Mahabharata · Chapter 13.167

prabhavaścāpyayastāta varṇitaste'nupūrvaśaḥ /
tathā'dhyātmādhebhūtaṃ ca tathaivātrādhidaivatam //

nikhilena tu vakṣyāmi daivatāni ha dehinām /
yānyāśriteṣu deheṣu yāni pṛcchasi śaṅkara //

vācyagnistvatha jihvāyāṃ somaḥ prāṇe tu mārutaḥ /
rūpe cāpyatha nakṣatraṃ jihvāyāṃ cāpa eva tu //

nābhyāṃ samudraśca vibhurnakharoma tathaiva ca /
vanaspativanauṣadhyastvaṅgeṣu marutastathā //

saṃvatsarāḥ parvasu ca ākāśe daivamānuṣe /
udāne vidyudabhavadvyāne parjanya eva ca //

stanayoreva cākāśaṃ bale cendrastathaiva ca /
manaso'pyatha ceśānastvapāne rudra eva ca //

gandharvāpsaraso vyāne satye mitraśca śaṅkara /
prajñāyāṃ varuṇaścaiva cakṣuṣyāditya eva ca //

śarīre pṛthivī caiva pādayorviṣṇureva ca /
pāyau mitrastathopasthe prajāpatirarindama //

mūrdhni caiva diśaḥ prāhurbuddhau brahmā pratiṣṭhitaḥ /
budhyamāno'tmaniṣṭhaḥ syādadhiṣṭhātā tu śaṅkaraḥ //

abuddhaścābhavattasmādbudhyamānānna saṃśayaḥ /
ābhyāmanyaḥ paro buddho vedavādeṣu śaṅkara //

yadāśritāni deheṣu daivatāni pṛthakpṛthak /
yo'gnaye jāyate nityamātmayājī samāhitaḥ //

ya evamanupaśyeta daivatāni samāhitaḥ / sotra yogī bhavatyeva ya evamanupaśyati /
sa sarvajñayājibhyo hyātmayājī viśiṣyate //

mukhe juhoti yo nityaṃ kṛtsnaṃ viśvamidaṃ jagat /
sotmavitprocyate tajjñairmahādeva mahātmabhiḥ //

sarvebhyaḥ paramebhyo vai daivatebhyo hyātmayājinā /
gantavyaṃ paramākāṅkṣanparameva ca cintayan //

yathā sankramate dehāddehī tripurasūdana /
tathāsya sthānamākhyāsye pṛthaktveneha śaṅkara //

pādābhyāṃ vaiṣṇavaṃ sthānamāpnoti viniyojanāt /
pāyunā mitramāpnoti upasthena prajāpatim //

nābhyā ca vāruṇaṃ sthānaṃ stanābhyāṃ tu bhavo labhet bāhubhyāṃ vāsavaṃ sthānaṃ śrotrābhyāmāpnuyāddiśaḥ /
ādityaṃ cakṣuṣā sthānaṃ mūrdhnā brahmaṇa eva ca //

atha mūrdhasu yaḥ prāṇāndhārayeta samāhitaḥ /
buddhyā mānamavāpnoti dravyāvasthaṃ ca saṃśayaḥ //

avyaktātparamaṃ śuddhamaprameyamanāmayam /
tamāhuḥ paramaṃ nityaṃ yadyadāpnoti buddhimān //

budhyamānāprabuddhābhyāṃ sa buddha iti paṭhyate /
budhyamānamabuddhaśca nityamevānupaśyati //

vikārapuruṣastveṣa budhyamāna iti smṛtaḥ /
pañcaviṃśatitatvaṃ tatprocyate tatra saṃśayaḥ //

sa eṣa prakṛtisthatvāttasthurityupadiśyate /
mahānātmā mahādeva mahānatrādhitiṣṭhati //

adhiṣṭhānādadhiṣṭhātā procyate śāstradarśanāt /
eṣa cetayate deva mohajālamabuddhimān //

avyaktasyaiva sādharmyametadāhurmanīṣiṇaḥ /
sohaṃ sohamato nityādajñānāditi manyate //

yadi budhyati caivāyaṃ manyeyamiti bhāsvaraḥ /
na prabuddho na varteta pānīyaṃ matsyako yathā //

devatā nikhilenaitāḥ proktāstribhuvaneśvara /
yogakṛtyaṃ tu tāvanme tvaṃ nibodhānupūrvaśaḥ //

