Mahabharata · Chapter 13.189

kena te ca bhavetprītiḥ kathaṃ tuṣṭiṃ tu gacchasi /
iti pṛṣṭaḥ surendreṇa provāca harirīśvaraḥ //

brāhmaṇānāṃ parīvādo mama vidveṣaṇaṃ mahat /
brāhmaṇaiḥ pūjitairnityaṃ pūjito'haṃ na saṃśayaḥ //

nityābhivādyā viprendrā bhuktvā pādau tathā'tmanaḥ /
teṣāṃ tuṣyāmi martyānāṃ yaścakre ca baliṃ haret //

vāmanaṃ brāhmaṇaṃ dṛṣṭvā varāhaṃ ca jalotthitam / uddhṛtāṃ dharaṇīṃ caiva mūrdhnā dhārayate tu yaḥ /
na teṣāmaśubhaṃ kiñcitkalmaṣaṃ copapadyate //

aśvatthaṃ rocanāṃ gāṃ ca pūjayedyo naraḥ sadā /
pūjitaṃ ca jagattena sadevāsuramānuṣam //

tena rūpeṇa teṣāṃ ca pūjāṃ gṛhṇāmi tattvataḥ /
pūjā mamaiṣā nāstyanyā yāvallokāḥ pratiṣṭhitāḥ //

anyathā hi vṛthā martyāḥ pūjayantyalpabuddhyaḥ /
nāhaṃ tatpratigṛhṇāmi na sā tuṣṭikarī mama //
indra uvāca /

cakraṃ pādau varāhaṃ ca brāhmaṇaṃ cāpi vāmanam /
uddhṛtāṃ dharaṇīṃ caiva kimarthaṃ tvaṃ praśaṃsasi //

bhavānsṛjati bhūtāni bhāvansaṃharati prajāḥ /
prakṛtiḥ sarvabhūtānāṃ samartyānāṃ sanātanī //
bhīṣma uvāca /

samprahasya tato viṣṇuridaṃ vacanamabravīt /
cakreṇa nihatā daityāḥ padmyāṃ krāntā vasundharā //

vārāhaṃ rūpamāsthāya hiraṇyākṣo nipātitaḥ / vāmanaṃ rūpamāsthāya jito rājā mayā baliḥ /

parituṣṭo bhavāmyevaṃ mānuṣāṇāṃ mahātmanām /
tanmāṃ ye pūjayiṣyanti nāsti teṣāṃ parābhavaḥ //

api vā brāhmṇaṃ dṛṣṭvā brahma cāriṇamāgatam /
brāhmaṇāgryāhutiṃ dattvā amṛtaṃ tasya bhojanam //

aindrīṃ sandhyāmupāsitvā ādityābhimukhaḥ sthitaḥ /
sarvatīrtheṣu sa snāto mucyate sarvakilbiṣaiḥ //

etadvaḥ kathitaṃ guhyamakhileni tapodhanāḥ /
saṃśayaṃ pṛcchamānānāṃ kiṃ bhūyaḥ kathayāmyaham //
baladeva uvāca /

śrūyatāṃ paramaṃ guhyaṃ mānuṣāṇāṃ sukhāvaham /
ajānanto yadabudhāḥ kliśyante bhūtapīḍitāḥ //

kalya utthāya yo martyaḥ spṛśedgāṃ vai ghṛtaṃ dadhi /
sarṣapaṃ ca priyaṅgaṃ ca kalmaṣātpratimucyate //

bhūtāni caiva sarvāṇi agrataḥ pṛṣṭhatopi vā /
ucchiṣṭaṃ vā'pi cchidreṣu varjayanti tapodhanāḥ //
devā ūcuḥ /

pragṛhyaudumbaraṃ pātraṃ toyapūrṇamudaṅbhukhaḥ /
upavāsaṃ tu gṛhṇīyādyadvā saṅkalpayedvratam //

devatāstasya tuṣyanti kāmikaṃ cāpi sidhyati /
anyathā hi vṛthā martyāḥ kurvate svalpabuddhayaḥ //

upavāse balau cāpi tāmrapātraṃ viśiṣyate / balirbhikṣā tathā'rdhyaṃ ca pitṝṇāṃ ca tilodakaṃ

tāmrapātreṇa dātavyamanyathā'lpaphalaṃ bhavet /
guhyametatsamuddiṣṭaṃ yathā tuṣyanti devatāḥ //
dharma uvāca /

rājapauruṣike vipre ghāṇṭike paricārike /
gorakṣake vāṇijake tathā kārukuśīlave //

