Mahabharata · Chapter 13.163

sarveṣāmeva varṇānāṃ mlecchānāṃ ca pitāmaha /
upavāse matiriyaṃ kāraṇaṃ ca na vidmahe //

brahmakṣatreṇa niyamāḥ kartavyā iti naḥ śrutam / upavāse kathaṃ teṣāṃ kṛtamasti pitāmaha /

niyamāṃścopavāsāṃśca sarveṣāṃ brūhi pārthiva /
āpnoti kāṃ gatiṃ tāta upavāsaparāyaṇaḥ //

upavāsaḥ paraṃ puṇyaṃ pavitramapi cottamam //
upoṣyeha naraśreṣṭha kiṃ phalaṃ pratipadyate //

adharmānmucyate kena dharmamāpnoti vā katham /
svargaṃ puṇyaṃ ca labhate kathaṃ bharatasattama //

upoṣya cāpi kiṃ tena prayojyaṃ syānnarādhipa /
dharmeṇa ca sukhānarthām̐llabhedyena bravīhi me //
vaiśampāyana uvāca /

evaṃ bruvāṇaṃ kaunteyaṃ dharmajñaṃ dharmatattvavit /
dharmaputramidaṃ vākyaṃ bhīṣmaḥ śāntanavo'bravīt //

idaṃ khalu mahārāja śrutamāsītpurātanam /
upāvāsavidhau śreṣṭhā guṇā ye bharatarṣabha //

prājāpatyamāṅgirasaṃ pṛṣṭavānasmi bhārata /
yathā māṃ tvaṃ tathaivāhaṃ pṛṣṭavāṃstaṃ tapodhanam //

praśnametaṃ mayā pṛṣṭo bhagavānagnisambhavaḥ /
upavāsavidhiṃ puṇyamācaṣṭa bharatarṣabha //
aṅgirā uvāca /

brahmakṣatre trirātraṃ tu vihitaṃ kurunandana /
dvistrirātramathaikāhaṃ nirdiṣṭaṃ puruṣarṣabha //

vaiśyāḥ śūdrāśca yanmohādupavāsaṃ prakurvate /
trirātraṃ vā dvirāitraṃ vā tayorvyuṣṭirna vidyate //

caturthabhaktakṣapaṇaṃ vaiśye śūdre vidhīyate /
trirātraṃ na tu dharmajñairvihitaṃ brahmavādibhiḥ //

pañcamyāṃ vā'pi ṣaṣṭhyāṃ ca paurṇamāsyāṃ ca bhārata /
upoṣya ekabhaktena niyatātmā jitendriyaḥ //

kṣamāvānrūpasampannaḥ surabhiścaiva jāyate /
nānapatyo bhavetprājño daridro vā kadācana //

yajiṣṇuḥ pañcamīṃ ṣaṣṭhīṃ kule bhojayate dvijān / aṣṭamīmatha kauravya kṛṣṇapakṣe caturdaśīm /
upoṣya vyādhirahito vīryavānabhijāyate //

mārgaśīrṣaṃ tu vai māsamekabhaktena yaḥ kṣipet /
bhojayecca dvijāñśaktyā sa mucyedvyādhikilbiṣaiḥ //

sarvakalyāṇasampūrṇaḥ sarvauṣadhisamanvitaḥ /
kṛṣibhāgī bahudhano bahudhānyaśca jāyate //

pauṣamāsaṃ tu kaunteya bhaktenaikena yaḥ kṣipet /
subhago darśanīyaśca yaśobhāgī ca jāyate //

pitṛbhakto māghamāsaṃ yaḥ kṣipedekabhojanaḥ /
śrīmatkule jñātimadhye subhagatvaṃ prapadyate //

bhagadaivatamāsaṃ tu ekabhaktena yaḥ kṣipet / subhago darśanīyaśca yaśobhāgī ca jāyate /
strīṣu vallabhatāṃ yāti vaśyāścāsya bhavanti tāḥ //

caitraṃ tu niyato māsamekabhaktena yaḥ kṣipet /
suvarṇamaṇimuktāḍhye kule mahati jāyate //

nistaredekabhaktena vaiśākhaṃ yo jitendriyaḥ /
naro vā yadi vā narī jñātīnāṃ śreṣṭhatāṃ vrajet //

jyeṣṭhāmūlaṃ tu yo māsamekabhaktena sankṣipet /
aiśvaryamatulaṃ śreṣṭhaṃ pumānstrī vā prapadyate //

