Mahabharata · Chapter 13.162

kathaṃ jyeṣṭhaḥ kaniṣṭheṣu varteta bharatarṣabha /
kaniṣṭhāśca yathā jyeṣṭhe varteraṃstadbravīhi me //
bhīṣma uvāca /

jyeṣṭhavattāta vartasva jyeṣṭhosi hi tathā bhavān /
gurorgarīyasī vṛttiryā ca śiṣyasya bhārata //

na gurāvakṛtaprajñe śakyaṃ śiṣyeṇa vartitum /
gurau hi sadṛśī vṛttiryathā śiṣyasya bhārata //

andhaḥ syādandhavelāyāṃ jaḍaḥ syādapi vā budhaḥ /
parihāreṇa tadbrūyādyasteṣāṃ syādvyatikramaḥ //

pratyakṣaṃ bhinnahṛdayā bhedayeyuryathā'hitāḥ / śriyā'bhitaptāstadbhedānnabhinnāḥ syuḥ samāhitāḥ
śriyā'bhitaptāḥ kaunteya bhedakāmāstathā'rayaḥ //

jyeṣṭhaḥ kulaṃ vardhayati vināśayati vā punaḥ /
hanti sarvamapi jyeṣṭhaḥ prāyo durvinayādiha //

atha yo vinikurvīta jyeṣṭho bhrātā yavīyasaḥ /
ajyeṣṭhaḥ syādabhāgaśca niyamyo rājabhiśca saḥ //

nikṛtī hi naro lokānpāpāngacchatyasaṃśayam /
viphalaṃ tasya putratvaṃ moghaṃ janayituḥ smṛtam //

pitroranarthāyaka kule jāyate pāpapūruṣaḥ /
akīrtiṃ janayatyeva kīrtimantardadhāti ca //

sarve cāpi vikarmasthā bhāgaṃ nārhanti sodarāḥ / jyeṣṭho'pi durvinītastu kaniṣṭhastu viśeṣataḥ /
nāpradāya kaniṣṭhebhyo jyeṣṭhaḥ kurvīta vetanam //

anujasya piturdāyo jaṅghāśramaphalo'dhvagaḥ /
svayamīheta labdhaṃ tu nākāmo dātumarhati //

bhrātṝṇāmavibhaktānāmutthānamapi cetsaha / na putrabhāgaṃ viṣamaṃ pitā dadyātkadācana /

na jyeṣṭho vā'vamanyeta duṣkṛtaḥ sukṛto'pi vā /
gurūṇāmaparādho hi śakyaḥ kṣantavya eva ca //

yadi strī yadyavaraja śreyaḥ paśyettadācaret /
dharmārthaḥ śreya ityāhustrayo jñātā vidhāyakāḥ //

daśācāryānupādhyāya upādhyāyānpitā daśa / daśa caiva pitṝnmātā sarvāṃ vā pṛthivīmapi /
gauraveṇābhibhavati nāsti mātṛsamo guruḥ //

mātā garīyasī yacca tenaitāṃ manyate gurum /
jyeṣṭho bhrātā pitṛsamo mṛte pitari bhārata //

sa hyeṣāṃ vṛttidātā syātsa caitānpratipālayet /
kaniṣṭhāstaṃ namasyeransarve chandānuvartinaḥ //

tameva copajīveranyathaiva pitaraṃ tathā /
śarīrametau sṛjataḥ pitā matā ca bhārata //

ācāryaśiṣṭā yā jātiḥ sā satyā sā'jarāmarā / jyeṣṭhā mātṛsamā cāpi bhaginī bharatarṣabha /

bhrāturbhāryā ca tadvatsyādyasyā bālye stanaṃ pibet //