Mahabharata · Chapter 12.84

atrāpyudāharantīmamitihāsaṃ purātanam /
bṛhaspateśca saṃvādaṃ śakrasya ca yudhiṣṭhira //
śakra uvāca /

kiṃsvidekapaḍhaṃ brahmanpuruṣaḥ samyagācaran /
pramāṇaṃ sarvabhūtānāṃ yaśaścaivāpnuyānmahat //
bṛhaspati uvāca /

sāntvamekapadaṃ śakra puruṣaḥ samyagācaran /
pramāṇaṃ sarvabhūtānāṃ yaśaścaivāpnuyānmahat //

etadekapadaṃ śakra sarvalokasukhāvaham /
ācaransarvabhūteṣu priyo bhavati sarvadā //

yo hi nābhāṣate kiñcitsarvadā bhukuṭīmukhaḥ /
dveṣyo bhavati bhūtānāṃ sa sāntvamiha nācaran //

yastu sarvamabhiprekṣya pūrvamevābhibhāṣate /
smitapūrvābhibhāṣī ca tasya lokaḥ prasīdati //

dānameva hi sarvatra sāntvenānabhijalpitam /
na prīṇayati bhūtāni nirvyañjanamivāśanam //

ādadannapi bhūtānāṃ madhurāmīrayangiram /
sarvalokamimaṃ śakra sāntveva kurute vaśe //

tasmātsāntvaṃ prayoktavyaṃ daṇḍamādhitsatā'pi hi /
prītiṃ ca janayatyevaṃ na cāsyodvijate janaḥ //

sukṛtasya hi sāntvasya ślakṣṇasya madhurasya ca /
samyagāsevyamānasya tulyaṃ jātu na vidyate //
bhīṣma uvāca /

ityuktaḥ kṛtavānsarvaṃ yathā śakraḥ purodhasā /
tathā tvamapi kaunteya samyagetatsamācara //