Mahabharata · Chapter 13.151

tataḥ śrutisamāpannaḥ saṃskṛśca yathāvidhi /
caulopanayanaṃ tasya yathāvatkriyate dvijaiḥ //

tato'ṣṭame sa varṣe tu vratopanayanādibhiḥ /
kriyābhirvidhidṛṣṭābhirbrahmatvamupanīyate //

gāyatreṇa chandasā tu saṃskṛtaścaritavrataḥ /
adhīyamāno medhāvī śuddhātmā niyatavrataḥ //

acireṇaiva kālena sāṅgānvedānavāpnute /
samāvṛttaḥ sa dharmātmā samāvṛttikriyastathā //

yājanādhyāpanarataḥ kuśale karmaṇi sthitaḥ /
agnihoitraparo nityaṃ devatātithipūjakaḥ //

yajate vividhairyajñairjapayajñaistathaiva ca /
nyāyāgatadhanānveṣī nyāyavṛttastapodhanaḥ //

sarvabhūtahitaścaiva sarvaśāstraviśāradaḥ /
svadāraparituṣṭātmā kratugāmī jitendriyaḥ //

parāpavādavirataḥ satyavrataparaḥ sadā /
sa kālapariṇāmāttu saṃyutaḥ kāladharmaṇā //

saṃskṛtaścāgnihotreṇa yathāvadvidhipūrvakam /
somalokamavāpnoti dehanyāsānna saṃśayaḥ //

tatra somaprabhairdevairagniṣvāttaiśca bhāsvaraiḥ /
tathā barhiṣadaiścaiva devairāṅgirasairapi //

viśvebhiścaiva devaiśca tathā brahmarṣibhiḥ punaḥ / devarṣibhiścāpratimaistathaivāpsarasāṃ gaṇaiḥ /
sādhyaiḥ siddhaiśca satataṃ satkṛtastatra modate //

jātarūpamayaṃ divyamarkatulyaṃ manojavam /
devagandharvasankīrṇaṃ vimānamadhirohati //

saumyarūpā manaḥkāntāstaptakāñcanabhūṣaṇāḥ /
somakanyā vimānasthaṃ ramayanti mudānvitāḥ //

sa tatra ramate prītaḥ saha devaiḥ saharṣibhiḥ /
lokānsarvānanucarandīptatejā manojavaḥ //

sabhāṃ kāmajavīṃ cāpi nityamevābhigacchati /
sarvalokeśvaramṛṣiṃ namaskṛtya pitāmaham //

parameṣṭhiranantaśrīrlokānāṃ prabhavāpyayaḥ / yataḥ sarvāḥ pravartante sargapralayavikriyāḥ /
sa tatra vartate śrīmāndviśataṃ dvijasattama //

atha kālakṣayāttasmātsthānādāvartate punaḥ /
jātidharmāṃstathā sarvānsargādāvartanāni ca //

aśāśvatamidaṃ savemiti cintyopalabhya ca /
śāśvataṃ divyamacalamadīnamapanarbhavam //

āsthāsyatyabhayaṃ nityaṃ yatrāvṛttirna vidyate /
yatri gatvā na mriyate janma cāpi na vidyate //

garbhakleśāmayāḥ prāptā jāyatā ca punaḥ punaḥ /
kāyakleśāśca vividhā dvandvāni vividhāni ca //

śītoṣṇasukhaduḥkhāni īrṣyādveṣakṛtāni ca /
tatratatropabhuktāni na kvacicchāśvatī sthitiḥ //

evaṃ sa niścayaṃ kṛtvā nirmucyi grahabandhanāt /
chittvā bhāryāmayaṃ pāśaṃ tathaivāpatyasambhavam //

yatidharmamupāśrityi guruśuśrūṣaṇe rataḥ /
acireṇaiva kālena śreyaḥ samabhigacchati //

yogaśāstraṃ ca sāṅkhyaṃ ca viditvā so'rthatatvataḥ /
anujñātaśca guruṇā yathāśāstramavasthitaḥ //

puṇyatīrthānusevī ca nadīnāṃ pulināśrayaḥ /
śūnyāgāraniketaśca vanavṛkṣaguhāśayaḥ //

araṇyānucaro nityaṃ devāraṇyaniketanaḥ /
ekarātraṃ dvirātraṃ vā na kvacitsajjate dvijaḥ //

śīrṇaparṇabhugevāpi vane carati bhikṣukaḥ /
na bhogārthamanupretya yātrāmātraṃ samaśnute //

dharmalabdhaṃ samaśnāti na kāmātkiñcidaśnute /
yugamātradṛgadhvānaṃ krośādūrdhvaṃ na gacchati //

samo mānāvamānābhyāṃ samaloṣṭāśmakāñcanaḥ /
sarvabhūtābhayakarastathaivābhayadakṣiṇaḥ //

nirdvandvo nirnamaskāro nirānandaparigrahaḥ /
nirmamo nirahaṅkāraḥ sarvabhūtanirāśrayaḥ //

parisaṅkhyānatatvajñastadā satyarataḥ sadā /
ūrdhvaṃ nādho na tiryakca na kiñcidabhikāmayet //

evaṃ hi ramamāṇastu yatidharmaṃ yathāvidhi /
kālasya pariṇāmāttu yathā pakvaphalaṃ tathā //

sa visṛjya svakaṃ dehaṃ praviśedbrahma śāśvatam /
nirāmayamanādyantaṃ guṇasaumyamacetanam //

nirakṣaramabījaṃ ca nirindriyamajaṃ tathā /
ajayyamakṣayaṃ yattadabhedyaṃ sūkṣmameva ca //

nirguṇaṃ ca prakṛtimannirvikāraṃ ca sarvaśaḥ / bhūtabhavyabhaviṣyasya kālasya parameśvaram /

avyaktaṃ puruṣaṃ kṣetramānantyāya prapadyate //