Mahabharata · Chapter 12.42

abhiṣikto mahāprājño rājyaṃ prāpya yudhiṣṭhiraḥ /
dāśārhaṃ puṇḍarīkākṣamuvāca prāñjaliḥ śuciḥ //

tava kṛṣṇa prasādena nayena na balena ca /
buddhyā ca yaduśārdūla tathā vikramaṇena ca //

punaḥ prāptamidaṃ rājyaṃ pitṛpaitāmahaṃ mayā /
namaste puṇḍarīkākṣa punaḥ punararindama //

tvāmekamāhuḥ puruṣaṃ tvāmāhuḥ sātvatāṃ patim /
nāmabhistvāṃ bahuvidhaiḥ stuvanti prayatā dvijāḥ //

viśvakarmannamaste'stu viśvātmanviśvasambhava /
viṣṇo jiṣṇo hare kṛṣṇa vaikuṇṭha puruṣottama //

adityāḥ saptadhā tvaṃ tu purāṇo garbhatāṃ gataḥ /
pṛśnigarbhastvamevaikastriyugaṃ tvāṃ vadantyapi //

śuciśravā hṛṣīkeśo ghṛtārcirhaṃsa ucyate /
tricakṣuḥ śambhurekastvaṃ vibhurdāmodaro'pi ca //

varāho'gnirbṛhadbhānurvṛṣabhastārkṣyalakṣaṇaḥ /
anīkasāhaḥ puruṣaḥ śipiviṣṭa urukramaḥ //

variṣṭha ugrasenānīḥ satyo vājasanirguhaḥ /
acyutaścyāvano'rīṇāṃ saṃskṛto vikṛtirvṛṣaḥ //

kṛṣṇadharmastvamevādirvṛṣadarbho vṛṣākapiḥ /
sindhurvidhūrmistrikakup tridhāmā trivṛdacyutaḥ //

samrāḍ virāṭ svarāṭ caiva svarāḍ्bhūtamayo bhavaḥ /
vibhūrbhūratibhūḥ kṛṣṇaḥ kṛṣṇavartmā tvameva ca //

sviṣṭakṛdbhiṣajāvartaḥ kapilastvaṃ ca vāmanaḥ /
yajño dhruvaḥ pataṅgaśca jayatsenastvamucyase //

śikhaṇḍī nahuṣo babhrurdivispṛk tvaṃ punarvasuḥ /
subabhrū rukmayajñaśca suṣeṇo dundubhistathā //

gabhastinemiḥ śrīpajhaḥ puṣkaraḥ śuṣmadhāraṇaḥ /
ṛbhurvibhuḥ sarvasūkṣmastva dharitrī ca paṭhyase //

ambhonidhistvaṃ brahmā tvaṃ pavitraṃ dhāma dhāmavit /
hiraṇyagarbhaḥ puruṣaḥ svadhā svāhā ca keśavaḥ //

yonistvamasya pralayaśca kṛṣṇa tvamevedaṃ sṛjasi viśvamagre /
viśvaṃ cedaṃ tvadvaśe viśvayone namostu te śārṅgacakrāsipāṇe //
vaiśampāyana uvāca /

evaṃ stuto dharmarājena kṛṣṇaḥ sabhāmadhye prītimānpuṣkarākṣaḥ /
tamabhyanandadbhārataṃ puṣkalābhi rvāgbhirjyeṣṭhaṃ pāṇḍavaṃ yādavāgryaḥ //

etannāmaśataṃ viṣṇordharmarājena kīrtitam / yaḥ paṭhecchṛṇuyādvāpi sarvapāpaiḥ pramucyate //