મહાભારત · અધ્યાય 12.84

અત્રાપ્યુદાહરન્તીમમિતિહાસં પુરાતનમ્ ।
બૃહસ્પતેશ્ચ સંવાદં શક્રસ્ય ચ યુધિષ્ઠિર ॥
શક્ર ઉવાચ ।

કિંસ્વિદેકપઢં બ્રહ્મન્પુરુષઃ સમ્યગાચરન્ ।
પ્રમાણં સર્વભૂતાનાં યશશ્ચૈવાપ્નુયાન્મહત્ ॥
બૃહસ્પતિ ઉવાચ ।

સાન્ત્વમેકપદં શક્ર પુરુષઃ સમ્યગાચરન્ ।
પ્રમાણં સર્વભૂતાનાં યશશ્ચૈવાપ્નુયાન્મહત્ ॥

એતદેકપદં શક્ર સર્વલોકસુખાવહમ્ ।
આચરન્સર્વભૂતેષુ પ્રિયો ભવતિ સર્વદા ॥

યો હિ નાભાષતે કિઞ્ચિત્સર્વદા ભુકુટીમુખઃ ।
દ્વેષ્યો ભવતિ ભૂતાનાં સ સાન્ત્વમિહ નાચરન્ ॥

યસ્તુ સર્વમભિપ્રેક્ષ્ય પૂર્વમેવાભિભાષતે ।
સ્મિતપૂર્વાભિભાષી ચ તસ્ય લોકઃ પ્રસીદતિ ॥

દાનમેવ હિ સર્વત્ર સાન્ત્વેનાનભિજલ્પિતમ્ ।
ન પ્રીણયતિ ભૂતાનિ નિર્વ્યઞ્જનમિવાશનમ્ ॥

આદદન્નપિ ભૂતાનાં મધુરામીરયન્ગિરમ્ ।
સર્વલોકમિમં શક્ર સાન્ત્વેવ કુરુતે વશે ॥

તસ્માત્સાન્ત્વં પ્રયોક્તવ્યં દણ્ડમાધિત્સતાઽપિ હિ ।
પ્રીતિં ચ જનયત્યેવં ન ચાસ્યોદ્વિજતે જનઃ ॥

સુકૃતસ્ય હિ સાન્ત્વસ્ય શ્લક્ષ્ણસ્ય મધુરસ્ય ચ ।
સમ્યગાસેવ્યમાનસ્ય તુલ્યં જાતુ ન વિદ્યતે ॥
ભીષ્મ ઉવાચ ।

ઇત્યુક્તઃ કૃતવાન્સર્વં યથા શક્રઃ પુરોધસા ।
તથા ત્વમપિ કૌન્તેય સમ્યગેતત્સમાચર ॥