Mahabharata · Chapter 13.105

atraiva kīrtyate sadbhirbrāhmaṇasvābhimarśane /
nṛgeṇa sumahatkṛcchruṃ yadavāptaṃ kurūdvaha //

niviśantyāṃ purā pārtha dvāravatyāmiti śrutiḥ / adṛśyata mahākūpastṛṇavīrutsamāvṛtaḥ /

prayatnaṃ tatra kurvāṇāstasmātkūpājjalārthinaḥ /
śrameṇa mahatā yuktāstasmiṃstoye susaṃvṛte //

dadṛśuste mahākāyaṃ kṛkalāsamavasthitam /
tasya coddharaṇe yatnamakurvaṃste sahasraśaḥ //

pragrahaiścarmapaṭṭaiśca taṃ baddhvā parvatopamam /
nāśaknuvansamuddhartuṃ tato jagmurjanārdanam //

khamāvṛtyodapānasya kṛkalāsaḥ sthito mahān /
tasya nāsti samuddhartetyetatkṛṣṇe nyavedayan //

sa vāsudevena samuddhṛtaśca pṛṣṭaśca kāmānnijagāda rājā /
nṛgastadā'tmānamatho nyavedaya- tpurātanaṃ yajñasahasrayājinam //

tathā bruvāṇaṃ tu tamāha mādhavaḥ śubhaṃ tvayā karma kṛtaṃ na pāpakam /
kathaṃ bhavāndurgatimīdṛśīṃ gato narendra tadbrūhi kimetadīdṛśam //

śataṃ sahasrāṇi gavāṃ śataṃ punaḥ punaḥ śatānyaṣṭaśatāyutāni /
nṛpa dvijebhyaḥ kva nu tadgataṃ tava //

nṛgastato'bravītkṛṣṇaṃ brāhmaṇasyāgnihotriṇaḥ /
proṣitasya paribhraṣṭā gaurekā mama godhane***** //

gavāṃ sahasre saṃkhyātā tadā sā paśupairmama /
sā brāhmaṇāya me dattā pretyārthamabhikāṅkṣatā //

apaśyatparimārgaṃśca tāṃ gāṃ paragṛhe dvijaḥ /
mameyamiti covāca brāhmaṇo yasya sā'bhavat //

tāvubhau samanuprāptau vivadantau bhṛśajvarau /
bhavāndātā bhavānhartetyatha tau māmavocatām //

śatena śatasaṅkhyena gavāṃ vinimayena vai /
yāce pratigrahītāraṃ sa tu māmabravīdidam //

deśakālopasampannā dogdhrī śāntā'tivatsalā /
svādukṣīrapradā dhanyā mama nityaṃ niveśane //

kṛśaṃ ca bharate sā gaurmama putramapastanam /
na sā śakyā mayā dātumityuktvā sa jagāma ha //

tatastamaparaṃ vipraṃ yāce vinimayena vai /
gavāṃ śatasahasraṃ hi tatkṛte gṛhyatāmiti //
brāhmaṇa uvāca /

na rājñāṃ pratigṛhṇāmi śakto'haṃ svasya mārgaṇe /
saiva gaurdīyatāṃ śīghraṃ mameti madhusūdana //

rukmamaśvāṃśca dadato rajatasyandanāṃstathā /
na jagrāha yayau cāpi tadā sa brāhmaṇarṣabhaḥ //

etasminneva kāle tu coditaḥ kāladharmaṇā /
pitṛlokamahaṃ prāpya dharmarājamupāgamam //

yamastu pūjayitvā māṃ tato vacanamabravīt /
nāntaḥ saṅkhyāyate rājaṃstava puṇyasya karmaṇaḥ //

asti caiva kṛtaṃ pāpamajñānāttadapi tvayā /
carasva pāpaṃ paścādvā pūrvaṃ vā tvaṃ yathecchasi //

rakṣitāsmīti coktaṃ te pratijñā cānṛtā tava /
brāhmaṇasvasya cādānaṃ dvividhaste vyatikramaḥ //

pūrvaṃ kṛcchaṃ cariṣye'haṃ paścācchubhamiti prabho /
dharmarājaṃ bruvannevaṃ patitosmi mahītale //

aśrauṣaṃ patitaścāhaṃ yamasyoccaiḥ prabhāṣataḥ /
vāsudevaḥ samuddhartā bhavitā te janārdanaḥ //

pūrṇe varṣasahasrānte kṣīṇe karmaṇi duṣkṛte /
prāplasyase śāśvatām̐llokāñjitānsvenaiva karmaṇā //

kūpe'tmānamadhaḥśīrṣamapaśyaṃ patitaṃ ca ha /
tiryagyonimanuprāptaṃ na ca māmajahātsmṛtiḥ //

tvayā tu tārito'smyadya kimanyatra tapobalāt /
anujānīhi māṃ kṛṣṇa gaccheyaṃ divamadya vai //

anujñātaḥ sa kṛṣṇena namaskṛtya janārdanam /
vimānaṃ divyamāsthāya yayau divamarindamaḥ //

tatastasmindivaṃ yāte nṛge bharatasattama /
vāsudeva imāñślokāñjagāda kurunandana //

brāhmaṇasvaṃ na hartavyaṃ puruṣeṇa vijānatā /
brāhmaṇasvaṃ hṛtaṃ hanti nṛgaṃ brāhmaṇagauriva //

satāṃ samāgamaḥ sadbhirnāphalaḥ pārtha vidyate /
vimuktaṃ narakātpaśya nṛgaṃ sādhusamāgamāt //

pradānaṃ phalavattatra drohastatra tathā'phalaḥ /
apahāraṃ gavāṃ tasmādvarjayeta yudhiṣṭhira //