Mahabharata · Chapter 13.168

indriyebhyo manaḥ pūrvamahaṅkārastataḥ param /
ahaṅkārātparā buddhirbuddheḥ parataraṃ mahat //

mahataḥ paramavyaktamavyaktātpuruṣaḥ paraḥ /
etāvadetatsāṃkhyānāṃ darśanaṃ devasattama //

avyaktaṃ buddhyahaṅkārau mahābhūtāni pañca ca / manastathā viśeṣāśca daśa caivendriyāṇi ca /
etāstatvacaturviṃśanmahāpuruṣasammitāḥ //

buddhyāmānena deveśa cetanena mahātmanā /
saṃyogametayornityamāhuravyaktapuṃsayoḥ //

ekatvaṃ ca bahutvaṃ ca sargapralayakoṭiśaḥ /
tamaḥsañjñitametaddhi pravadanti triśūladhṛk //

samutpāṭya yathāvyaktājjīvā yānti punaḥpunaḥ /
ādireṣa mahānātmā guṇānāmiti naḥ prabho //

guṇasthatvādguṇaṃ cainamāhuravyaktalakṣaṇam /
etenādhyuṣito vyaktastriguṇaṃ cetayatyuta //

acetanaḥ prakṛtyeṣu na cānyamanubudhyate /
budhyamāno hyahankāro nityaṃ mānāprabodhanāt //

vimalasva viśuddhasya nīrujasya mahātmanaḥ /
vimalodaraśīlaḥ syādbudhyamānāprabuddhayoḥ //

draṣṭā bhavatyabhoktā ca satvamūrtiśca nirguṇaḥ /
budhyamānāprabuddhābhyāmanya eva tu nirguṇaḥ //

upekṣakaḥ śucistābhyāmubhābhyāmayutastathā /
budhyamāno na budhyeta buddhamevaṃ sanātanam //

sa eva buddheravyaktasvabhāvatvādacetanaḥ /
sohameva na me'nyosti ya evamabhimanyate //

na manyate mamānyosti yena cetosmyacetanaḥ /
evamevābhimanyeta budhyamānopyanātmavān //

ahameva na me'nyosti na prabuddhavaśānugaḥ /
avyaktastho guṇāneṣa nityamevābhimanyate //

tenādhiṣṭhitatatvajñairmahadbhirabhidhīyate /
ahaṅkāreṇa saṃyuktastatasdadabhimanyate //

kṣetraṃ praviśya durbuddhirbuddhyamāno hyanātmavān /
ahameva sṛjatyanyaddvitīyaṃ lokasārathiḥ //

sarvābhāvairahaṅkāraistṛtīyaṃ sargasañjñitam /
tato bhūtānyahaṅkāramahaṅkāro mano'sṛjat //

sarvasnotasyabhimukhaṃ samprāvartata buddhimān / tathaiva yajñe bhūteṣu viṣayārthī punaḥpunaḥ /
indriyaiḥ saha śūlāṅka pañca pañcabhireva ca //

mano veda na cātmānamaṅkāraṃ prajāpatiḥ /
na veda vāpyahaṅkāro buddhiṃ buddhimatāṃvara //

evamete mahābhāga netare nayavādinaḥ /
ahaṅkāreṇa saṃyuktaḥ srotasyabhimukhaḥ sadā //

evameṣa vikārātmā mahāpuruṣasañjñakaḥ /
pratanoti jagatkṛtsnaṃ punarādadate sakṛt //

sasañjñatvājjagatkṛtsnamavyaktasya hṛdi sthitam /
saṃviśadrajanīṃ kṛtsnāṃ niśānte divasāgame //

punarātmā vijayate bahavo nirguṇāstathā /
ajñānena samāyuktaḥ sovyaktena tamotmanā //

yadi hyeṣo nu manyeta mamāsti parato varaḥ /
sa punaḥ punarātmānaṃ na kuryādākṣipeta ca //

etamavyaktaviṣayaṃ sūkṣmaṃ manyeta buddhimān /
pañcaviṃśaṃ mahādeva mahāpuruṣavaikṛtam //

prabuddhau buddhavānetatsṛjamānamabuddhavān /
guṇānpunaśca tāneva sotmanātmani nikṣipet //

avyaktasya vaśībhūto yo'jñānasya tamotmanaḥ /
budhyamāno hyabuddhasya buddhastadanubhujyate //

upekṣakaḥ śucirvyagraḥ soliṅgaḥ sovraṇo'malaḥ /
ṣaḍviṃśo bhagavānāste buddhaḥ śuddho nirāmayaḥ //

avyaktādiviśeṣāntametadvaidyā vadantyuta /
etaireva vihīnaṃ tu kecidāhurmanīṣiṇaḥ //

nistatvaṃ budhyamānāstu kecidāhurmahāmate /
kecidāhurmahātmānastatvasañjñitameva tu //

tatvasya śravaṇādenaṃ tatvamevaṃ vadanti vai /
satvasaṃśrayaṇāccaiva satvavantaṃ maheśvara //

evameṣa vikārātmā budhyamāno mahābhuja / avyakto bhavate vyaktau satvaṃsatvaṃ tathā guṇau /
vidyā ca bhavate vidyā bhavettu grahasañjñitam //

ya evamanubuddhyante yogasāṅkhyāśca tatvataḥ /
te'vyaktaṃ śaṅkarāgāḍhaṃ muñcante śāstrabuddhayaḥ //

teṣāmetattu vadatāṃ śāstrārthaṃ sūkṣmadarśinām /
buddhirvistīryate sarvaṃ tailabindurivāmbhasi //

vidyā tu sarvavidyānāmavabodha iti smṛtaḥ /
yena vidyāmavidyāṃ ca vindanti yatisattamāḥ //

saiṣā trayī parā vidyā caturthyānvīkṣikī smṛtā /
yāṃ buddhyamāno buddhyeta buddhyātmani samaṃ gataḥ //

aprabuddhamathāvyaktamavidyāsañjñikaṃ smṛtam / vimohitaṃ tu śokena kevalena samanvitam /
etadbuddhyā bhavedbuddhaḥ kimanyadbuddhilakṣaṇam //

ye tvetannāvabuddhyante te prabuddhavaśānugāḥ /
te punaḥpunaravyaktājjaniṣyantyabudhāntmanaḥ //

tameva tulayiṣyanti abuddhivaśavartinaḥ /
ye cāpyanye tanmanasastepyetatphalabhāginaḥ //

viditvainaṃ na śocanti yogopetārthadarśinaḥ /
svātantryaṃ pratilapsyante kevalatvaṃ ca bhāsvaram //

ajñānabandhanānmuktāstīrṇāḥ saṃsārabandhanāt / ajñānasāgaraṃ ghoramagādhaṃ tamasañjñakam /
yatra majjanti bhūtāni punaḥpunararindam //

eṣā vidyā tathā'vidyā kathitā te mayā'rthataḥ /
yasmindeyaṃ ca no grāhyaṃ sāṃkhyāḥ sāṃkhyaṃ tathaiva ca //

tathā caikatvanānātvamakṣaraṃ kṣarameva ca /
nigadiṣyāmi deveśa vimokṣaṃ trividhaṃ ca te //

buddhyamānāprabuddhābhyāmabuddhasya prapañcanam /
bhūya eva nibodha tvaṃ devānāṃ devasattama //

yacca kiñca śrutaṃ na syāddṛṣṭaṃ caiva na kiñcana / tacca te sampravakṣyāmi ekāgraḥ śṛṇu tatparaḥ //