Mahabharata · Chapter 13.145

evaṃ prayācati tadā bhāskare munisattamaḥ /
jamadagnirmahātejāḥ kiṃ kāryaṃ pratyapadyata //
bhīṣma uvāca /

sa tathā yācamānasya muniragnisamaprabhaḥ /
jamadagniḥ śamaṃ naiva jagāma kurunandana //

tataḥ sūryo madhurayā vācā tamidamabravīt /
kṛtāñjalirviprarūpī praṇamyainaṃ viśāmpate //

calaṃ nimittaṃ viprarṣe sadā sūryasya gacchataḥ /
kataṃ calaṃ bhetsyasi tvaṃ sadā yāntaṃ divākaram //
jamadagniruvāca /

sthiraṃ cāpi calaṃ cāpi jāne tvāṃ jñānacakṣuṣā /
avasyaṃ vinayādhānaṃ kāryamadya mayā tava //

madhyāhne vai nimeṣārdhaṃ tiṣṭasi tvaṃ divākara /
tatra bhetsyāmi sūrya tvāṃ na me'trāsti vicāraṇā //
sūrya uvāca /

asaṃśayaṃ māṃ viprarṣe bhetsyase dhanvināṃvara /
apakāriṇaṃ māṃ viddi bhagavañśaraṇāgatam //
bhīṣma uvāca /

tataḥ prahasya bhagavāñjamadagniruvāca tam /
na bhīḥ sūrya tvayā kāryā praṇipātagato hyasi //

brāhmaṇeṣvārjavaṃ yacca sthairyaṃ ca dharaṇītale /
saumyatāṃ caiva somasya gāmbhīryaṃ varuṇasya ca //

dīptimagneḥ prabhāṃ meroḥ pratāpaṃ dhanadasya ca /
etānyatikramedyo vai sa hanyāccharaṇāgatam //

bhavetsa gurutalpī ca brahmihā ca sa vai bhavet /
surāpānaṃ sa kuryācca yo hanyāccharaṇāgatam //

etasya tvapanītasya samādhiṃ tāta cintaya /
yathā sukhagamaḥ panthā bhavettvadraśmitāpitaḥ //
bhīṣma uvāca /

etāvaduktvā sa tadā tūṣṇīmāsīdbhṛgūttamaḥ /
atha sūryo'dadattasmai chatropānahamāśu vai //
sūrya uvāca /

maharṣe śirasastrāṇāṃ chatraṃ madraśmivāraṇam / pratigṛhṇīṣva padbhyāṃ ca trāṇārthaṃ carmapāduke /

adyaprabhṛti caiveha loke sampracariṣyati /
puṇyakeṣu ca sarveṣu paramakṣayyameva ca //
bhīṣma uvāca /

upānahau ca cchatraṃ ca sūryeṇaitatpravartitam /
puṇyametadabhikhyātaṃ triṣu lokeṣu bhārata //

tasmātprayaccha vipreṣu chatropānahamuttamam /
dharmaste sumahānbhāvī na me'trāsti vicāraṇā //

chatraṃ hi bharataśreṣṭhaḥ yaḥ pradadyāddvijātaye /
śubhraṃ śataśalākaṃ vai sa pretya sukhamedhate //

sa śakraloke vasati pūjyamāno dvijātibhiḥ /
apsarobhiśca satataṃ devaiśca bharatarṣabha //

upānahau ca yo dadyācchlakṣṇau snehasamanvitau /
snātakāya mahābāho saṃśitāya dvijātaye //

sopi lokānavāpnoti devatairabhipūjitān /
goloke sa mudā yukto vasati pretya bhārata //

etatte bharataśreṣṭha mayā kārtsnyena kīrtitam /
chatropānahadānasya phalaṃ bharatasattama //