Mahabharata · Chapter 13.18

sarve vedāḥ sarvavedyāḥ saśāstrāḥ sarve yajñāḥ sarva ityaśca kṛṣṇaḥ /
viduḥ kṛṣṇaṃ brāhmaṇāstatvato ye teṣāṃ rājansarvayajñaḥ samāptaḥ //

jñeyo yogī brāhmaṇairvedatatvai- rāraṇyakaiḥ saiṣa kṛṣṇaḥ prabhutvāt /
sarvānyajñānbrāhmaṇānbrahma caiva vyāpyātiṣṭhaddevadevastriloke //

sa eṣa devaḥ śakramīśaṃ yajānaṃ prītyā prāha kratuyaṣṭāramagryam
na mā śakro vedavedārthatatvā- dbhakto bhaktyā śuddhabhāvapradhānaḥ //

mā jānante brahmaśīrṣaṃ variṣṭhaṃ viśve viśvaṃ brahmayoniṃ hyayonim /
sarvatrāhaṃ śāśvataḥ śāśvateśaḥ kṛtsno vedo'gnirnirguṇo'nantatejāḥ //

sarve devā vāsudevaṃ yajante tato buddhyā mārgamāṇāstanūnām /
sarvānkāmānprāpnuvante viśālāṃ- strailokye'sminkṛṣṇanāmābhidhānāt //

kṛṣṇo yajñairijyate yāyajūkaiḥ kṛṣṇo vīryairijyate vikramadbhiḥ /
kṛṣṇo vākyairijyate sammṛśānaiḥ kṛṣṇo muktairijyate vītamohaiḥ //

vidyāvantaḥ somapā ye vipāpā iṣṭvā yajñergocaraṃ prārthayante /
bhavagānuvāca /
sarvaṃ krāntaṃ devalokaṃ viśāla- mante gatvā muktilokaṃ bhajanti //

evaṃ sarve tvāśramāḥ suvratā ye māṃ jānanto yānti lokānadīnān /
ye dhyānadīkṣāmudvahanto vipāpā
jyotirbhūtvā devalokaṃ bhajanti //

pūjyante māṃ pūjayantaḥ prahṛṣṭā māṃ jānantaḥ śraddhayā vāsudevam /
bhaktyā tuṣṭo'haṃ tasya sattvaṃ prayacche satvaspṛṣṭo vītamoho'yameti //
dvaipāyana uvāca /

jyotīṃṣi śuktāni ca yāni loke trayo lokā lokapālāstrayaśca /
trayo'gnayaścāhutayaśca pañca sarve devā devakīputra eva //
bhīṣma uvāca /

vyāsasyaitadvacaḥ śrutvā madrarājaḥ saharṣibhiḥ /
vyāsaṃ kṛṣṇaṃ ca vidhivatprītātmā pratyapūjayat //
vaiśampāyana uvāca /

kaviḥ prayātastu maharṣiputro dvaipāyanastadvacanaṃ niśamya /
jagāma pṛthvīṃ śirasā mahātmā namaśca kṛṣṇāya cakāra bhīṣmaḥ //