Mahabharata · Chapter 13.176

tato yudhiṣṭhiro rājā śaratalpe pitāmaham /
punareva mahārāja papraccha vadatāṃvaraḥ //
yudhiṣṭhira uvāca /

ṛṣayo brāhmaṇā devāḥ praśaṃsanti mahāmate /
ahiṃsālakṣaṇaṃ dharmaṃ vedaprāmāṇyadarśanāt //

karmaṇā na naraḥ kurvanhiṃsāṃ pārthivasattama /
vācā ca manasā caivaṃ tato duḥkhātpramucyate //
bhīṣma uvāca /

caturvidheyaṃ nirdiṣṭā hyahiṃsā brahmavādibhiḥ /
ekaikato'pi vibhraṣṭā na bhavatyarisūdana //

yathā sarvaścatuṣpādvai tribhiḥ pādairna tiṣṭhati /
tathaiveyaṃ mahīpāla kāraṇaiḥ procyate tribhiḥ //

yathā nāgapade'nyāni padāni padagāminām /
sarvāṇyevāpidhīyante padajātāni kauñjare //

evaṃ lokeṣvahiṃsā tu nirdiṣṭā dharmataḥ purā /
karmṇā lipyate janturvācā ca manasā'pi ca //

pūrvaṃ tu manasā tyaktvā tyajedvācā'tha karmaṇā /
hiṃsāṃ tu nopayuñjīta tathā hiṃsā caturvidhā //

kāye manasi vākye'pi doṣā hyete prakīrtitāḥ /
[na bhakṣayati yo māṃsaṃ trividhaṃ sa vimucyate //

trikāraṇaṃ tu nirdiṣṭaṃ śrūyate brahmavādibhiḥ / mano vāci tathā'svāde doṣā hyeṣu pratiṣṭhitāḥ // ]

na bhakṣayantyato māṃsaṃ tapoyuktā manīṣiṇaḥ /
doṣāṃstu bhakṣaṇe rājanmāṃsasyeha nibodha me //

putra māṃsopamaṃ jānankhādate yo vicetanaḥ /
māṃsaṃ mohasamāyuktaḥ puruṣaḥ so'dhamaḥ smṛtaḥ //

pitṛmātṛsamāyoge putratvaṃ jāyate yathā /
hiṃsāṃ kṛtvā'vaśaḥ pāpo bhūyiṣṭhaṃ jāyate tathā //

rasaśca hṛdi jihvāyā jñānaṃ prajñāyate yathā /
tathā śāstreṣu niyataṃ rāgo hyāsvāditādbhavet //

saṃskṛtāsaṃskṛtāḥ pakvā lavaṇālavaṇāstathā /
prajāyante yathā bhāvāstathā cittaṃ nirudhyate //

bherīmṛdaṅgaśabdāṃśca tantrīśabdāṃśca puṣkalān /
niṣeviṣyanti vai mandā māṃsabhakṣāḥ kathaṃ narāḥ //

pareṣāṃ dhanadhānyānāṃ hisakāḥ stāvakāstathā / praśaṃsakāśca māṃsasya nityaṃ svarge bahiṣkṛtāḥ //

acintitamanirdiṣṭamasaṅkalpitameva ca /
rasagṛddhyā'bhibhūtā ye praśaṃsanti phalārthinaḥ //

praśaṃsā hyeva māṃsasya doṣakalpaphalānvitā //

bhasma viṣṭhā kṛmirvā'pi niṣṭhā yasyedṛśī dhruvā / sa kāyaḥ parapīḍābhiḥ kathaṃ dhāryovipaścitā //

jīvitaṃ hi parityajya bahavaḥ sādhavo janāḥ /
svamāṃsaiḥ paramāṃsāni paripālya divaṃ gatāḥ //

evameṣā mahārāja caturbhiḥ kāraṇaiḥ smṛtā /
ahiṃsā tava nirdiṣṭā sarvadharmānusaṃhitā //