Mahabharata · Chapter 13.182

vidyā tapaśca dānaṃ ca kimeteṣāṃ viśiṣyate /
pṛcchāmi tvāṃ satāṃ śreṣṭha tanme brūhi pitāmaha //
bhīṣma uvāca /

atrāpyudāharantīmamitihāsaṃ purātanam /
maitreyasya ca saṃvādaṃ kṛṣṇadvaipāyanasya ca //

kṛṣṇadvaipāyano rājannajñātacaritaṃ caran /
vārāṇasyāmupātiṣṭhanmaitreyaṃ svairiṇīkule //

tamupacchannamāsīnaṃ jñātvā sa munisattamaḥ /
arcitvā bhojayāmāsa maitreyo'śanamuttamam //

tadannamuttamaṃ bhuktvā guṇavatsārvakāmikam /
uttiṣṭhamāno'smayata prītaḥ kṛṣṇo mahāmanāḥ //

tamutsmayantaṃ samprekṣya maitreyaḥ kṛṣṇamabravīt / kāraṇaṃ brūhi dharmātmanvyasmayiṣṭhāḥ kutaśca te /
tapasvino dhṛtimataḥ pramodaḥ samupāgataḥ //

etadicchāmi te vidvannabhivādya praṇamya ca /
ātmanaśca tapobhāgyaṃ sukhabhāgyaṃ mameha ca //

tapobhāgyānmahābhāga sukhabhāgyāttathaiva ca / pṛthagācaritaṃ tāta pṛthagācaritātmanaḥ /
alpāntaramahaṃ manye viśiṣṭamapi cānvayāt //
vyāsa uvāca /

aticchedātivādābhyāṃ smayo'yaṃ samupāgataḥ /
asatyaṃ vedavacanaṃ kasmādvedo'nṛtaṃ vadet //

trīṇyeva tu padānyāhuḥ puruṣasyottamaṃ prati /
na druhyeccaiva dadyācca satyaṃ caiva parānvadet //

iti vedoktamṛṣibhiḥ purastātparikalpitam /
idānīṃ caiva naḥ kṛtyaṃ purastācca pariśrutam //

alpo'pi tādṛśo nyāso bhavatyuta mahāphalaḥ /
tṛṣitāya ca yaddattaṃ hṛdayenānasūyatā //

toṣitāstridaśā yatte dattvaitaddarśanaṃ mama /
ajaiṣīrmahato lokānmahāyajñairiva prabho //

tato dānapavitreṇa prīto'smi tapasaiva ca /
dūrātpuṇyavato gandhaḥ puṇyasyaiva ca darśanāt //

puṇyaśca vātigandhaste manye karma vidhānajam /
atha karmārjitastāta yathācaivānulepanāt //

śubhaṃ sarvapavitrebyo dānameva paraṃ dvija / [nocetsarvapavitrebhyo dānameva paraṃ bhavet // ]

yānīmānyuttamānīha vedoktāni praśaṃsati /
teṣāṃ śreṣṭhataraṃ dānamiti me nātra saṃśayaḥ //

dānavadbhiḥ kṛtaḥ panthā yena yānti manīṣiṇaḥ /
te hi prāṇasya dātārasteṣu dharmaḥ pratiṣṭhitaḥ //

yathā vedāḥ svadhītāśca yathā cendriyasaṃyamaḥ /
sarvatyāgo yatā ceha tatā dānamanuttamam //

tvaṃ hi tāta sukhādeva śubhameṣyasi śobhanam /
sukhātsukhataraprāptimāpnute matimānnaraḥ //

tannaḥ pratyakṣamevedamupalakṣyamasaṃśayam /
śrīmantaḥ prāpnuvantyarthāndānaṃ yajñaṃ tathā sukham //

sukhādeva paraṃ duḥkhaṃ duḥkhādanyatparaṃ sukham /
dṛśyate hi mahāprājña niyataṃ vai svabhāvataḥ //

vividhānīha vṛttāni narasyāhurmanīṣiṇaḥ /
puṇyamanyatpāpamanyanna puṇyaṃ na ca pāpakam //

na vṛttaṃ manyate'nyasya manyate'nyasya pātakam /
yathā svakarmanirvṛttaṃ na puṇyaṃ na ca pāpakam //

yajñadānatapaḥśīlā narā vai puṇyakarmiṇaḥ /
ye'bhidruhyanti bhūtāni te vai pāpakṛto janāḥ //

dravyāṇyādadate caiva duḥkhaṃ yānti patanti ca /
tato'nyatkarma yatkiñcinna puṇyaṃ na ca pātakam //

nityaṃ cākṛpaṇo bhuṅkte svajanairdehi yācataḥ / bhāgyakṣayeṇa kṣīyante nopabhogena sañcayāḥ //

ramasvaidhasva modasva dehi dāne ramasva ca /
na tvāmatibhaviṣyanti vaidyā na ca tapasvinaḥ //