Mahabharata · Chapter 13.190

salilasyāñjaliṃ pūrṇamakṣatāśca dhṛtottarāḥ /
somasyottiṣṭhamānasya tajjalaṃ cākṣatāṃśca tān //

sthito hyabhimukho martyaḥ paurṇamāsyāṃ baliṃ haret /
agnikāryaṃ kṛtaṃ tena hutāścāsyāgnayastrayaḥ //

vanaspatiṃ ca yo hanyādamāvāsyāmabuddhimān /
api hyekena patreṇa lipyate brahmahatyayā //

dantakāṣṭhaṃ tu yaḥ khādedamāvāsyāmabuddhimān /
hiṃsitaścandramā**** pitaraścodvijanti ca //

havyaṃ na tasya devāśca pratigṛhṇanti parvasu /
kupyante pitaraścāsya kule vaṃśo'sya hīyate //
śrīruvāca /

prakīrṇaṃ bhājanaṃ yatra bhinnabhāṇḍamathāsanam /
yoṣitaścaiva hanyante kaśmalopahate gṛhe //

devatāḥ pitaraścaiva utsave parvaṇīṣu vā /
nirāśāḥ pratigacchanti kaśmalopahatādgṛhāt //
aṅgirā uvāca /

yastu saṃvatsaraṃ pūrṇaṃ dadyāddīpaṃ karañjake /
suvarcalāmūlahastaḥ prajā tasya vivardhate //
gārgya uvāca /

ātīthyaṃ satataṃ kuryāddīpaṃ dadyātpratiśraye /
varjayāno divāsvāpaṃ na ca māṃsāni bhakṣayet //

gobrāhmaṇaṃ na hiṃsyācca puṣkarāṇi ca kīrtayet /
eta śreṣṭhatamo dharmaḥ sarahasyo mahāphalaḥ //

api kratuśatairiṣṭvā kṣayaṃ gacchati taddhaviḥ /
na tu kṣīyanti te dharmāḥ śraddadhānaiḥ prayojitāḥ //

idaṃ ca paramaṃ guhyaṃ sarahasyaṃ nibodhata /
śrāddhakalpe ca daive ca tairthike parvaṇīṣu ca //

rajasvalā ca yā nārī śvitrikā'putrikā ca yā / etābhiścakṣuṣā dṛṣṭaṃ havirnāśnanti devatāḥ /
pitaraśca na tuṣyanti varṣāṇyapi trayodaśa //

śuklavāsāḥ śucirbhūtvā brāhmaṇānsvasti vācayet /
kīrtayedbhārataṃ caiva tathā syādakṣayaṃ haviḥ //
dhaumya uvāca /

bhinnabhāṇḍaṃ ca khaṭvāṃ ca kukkuṭaṃ śunakaṃ tathā /
apraśastāni sarvāṇi yaśca vṛkṣo gṛheruhaḥ //

bhinnabhāṇḍe kaliṃ prāhuḥ khaṭvāyāṃ tu dhanakṣayaḥ / kukkuṭe śunake caiva havirnāśnanti devatāḥ /
vṛkṣamūle dhruvaṃ satvaṃ tasmādvṛkṣaṃ na ropayet //
jamadagniruvāca /

yo yajedaśvamedhena vājapeyaśatena ha /
avākśirā vā lambeta satraṃ vā sphītamāharet //

na yasya hṛdayaṃ śuddhaṃ narakaṃ sa dhruvaṃ vrajet /
tulyaṃ yajñaśca satyaṃ ca hṛdayasya ca śuddhatā //

śuddhena manasā dattvā saktuprasthaṃ dvijātaye / brahmalokamanuprāptaḥ paryāptaṃ tannidarśanam // ] //