મહાભારત · અધ્યાય 12.43

તતો વિસર્જયામાસ સર્વાસ્તાઃ પ્રકૃતીર્નૃપઃ ।
વિવિશુશ્ચાભ્યનુજ્ઞાતા યથાસ્વાનિ ગૃહાણિ તે ॥

તતો યુધિષ્ઠિરો રાજા ભીમં ભીમપરાક્રમમ્ ।
સાન્ત્વયન્નબ્રવીચ્છ્રીમાનર્જુનં યમજૌ તથા ॥

શત્રુભિર્વિવિધૈઃ શસ્ત્રૈઃ ક્ષતદેહા મહારણે ।
શ્રાન્તા ભવન્તઃ સુભૃશં તાપિતાઃ શોકમન્યુભિઃ ॥

અરણ્યે દુઃખવસતિર્મત્કૃતે ભરતર્ષભાઃ ।
ભવદ્ભિરનુભૂતા હિ યથા કાપુરુષૈસ્તથા ॥

યથાસુખં યથાજોષં જયોઽયમનુભૂયતામ્ ।
વિશ્રાન્તાઁલ્લબ્ધવિશ્વાસાઞ્શ્વઃ સમેતાઽસ્મિ વઃ પુનઃ ॥

તતો દુર્યોધનગૃહં પ્રાસાદૈરુપશોભિતમ્ ।
બહુરત્નસમાકીર્ણં દાસીદાસસમાકુલમ્ ॥

ધૃતરાષ્ટ્રાભ્યનુજ્ઞાતં ભ્રાત્રા દત્તં વૃકોદરઃ ।
પ્રતિપેદે મહાબાહુર્મન્દિરં મઘવાનિવ ॥

યથા દુર્યોધનગૃહં તથા દુઃશાસનસ્ય તુ ।
પ્રાસાદભાલાસંયુક્તં હેમતોરણભૂષિતમ્ ॥

દાસીદાસસુસમ્પૂર્ણં પ્રભૂતધનધાન્યવત્ ।
પ્રતિપેદે મહાબાહુરર્જુનો રાજશાસનાત્ ॥

દુર્મર્ષણસ્ય ભવનં દુઃશાસનગૃહાદ્વરમ્ ।
કુબેરભવનપ્રખ્યં મણિહેમવિભૂષિતમ્ ॥

નકુલાય વરાર્હાય કર્શિતાય મહાવને ।
દદૌ પ્રીતો મહારાજ ધર્મપુત્રો યુધિષ્ઠિરઃ ॥

દુર્મુખસ્ય ચ વેશ્માગ્ર્યં શ્રીમત્કનકભૂષણમ્ ।
પૂર્ણપઝદલાક્ષીણાં સ્ત્રીણાં શયનસન્કુલમ્ ॥

પ્રદદૌ સહદેવાય સન્તતં પ્રિયકારિણે ।
મુમુદે તચ્ચ લબ્ધ્વાઽસૌ કૈલાસં ધનદો યથા ॥

યુયુત્સુર્વિદુરશ્ચૈવ સઞ્જયશ્ચ વિશામ્પતે ।
સુધર્મા ચૈવ ધૌમ્યશ્ચ યથા સ્વાઞ્જગ્મુરાલયાન્ ॥

સહ સાત્યકિના શૌરિરર્જુનસ્ય નિવેશનમ્ ।
વિવેશ પુરુષવ્યાઘ્રો વ્યાઘ્રો ગિરિગુહામિવ ॥

તત્ર ભક્ષ્યાન્નપાનૈસ્તે મુદિતાઃ સુસુખોષિતાઃ ।
સુખપ્રબદ્ધા રાજાનમુપતસ્થુર્યુધિષ્ઠિરમ્ ॥