Mahabharata · Chapter 12.70

ktena vṛttena vṛttakṣa vartamāno mahīpatiḥ /
sukhenāryāntusukhodarkāniha ca pretya cāśnute //
bhīṣma uvāca /

itthaṃ guṇānāṃ ṣaṭ्triṃśī ṣaṭ्triṃśadguṇasaṃyutā /
yānguṇāṃstu guṇopetaḥ kurvanguṇamavāpnuyāt //

careddharmānakaṭuko muñcetsnehaṃ na cāstikaḥ /
anṛśaṃsaścaredarthaṃ caretkāmamanuddhataḥ //

priyaṃ brūyādakṛpaṇaḥ śūraḥ syādavikatthanaḥ /
dātā nāpātravarṣī syātpragalbhaḥ syādaniṣṭhuraḥ //

sandadhīta na cānāryairvigṛhṇīyācca śatrubhiḥ /
nānāptaiścārayeccāraṃ kuryātkāryamapīḍayā //

arthaṃ brūyānna cāsatsu guṇānbrūyānna cātmanaḥ /
ādadyānna ca sādhubhyo nāsatpuruṣamāśrayet //

nāparīkṣya nayeddaṇḍaṃ na ca mantraṃ prakāśayet /
visṛjenna ca lubdhebhyo viśvasennāpakāriṣu //

anīrṣurguptadāraḥ syāccokṣaḥ syādaghṛṇī nṛpaḥ /
striyaḥ seveta nātyarthaṃ mṛṣṭaṃ bhuñjīta nāhitam //

astabdhaḥ pūjayanmānyāngurūnsevedamāyayā /
arceddevānadambhena śriyamicchedakṛtsitām //

seveta praṇayaṃ hitvā dakṣaḥ syānna tvakālavit /
sāntvayenna ca mokṣāya anugṛhṇanna cākṣipet //

praharenna tvavijñāya hatvā śatrūnna śocayet /
krodhaṃ kuryānna cākasmānmṛduḥ syānnāpakāriṣu //

evaṃ carasva rājyastho yadi śreya ihecchasi /
ato'nyathā narapatirbhayamṛcchatyanuttamam //

iti sarvānguṇānetānyathoktānyo'nuvartate /
anubhūyeha bhadrāṇi pretya svarge mahīyate //
vaiśampāyana uvāca /

idaṃ vacaḥ śāntanavasya śuśruvā nyudhiṣṭhiraḥ pārthivamukhyasaṃvṛtaḥ /
tadā vavande ca pitāmahaṃ nṛpo yathoktametacca cakāra buddhimān //