Mahabharata · Chapter 13.181

kṣatradharmamanuprāptaḥ smaranneva ca vīryavān /
tyaktvā hi kīṭatāṃ rājaṃścacāra vipulaṃ tapaḥ //

tasya dharmārthaviduṣo dṛṣṭvā tadvipulaṃ tapaḥ /
ājagāma dvijaśreṣṭhaḥ kṛṣṇadvaipāyanastadā //
vyāsa uvāca /

kṣātrādeva vratātkīṭa bhūtānāṃ paripālaya /
kṣātraṃ devavrataṃ dhyāsaṃstato vipratvameṣyasi //

pāhi sarvāḥ prajāḥ samyak śubhāśubhavidātmavān /
śubhaiḥ saṃvibhajankāmairaśubhānāṃ ca bhāvanaiḥ //

ātmavānbhava suprītaḥ svadharmācaraṇe rataḥ /
kṣātrīṃ tanuṃ samutsṛjya tato vipratvameṣyasi //
bhīṣma uvāca /

so'pyaraṇyādabhipretya punareva yudhiṣṭhira /
maharṣervacanaṃ śrutvā prajā dharmeṇa pālayan //

acireṇaiva kālena kīṭaḥ pārthivasattama /
prajāpālanadharmeṇi pretya vipratvamāgataḥ //

tatastaṃ brāhmaṇaṃ draṣṭuṃ punareva mahāyaśāḥ /
ājagāma mahāprājñaḥ kṛṣṇadvaipāyanastadā //
vyāsa uvāca /

bhobho brahmarṣabha śrīmanmā vyathiṣṭhāḥ kathañcana /
śubhakṛcchubhayonīṣu pāpakṛtpāpayoniṣu //

upapadyati dharmajña yathādharmaṃ yathāvratam / tasmānmṛtyubhayātkīṭa mā vyathiṣṭhāḥ kathañcana /
dharmalābhātparaṃ na syāttasmāddharmaṃ carottamam //
kīṭa uvāca /

sukhātsukhataraṃ prāpto bhagavaṃstvatkṛte hyaham /
dharmamūlaṃ śubhaṃ prāpya pāpmā naṣṭa ihādya me //
bhīṣma uvāca /

bhagavadvacanātkīṭo brāhmaṇyaṃ prāpya durlabham / akarotpṛthivīṃ rājanyajñayūpaśatāṅkitām /
tataḥ sālokyamagamadbrahmaṇo brahmavittamaḥ //

atha pāpaharaṃ kīṭaḥ pārta brahma sanātanam /
svakarmaphalanirvṛttaṃ vyāsasya vacanāttadā //

kurukṣetre yuddhahatāḥ puṇye kṣatriyapuṅgavāḥ /
samprāptāste gatiṃ puṇyāṃ tanmā tvaṃ śoca putraka //