āṣāḍhamekabhaktena sthitvā māsamatandritaḥ /
bahudhānyo bahudhano bahuputraśca jāyate //

śrāvaṇaṃ niyato māsamekabhaktena yaḥ kṣipet / rūpadraviṇasampannaḥ sukhī bhavati nityaśaḥ /
bahubhāryo bahudhano bahuputraści jāyate //

prauṣṭhapādaṃ tu yo māsamekāhāro bhavennaraḥ /
gavāḍhyaṃ sphītamacalamaiśvaryaṃ pratipadyate //

tathaivāśvayujaṃ māsamekabhaktena yaḥ kṣipet /
prajñāvānvāhanāḍhyaśca bahuputraśca jāyate //

kārtikaṃ tu naro māsaṃ yaḥ kuryādekabhojanam /
śūraśca bahubhāryaśca kīrtimāṃścaiva jāyate //

iti māsā naravyāghra kṣipatāṃ parikīrtitāḥ /
tithīnāṃ niyamā ye tu śṛṇu tānapi pārthiva //

pakṣepakṣe gate yastu bhaktamaśnāti bhārata /
gavāḍhyo bahuputraśca dīrghāyuśca sa jāyate //

māsimāsi trirātrāṇi kṛtvā varṣāṇi dvādaśa /
gaṇādhipatyaṃ prāpnoti niḥsapatnamanāvilam //

ete tu niyamāḥ sarve kartavyāḥ śarado daśa /
dve cānye bharataśreṣṭha pravṛttiranukīrtitā //

yastu prātastathā sāyaṃ bhuñjāno nāntarā pibet /
ahiṃsānirato nityaṃ juhvāno jātavedasam //

ṣaḍbhiḥ sa varṣairnṛpate sidhyate nāitra saṃśayaḥ /
agniṣṭomasya yajñasya phalaṃ prāpnoti mānavaḥ //

adhivāse sopsarasāṃ nṛtyagītavinādite /
ramate strīsahasrāḍhye sukutī virajā naraḥ //

taptakāñcanavarṇābhaṃ vimānamadhirohati / pūrṇaṃ varṣasahasraṃ ca brahmiloke mahīyate /
tatkṣayādiha cāgamya māhātmyaṃ pratipadyate //

yastu saṃvatsaraṃ pūrṇamekāhāro bhavennaraḥ /
atirātrasya yajñasya sa phalaṃ samupāśnute //

triṃśadvarṣasahasrāṇi svarge ca sa mahīyate /
tatkṣayādiha cāgamya māhātmyaṃ pratipadyate //

yastu saṃvatsaraṃ pūrṇaṃ caturthaṃ bhaktamaśnute /
ahiṃsānirato nityaṃ satyavāgvijitendriyaḥ //

vājapeyasya yajñasya sa phalaṃ samupāśnute /
triṃśadvarṣasahasrāṇi svargaloke mahīyate //

ṣaṣṭhe kāle tu kaunteya naraḥ saṃvatsaraṃ kṣipan /
aśvamedhasya yajñasya phalaṃ prāpnoti mānavaḥ //

cakravākaprayuktena vimānena sa gacchati /
catvāriṃśatsahasrāṇi varṣāṇi divi modate //

aṣṭamena tu bhaktena jīvansaṃvatsaraṃ nṛpa /
gavāmayanayajñasya phalaṃ prāpnoti mānavaḥ //

haṃsasārasayuktena vimānena sa gacchati /
pañcāśataṃ sahasrāṇi varṣāṇāṃ divi modate //

pakṣepakṣe gate rājanyo'śnīyādvarṣameva tu / ṣaṇmāsānaśanaṃ tasya bhagavānaṅgirā'bravīt /
ṣaṣṭiṃ varṣasahasrāṇi divamāvasate ca saḥ //

