Mahabharata · Chapter 13.180

śubhena karmaṇā yadvai tiryagyonau na muhyase /
mamaiva kīṭa tatkarma yena tvaṃ na pramuhyase //

ahaṃ tvāṃ darśanādeva tārayāmi tapobalāt /
tapobalāddhi balavadbalamanyanna vidyate //

jānāmi pāpaiḥ svakṛtairgataṃ tvāṃ kīṭa kīṭatām /
avāpsysi paraṃ rdharmaṃ mānuṣye yadi manyase //

karmabhūmikṛtaṃ devā bhuñjate tiryagāśca ye /
dhanyā api manuṣyeṣu kāmārthāśca yathā guṇāḥ //

vāgbuddhipāṇipādaiśca samupetā vipaścitaḥ /
kimāyāti manuṣyasya mandasyārthasya jīvataḥ //

daive yaḥ kurute pūjāṃ viprāgniśaśisūryayoḥ /
bruvannapi kathāṃ puṇyāṃ tatra kīṭa tvameṣyasi //

guṇabhūtāni bhūtāni tatra tvamupabhokṣyase / kramātte'haṃ vineṣyāmi brahmatvaṃ yadi cecchasi /
bhīṣma uvāca /
sa tatheti pratiśrutya kīṭaḥ samavatiṣṭhata //

*tamṛṣiṃ draṣṭumagamatsarvāsvanyāsu yoniṣu //

śvāvidgodhāvarāhāṇāṃ tathaiva mṛgapakṣiṇām /
śvapākaśūdravaiśyānāṃ kṣatriyāṇāṃ ca yoniṣu //

sa kīṭe evamākhyātamṛṣiṇā satyavādinā /
pratismṛtyātha jagrāha pādau mūrdhni kṛtāñjaliḥ //
kīṭa uvāca /

idaṃ tadatulaṃ sthānamīpsitaṃ daśabhirguṇaiḥ /
yadahaṃ prāpya kīṭatvamāgato rājaputratām //

vahanti māmatibalāḥ kuñjarā hemamālinaḥ /
syandaneṣu ca kāmbhojā yuktāḥsamaravājinaḥ //

uṣṭrāśvatarayuktāni yānāni ca vahanti mām /
sabāndhavaḥ sahāmātyaścāśnāmi piśitāśanam //

gṛheṣu svanivāseṣu sukheṣu śayaneṣu ca /
varārheṣu mahābhāga svapāmi ca supūjitaḥ //

sarveṣvapararātreṣu sūtamāgadhabandinaḥ /
stuvanti māṃ yathā devā mahendraṃ priyavādinaḥ //

prasādātsatyasandhasya bhavato'mitatejasaḥ / yadahaṃ kīṭatāṃ prāpya smṛtijātā jugupsitām /
nanu nāśosti pāpasya yanmayopacitaṃ purā //

[namaste'stu mahāprājña kiṃ karomi praśādhi mām / tvattapobalanirdiṣṭamidaṃ hyadhigataṃ mayā // ]
vyāsa uvāca /

[arcito'haṃ tvayā rājanvāgbhiradya yadṛcchayā /
adya te kīṭatāṃ prāpya smṛtirjātājugupsitām] //

śūdreṇārthapradhānena nṛśaṃsenātatāyinā / mamaitaddarśanaṃ prāptaṃ tacca vai sukṛtaṃ purā /
tiryagyonau sma jātena mama cābhyarcanāttathā //

itastvaṃ rājaputratvādbrāhmaṇyaṃ samavāpsyasi /
gobrāhmaṇakṛte prāṇānhitvā'tmīyānraṇājire //
bhīṣma uvāca /

rājaputraḥ sukhaṃ prāpya īje caivāptadakṣiṇaiḥ /
atha coddīpyata svarge prabhūtopyavyayaḥ sukhī //

tiryagyonyāḥ śūdratāmabhyapaiti śūdro vaiśyaṃ kṣatriyatvaṃ ca vaiśyaḥ /
vṛttaślāghī kṣatriyo brāhmaṇatvaṃ svargaṃ puṇyādbrāhmaṇaḥ sādhuvṛttaḥ //