śūnyāgāreṣvaraṇyeṣu sāgare vā guhāsu vā /
viṣṭambhayitvā trīndaṇḍānavāpto hyadvayo bhavet //

prāṅmukhodaṅmukho vāpi tathā paścānmukhopi vā /
dakṣiṇāvadano vāpi baddhvā vidhivadāsanam //

svastikenopasaṃviṣṭaḥ kāyamunnāmya bhāsvaram /
yathopadiṣṭaṃ guruṇā tathā tadbrahma dhārayet //

laghvāhāro yato dāntastrikālaparivarjakaḥ /
mūtrotsargapurīṣābhyāmāhāre ca samāhitaḥ //

śeṣakālaṃ tu yuñjīta manasā susamāhitaḥ /
indriyāṇīndriyārthebhyo manasā vinivartayet //

manastathaiva saṅgṛhya buddhyā buddhimatāṃ vara /
vidhāvamānaṃ dhairyeṇa visphurantamitastataḥ //

nirudhya sarvasaṅkalpāṃstato vai sthiratāṃ vrajet /
ekāgrastadvijānīyātsarvaṃ guhyatamaṃ param //

nivātastha ivālolo yathā dīpo'tidīpyate /
ūrdhvameva na tiryakca tathaivābhrānti te manaḥ //

hṛdisthastiṣṭhate yosau tasyaivābhimukho yadā /
mano bhavati deveśa pāṣāṇamiva niścalam //

sa nirjane vinirghoṣe saghoṣe cā'vasañjane /
yukto yo na vikampeta yogī yogavidhiḥ śrutaḥ //

tataḥ paśyati tadbrahma jvaladātmani saṃsthitam /
vidyudambudhare yadvattadvadekamanāśrayam //

tamasyagādhe tiṣṭhantaṃ nistamaskamacetanam /
cetayānamacetaṃ ca dīpyamānaṃ svatejasā //

aṅgaṣṭhaparvamātraṃ tannaiśreyasamaninditam /
mahadbhūtamanantaṃ ca svatantraṃ vigatajvaram //

jyotiṣāṃ jyotiṣaṃ devaṃ viṣṇumatyantanirmalam /
nārāyaṇamaṇīyāṃsamīśvarāṇāmadhīśvaram //

viśvataḥ paramaṃ nityaṃ viśvaṃ nārāyaṇaṃ prabhum /
avijñāya nimajjanti lokāḥ saṃsārasāgare //

yaṃ dṛṣṭvā yatayastāta na śocanti gatajvarāḥ /
janmamṛtyubhayānmuktāstīrṇāḥ saṃsārasāgaram //

aṇimā laghimā bhūmā prāptiḥ prākamyameva ca / īśitvaṃ ca vaśitvaṃ ca yatra kāmāvasāyitā /
etadaṣṭuguṇaṃ yogaṃ yogānāmamitaṃ smṛtam //

dṛṣṭvātmānaṃ nirātmānamaprameyaṃ sanātanam / te viśanti śarīrāṇi yogenānena bhāsvaram /
daityadevamanuṣyāṇāṃ balena balavattamāḥ //

etattatvamanādyantaṃ yadbhavānanupṛcchati /
nityaṃ vayamupāsyāmo yogadharmaṃ sanātanam //

yogadharmānna dharmosti garīyānsurasattama /
etaddharma hi dharmāṇāmapunarbhavasaṃskṛtam //

tatvataḥ paramastīsti kecidāhurmanīṣiṇaḥ /
kecidāhuḥ paraṃ nāsti ye jñānaphalamāśritāḥ //

jñānasthaḥ puruṣastveṣa vikṛtaḥ svena varṇitaḥ /
ye dhyānenānupaśyanti nityaṃ yogaparāyaṇāḥ //

tameva puruṣaṃ devaṃ kecideva maheśvara /
nityamanyatamāḥ prāhurjñānaṃ paramakaṃ smṛtam //

jñānameva vinirmuktāḥ sāṃkhyā gacchanti kevalam /
cintādhyātmani cānyatra yogāḥ paramabuddhayaḥ //

uktametāvadetatte yogadarśanamuttamam / sāṅkhyajñānaṃ pravakṣyāmi parisaṃkhyāvidarśanam //