Mahabharata · Chapter 12.92

kathaṃ dharme sthātumicchanrājā varteta bhārata /
pṛcchāmi tvāṃ kuruśreṣṭha tanme brūhi pitāmaha //
bhīṣma uvāca /

atrāpyudāharantīmamitihāsaṃ purātanam /
gītaṃ dṛṣṭārthatattvena vāmadevena dhīmatā //

rājā vasumanā nāma kausalyo balavāñśuciḥ /
maharṣi paripapraccha vāmadevaṃ tapasvinam //

dharmārthasahitairvākyairbhagavannanuśādhi mām /
yena vṛttena vai tiṣṭhanna cyaveyaṃ svadharmataḥ //

tamabravīddhāmadevastejasvī tapatāṃ varaḥ /
hemavarṇaṃ sukhāsīnaṃ yayātimiva nāhuṣam //
vāmadeva uvāca /

dharmamevānuvartasva na dharmādvidyate param /
dharme sthitā hi rājāno jayanti pṛthivīminām //

arthasiddheḥ paraṃ dharmaṃ manyate yo mahīpatiḥ /
vṛddhyāṃ ca kurute bṛddhiṃ sa dharmeṇa virājate //

adharmadarśī yo rājā balādeva pravartate /
kṣipramevāpayāto'smādubhau prathamamadhyamau //

asatpāpiṣṭhasacivo vadhyo lokasya dharmahā /
sahaiva parivāreṇa kṣipramevāvasīdati //

arthānāmananuṣṭhātā kāmacārī vikatthanaḥ /
api sarvāṃ mahīṃ labdhvā kṣiprameva vinaśyati //

athādadānaḥ kalyāṇamanasūyurjitendriyaḥ /
vardhate matimānrājā srotobhiriva sāgaraḥ //

na pūrṇo'smīti manyeta dharmataḥ kāmato'rthataḥ /
buddhito mantrataścāpi satataṃ vasudhādhipa //

eteṣveva hi sarveṣu lokayātrā pratiṣṭhitā /
etāni śṛṇvam̐llabhate yaśaḥ kīrti śriyaṃ prajāḥ //

evaṃ yo dharmasaṃrambhī dharmārthaparicintakaḥ /
arthānparīkṣyārabhate sa dhruvaṃ mahadaśnute //

adātā hyanabhisneho daṇ़ḍenāvartayanprajāḥ /
sāhasaprakṛtī rājā kṣiprameva vinaśyati //

atha pāpaṃ kṛtaṃ buddhyā na ca paśyatyabuddhimān /
akīrtyā'bhisamāyukto bhūyo narakamaśnute //

tato na yāciturdātuḥ śuklasya rasavedinaḥ /
vyasanaṃ svamivotpannaṃ vijighāṃsanti mānavāḥ //

yasya nāsti gururdharme na cānyānapi pṛcchati /
sukhatantro'rthalābheṣu na ciraṃ sukhamaśnute //

gurupradhāno dharmeṣu svayamarthānavekṣitā /
dharmapradhāno lābheṣu sa ciraṃ sukhamaśnute //