Mahabharata · Chapter 13.174

adharmasya gatirbrahmankathitā me tvayā'nagha /
dharmasya tu gatiṃ śrotumicchāmi vadatāṃvara //

kṛtvā karmāṇi pāpāni kathaṃ yānti śubhāṃ gatim /
karmaṇā ca kṛteneha kena yānti śubhāṃ gatim //
bṛhaspatiruvāca /

kṛtvā pāpāni karmāṇi adharmavaśamāgataḥ /
manasā viparītena nirayaṃ pratipadyate //

mohādadharmaṃ yaḥ kṛtvā punaḥ samanutapyate /
manaḥsamādhisaṃyukto na sa seveta duṣkṛtam //

[yathāyathā manastasya duṣkṛtaṃ karma garhate /
tathātathā śarīraṃ tu tenādharmeṇa mucyate //

yadi vyāharate rājanviprāṇāṃ dharmavādinām / tato'dharmakṛtātkṣipramapavādātpramucyate // ]

yathāyathā naraḥ samyagadhramamanubhāṣate / samāhitena manasā vimucyeta tathātathā /
bhujaṅga iva nirmokātpūrvabhuktājjarānvitāt //

dattvā viprasya dānāni vividhāni samāhitaḥ /
manaḥsamādhisaṃyuktaḥ sugatiṃ pratipadyate //

pradānāni tu vakṣyāmi yāni dattvā yudhiṣṭhira /
naraḥ kṛtvā'pyakāryāṇi tato dharmeṇa yujyate //

sarveṣāmeva dānānāmannaṃ śreṣṭhamudāhṛtam /
pūrvamannaṃ pradātavyamṛjunā dharmamicchatā //

prāṇā hyannaṃ manuṣyāṇāṃ tasmājjantuśca jāyate /
anne pratiṣṭhito lokastasmādannaṃ praśasyate //

annameva praśaṃsanti devarṣipitṛmānavāḥ /
annasya hi pradānena svargamāpnoti mānavaḥ //

nyāyalabdhaṃ pradātavyaṃ dvijātibhyo'nnamuttamam /
svādhyāyasamupetebhyaḥ prahṛṣṭenāntarātmanā //

yasya hyannamupāśnanti brāhmaṇānāṃ śataṃ daśa /
hṛṣṭena manasā dattaṃ na sa tiryaggatirbhavet //

brāhmaṇānāṃ sahasrāṇi daśa bhojya nararṣabha /
naro'dharmātpramucyeta yogeṣvabhirataḥ sadā //

bhaikṣyeṇānnaṃ samāhṛtya dadyādannaṃ dvijeṣu vai /
suvarṇadānātpāpāni naśyanti subahūnyapi //

dattvā vṛttikarīṃ bhūmiṃ pātakenāpi mucyate /
pārāyaṇaiśca vedānāṃ mucyate pātakairdvijaḥ //

gāyatryāścaiva lakṣeṇa gosahasrasya tarpaṇāt /
vedārthaṃ jñāpayitvā tu śuddhānviprānyathārthataḥ //

sarvatyāgādibhiścaiva mucyate pātakairdvijaḥ /
sarvātithyaṃ paraṃ hyeṣāṃ tasmāddānaṃ paraṃ smṛtam //

ahiṃsanbrāhmaṇasvāni nyāyena paripālya ca /
kṣatriyastarasā prāptamannaṃ yo vai prayacchati //

dvijebhyo vedavṛddhebhyaḥ prayataḥ susamāhitaḥ /
tenāpohati dharmātmanduṣkṛtaṃ karma pāṇḍava //

ṣaḍbhāgapariśuddhaṃ ca kṛṣerbhāgamupārjitam /
vaiśyo'dadaddvijātibhyaḥ pāpebhyaḥ parimucyate //

avāpya prāṇasandehaṃ kārkaśyena samārjitam /
annaṃ dattvā dvijātibhyaḥ śūdraḥ pāpātpramucyate //

aurasena balenānnamarjayitvā'vihiṃsakaḥ /
yaḥ prayacchati viprebhyo na sa durgāṇi paśyati //

nyāyenaivāptamannaṃ tu naro harṣasamanvitaḥ /
dvijebhyo vedavṛddhebhyo dattvā pāpātpramucyate //

annamūrjaskaraṃ loke dattvorjasvī bhavennaraḥ /
satāṃ panthānamāvṛtya sarvapāpaiḥ pramucyate //

śūdrānnaṃ naiva bhoktavyaṃ viprairdharmaparāyaṇaiḥ /
āpadyeva svadāsānāṃ bhoktavyaṃ svayamudyataiḥ //

dānavadbhiḥ kṛtaḥ panthā yena yānti manīṣiṇaḥ /
te hi prāṇasya dātārastebhyo dharmaḥ sanātanaḥ //

sarvāvasthaṃ manuṣyeṇa nyāyenānnamupārjitam /
kāryaṃ pātrāgataṃ nityamannaṃ hi paramā gatiḥ //

annasya hi pradānena naro raudraṃ na sevate /
tasmādannaṃ pradātavyamanyāyaparivarjitam //

yatedbrāhmaṇapūrvaṃ hi bhoktumannaṃ gṛhī sadā /
avandhyaṃ divasaṃ kuryādannapānīyadānataḥ //

bhojayitvā daśaśataṃ naro vedavidāṃ nṛpa /
nyāyaviddharmaviduṣāmitihāsavidāṃ tathā //

na yāti narakaṃ ghoraṃ saṃsārāṃśca na sevate /
sarvakāmasamāyuktaḥ pretya cāpyaśnute sukham //

evaṃ sukhasamāyukto ramate vigatajvaraḥ /
rūpavānkīrtimāṃścaiva dhanavāṃścopapadyate //

etatte sarvamākhyātamannadānaphalaṃ mahūt /
mūlametattu dharmāṇāṃ pradānānāṃ ca bhārata //