Mahabharata · Chapter 13.100

sarvānkāmānprayacchanti ye prayacchanti kāñcanam /
ityevaṃ bhagavānatriḥ pitāmahasuto'bravīt //

pavitraṃ śucyathāyuṣyaṃ pitṛṇāmakṣyaṃ ca tat /
suvarṇaṃ manujendreṇa hariścandreṇa kīrtitam //

pānīyaparamaṃ dānaṃ dānānāṃ manurabravīt /
tasmātkūpāṃśca vāpīśca taṭākāni ca svānayet //

sarvaṃ vināśayetpāpaṃ puruṣasyeha karmaṇaḥ /
kūpaḥ pravṛttapānīyaḥ supravṛttaśca nityaśaḥ //

sarvaṃ tārayate vaṃśaṃ yasya khāte jalāśaye /
gāvaḥ pibanti viprāśca sādhavaśca narāḥ sadā //

nidāghakāle pānīyaṃ yasya tiṣṭhatyavāritam /
sa durgaṃ viṣamaṃ kṛtsnaṃ na kadācidavāpnute //

bṛhaspaterbhagavataḥ pūṣṇaścaiva bhagasya ca /
aśvinoścaiva vahneśca prītirbhavati sarpiṣā //

paramaṃ bheṣajaṃ hyetadyajñānāmetaduttamam /
rasānāmuttamaṃ caitatphalānāṃ caitaduttamam //

phalakāmo yaśaskāmaḥ puṣṭikāmaśca nityadā /
ghṛtaṃ dadyāddvijātibhyaḥ puruṣaḥ śucirātmavān //

ghṛtaṃ māse āśvayuji viprabhyo yaḥ prayacchati /
tasmai prayacchato rūpaṃ prītau devāvihāśvinau //

pāyasaṃ sarpiṣā miśraṃ dvijebhyo yaḥ prayacchati /
gṛhaṃ tasya na rakṣāṃsi dharṣayanti kadācana //

pipāsayā na mriyate sopacchandaśca jāyate /
na prāpnuyācca vyasanaṃ karakānyaḥ prayacchati //

prayato brāhmaṇāgre yaḥ śraddhayā parayā yutaḥ /
upasparśanaṣaḍbhāgaṃ labhate puruṣaḥ sadā //

yaḥ sādhanārthaṃ kāṣṭhāni brāhmaṇebhyaḥ prayacchati /
pratāpanārthaṃ rājendra vṛttavadbhyaḥ sadā naraḥ //

siddhyantyarthāḥ sadā tasya kāryāṇi vividhāni ca /
uparyupari śatrūṇāṃ vapuṣā dīpyate ca saḥ //

bhagavāṃścāpi samprato vahnirbhavati nityaśaḥ /
na taṃ tyajanti paśavaḥ saṅgrāme ca jayatyapi //

putrāñśriyaṃ ca labhate yaśchatraṃ sampracchati /
na cakṣurvyādhiṃ labhate yajñabhāgamathāśnute //

nidāghakāle varṣe vā yaśchatraṃ samprayacchati / nāsya kaścinmanodāhaḥ kadācidapi jāyate /
kṛcchrātsa viṣamāccaiva kṣipraṃ mokṣamavāpnute //

pradānaṃ sarvadānānāṃ śakaṭasya viśāmpate /
evamāha mahābhāgaḥ śāṇḍilyo bhagavānṛṣiḥ //