viṇānāṃ vallakīnāṃ ca veṇūnāṃ ca viśāmpate /
sughoṣairmadhuraiḥ śabdaiḥ suptaḥ sa pratibodhyate //

saṃvatsaramihaikaṃ tu māsimāsi pibedapaḥ /
phalaṃ viśvajitastāta prāpnoti sa naro nṛpa //

siṃhavyāghraprayuktena vimānena sa gacchati /
saptatiṃ ca sahasrāṇi varṣāṇāṃ divi modate //

māsādūrdhvaṃ naravyāghra nopavāso vidhīyate /
vidhiṃ tvanaśanasyāhuḥ pārtha dharmavido janāḥ //

anārto vyādhirahito gacchedanaśanaṃ tu yaḥ /
padepade yajñaphalaṃ sa prāpnoti na saṃśayaḥ //

divaṃ haṃsaprayuktena vimānena sa gacchati /
śataṃ varṣasahasrāṇāṃ modate sa divi prabho //

śataṃ cāpsarasaḥ kanyā ramayantyapi taṃ naram /
ārto vā vyādhito vā'pi gacchedanaśanaṃ tu yaḥ //

śataṃ varṣasahasrāṇāṃ modate sa divi prabho /
kāñcīnūpuraśabdena suptaścaiva prabodhyate //

sahasrahaṃsayuktena vimānena tu gacchati /
sa gatvā strīśatākīrṇe ramate bharatarṣabha //

kṣīṇasyāpyāyanaṃ dṛṣṭaṃ kṣatasya kṣatarohaṇam /
vyādhitasyauṣadhagrāmaḥ kruddhasya ca prasādanam //

duḥkhitasyārtapūrvasya dravyāṇāṃ pratipādanam /
na caitadrocate teṣāṃ ye dhanaiḥ sukhamedhitāḥ //

ataḥ sa kāmasaṃyukte vimāne hemasannibhe /
ramate strīśatākīrṇe puruṣo'laṅkṛtaḥ śuciḥ //

svasthaḥ saphalasaṅkalpaḥ sukhī vigatakalmaṣaḥ /
anaśnandehamutsṛjya phalaṃ prāpnoti mānavaḥ //

bālasūryapratīkāśe vimāne somavarcasi /
vaidūryamuktākhacite vīṇāmurajanādite //

patākādīpikākīrṇe divyaghaṇṭāninādite /
strīsahasrānucarite sa naraḥ sukhamedhate //

yāvanti romakūpāṇi tasya gātreṣu pāṇḍava /
tāvantyeva sahasrāṇi varṣāṇāṃ divi modate //

nāsti vedātparaṃ śāstraṃ nāsti mātṛsamo guruḥ /
na dharmātparamo lābhastapo nānaśanātparam //

brāhmaṇebhyaḥ paraṃ nāsti pāvanaṃ divi ceha ca /
upavāsaistathā tulyaṃ tapaḥkarma na vidyate //

upoṣya vidhivaddevāstridivaṃ pratipedire /
ṛṣayaśca parāṃ siddhimupavāsairavāpnuvan //

divyavarṣasahasrāṇi viśvāmitreṇa dhīmatā /
kṣāntamekena bhaktena tena vipratvamāgatam //

cyavano jamadagniśca vasiṣṭho gautamo bhṛguḥ /
sarva eva divaṃ prāptāḥ kṣamāvanto maharṣayaḥ //

idamaṅgīrasā pūrvaṃ maharṣibhyaḥ pradarśitam /
yaḥ pradarśayate nityaṃ na sa duḥkhamavāpnute //

imaṃ tu kaunteya yathākramaṃ vidhiṃ pravartitaṃ hyaṅgirasā maharṣiṇā /
paṭhecca yo vai śṛṇuyācca nityadā na vidyate tasya narasya kilbiṣam //

vimucyate cāpi sa sarvasaṅkarai- rna cāsya doṣairabhibhūyate manaḥ /
viyonijānāṃ ca vijānate rutaṃ dhruvāṃ ca kīrtiṃ labhate narottamaḥ //