mitradruhyanadhīyāne yaśca syādvṛṣalīpatiḥ / eteṣu daivaṃ pitryaṃ vā na deyaṃ syātkathañcana /
piṇḍadāstasya hīyante na ca prīṇāti vai pitṝn //

atithiryasya bhagnāśo gṛhātpratinivartate / pitarastasya devāśca agnayaśca tathaiva hi /
nirāśāḥ pratigacchanti atitherapratigrahāt //

strīghnairgoghnaiḥ kṛtaghnaiśca brahmaghnairgurutalpagaiḥ /
tulyadoṣo bhavatyebhiryasyātithitaranarcitaḥ //
agniruvāca /

pādamudyamya yo martyaḥ spṛśedgāśca sudurmatiḥ / brāhmaṇaṃ vā mahābhāgaṃ dīpyamānaṃ tathā'nalam /
tasya doṣānpravakṣyāmi tacchṛṇudhvaṃ samāhitāḥ //

divaṃ spṛśatyaśabdo'sya trasyanti pitaraśca vai / vaimanasyaṃ ca devānāṃ kṛtaṃ bhavati puṣkalam /
pāvakaśca mahātejā havyaṃ na pratigṛhṇati //

ājanmanāṃ śataṃ caiva narake pacyate tu saḥ /
niṣkṛtiṃ ca na tasyāpi anumanyanti karhicit //

tasmādgāvo na pādena spraṣṭavyā vai kadācana / brāhmaṇaśca mahātejā dīpyamānastathā'nalaḥ /
śraddadhānena martyena ātmano hitamicchatā //

ete doṣā mayā proktāstriṣu yaḥ pādamutsṛjet /
viśvāmitra uvāca /

śrūyatāṃ paramaṃ guhyaṃ rahasyaṃ dharmasaṃhitam /
paramānnena yo dadyātpitṝṇāmaupahārikam //

gajacchāyāyāṃ pūrvasyāṃ kutape dakṣiṇāmukhaḥ /
yadā bhādrapade māsi bhavate bahule maghā //

śrūyatāṃ tasya dānasya yādṛśo guṇavistaraḥ /
kṛtaṃ tena mahacchrāddhaṃ varṣāṇīha trayodaśa //

bahapal samaṅge hyakutobhaye ca kṣeme ca saṃkhyeva hi bhūyasī ca /
yathā purā brahmapure savatsā śatakratorvajradharasya yajñe //

bhūyaśca yā viṣṇupade sthitāyā vibhāvasoścāpi pathe sthitā yā /
devāśca sarve saha nāradena prakurvate sarvasaheti nāma //

mantreṇaitenābhivandeta yo vai vimucyate pāpakṛtena karmaṇā /
lokānavāpnoti purandarasya gavāṃ phalaṃ candramaso dyutiṃ ca //

evaṃ hi mantraṃ tridaśābhijuṣṭaṃ paṭheta yaḥ parvasu goṣṭhamadhye /
na tasyi pāpaṃ na bhayaṃ na śokaḥ sahasranetrasya ca yāti lokam //
bhīṣma uvāca /

atha sapta mahābhāga ṛṣayo lokaviśrutāḥ / vasiṣṭhapramukhāḥ sarve brahmaṇaṃ padmasambhavam /

pradakṣiṇamabhikramya sarve prāñjalayaḥ sthitāḥ // uvāca vacanaṃ teṣāṃ vasiṣṭho brahmavittamaḥ /

sarvaprāṇihitaṃ praśnaṃ brahmikṣatre viśeṣataḥ // dravyahīnāḥ kathaṃ martyā daridrāḥ sādhuvartinaḥ /

prāpnuvantīha yajñasya phalaṃ kena ca karmaṇā //
etacchrutvā vacasteṣāṃ brahmā vacanamabravīt //

aho praśno mahābhāga gūḍhārthaḥ paramaḥ śubhaḥ /
sūkṣmaḥ śreyāṃśca martyānāṃ bhavadbhiḥ samudāhṛtaḥ //

śrūyatāṃ sarvamākhyāsye nikhilena tapodhanāḥ /
yathā yajñaphalaṃ martyo labhate nātra saṃśayaḥ //

pauṣamāsasya śukle vai yadā yujyeta rohiṇī /
tena nakṣatrayogena ākāśaśayano bhavet //

ekavastraḥ śuciḥ snātaḥ śraddadhānaḥ samāhitaḥ /
somasya raśmayaḥ pītvā mahāyajñaphalaṃ labhet //

etadvaḥ paramaṃ guhyaṃ kathitaṃ dvijasattamāḥ / yanmāṃ bhavantaḥ pṛcchanti sūkṣmatattvārthadarśinaḥ] //