ ca yo dadyātpitṝṇāṃ madhunā saha /
dīpakaṃ kṛsaṃra caiva śrūyatāṃ tasya yatphalam //
tilapātre phalaṃ prāha bhagavānpākaśāṃsanaḥ /
gopradānaṃ ca yaḥ kuryādbhūmidānaṃ ca śāśvatam //
agniṣṭomaṃ ca yo yajñaṃ yajeta bahudakṣiṇam /
tilapātraṃ sahaitena samaṃ manyanti devatāḥ //
tilodakaṃ sadā śrāddhe manyante pitaro'kṣayam /
dīpe ca kṛsare caiva tuṣyante'sya pitāmahāḥ //
svarge ca pitṛloke ca pitṛdevābhipūjitam / evametanmayoddiṣṭapidṛṣṭaṃ purātanam // ] //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0