Mahabharata · Chapter 12.3

karṇasya bāhuvīryeṇa praśrayeṇa damena ca /
tutoṣa bhṛguśārdūlo guruśuśrūṣayā tathā //

tatastasmai mahātejā brahmāstraṃ sanivartanam /
provāca sumahāprajñaḥ sa tapasvī tapasvine //

viditāstrastataḥ karṇo ramamāṇo'śrame bhṛgoḥ /
cakāra vai dhanurvede yatnamadbhutavikramaḥ //

tataḥ kadācidrāmastu carannāśramamantikāt /
karṇena sahito dhīmānupavāsena karśitaḥ //

suṣvāpa jāmadagnyastu visrambhotpannasauhṛdaḥ /
tasyotsaṅge samādhāya śiraḥ klāntamanā guruḥ //

atha krimiḥ śleṣmamayo māṃsaśoṇitabhojanaḥ /
dāruṇo dāruṇākāraḥ karṇasyābhyāśamāgataḥ //

sa tasyorumathāsādya bibheda rudhirāśanaḥ /
na cainamaśakatkṣeptuṃ vaktuṃ vā'pi gurorbhayāt //

sa daśyamāno'pi tathā kṛmiṇā tena bhārata /
guroḥ prabodhanākāṅkṣī tamupaikṣata sūryajaḥ //

karṇastu vedanāṃ dhairyādasahyāṃ vinigṛhya tām /
akampayannavyathayandhārayāmāsa bhārgavam //

yadā sa rudhireṇāṅge parispṛṣṭo'bhavadguruḥ /
tadā'budhyata tejasvī saṃrabdhaścainamabravīt //

aho'smyaśucitāṃ prāptaḥ kimidaṃ ca kṛtaṃ tvayā /
kathayasva bhayaṃ tyaktvā yāthātathyamidaṃ mama //

tasya karṇastadācaṣṭa kṛmiṇā paribhakṣaṇam /
dadarśa rāmastaṃ cāpi kṛmiṃ sūkarasaṃsthitam //

aṣṭapādaṃ tīkṣṇadaṃṣṭraṃ sūcībhiḥ parisaṃvṛtam /
romabhiḥ sanniruddhāṅgamalarkaṃ nāma nāmataḥ //

sa dṛṣṭamātro rāmeṇa kimiḥ prāṇānavāsṛjat /
tasminnevāsṛji klinnastadadbhutamivābhavat //

tato'ntarikṣe dadṛśe viśvarūpaḥ karālavān /
rākṣaso lohitagrīvaḥ kṛṣṇāṅgo meghavāhanaḥ //

sa rāmaṃ prāñjalirbhūtvā babhāṣe pūrṇamānasaḥ /
svasti te bhṛguśārdūla gamiṣye'haṃ yathāgatam //

mokṣito narakādasmādbhavatā munisattama / bhadraṃ ca te'stu siddhiśca priyaṃ me bhavatā kṛtam

tamuvāca mahābāhurjāmadagnyaḥ pratāpavān /
kastvaṃ kasmācca narakaṃ pratipanno bravīhi tat //

so'bravīdahamāsaṃ prāgdaṃśo nāma mahāsuraḥ /
purā devayuge tāta bhṛgostu savayā iva //

so'haṃ bhṛgoḥ sudayitāṃ bhāryāmapaharaṃ balāt /
maharṣerabhiśāpena krimibhūto'pataṃ bhuvi //

abravīddhi sa māṃ kruddhastava pūrvapitāmahaḥ /
mūtra śleṣmāśanaḥ pāya nirayaṃ pratipatsyase //

śāpasyānto bhavedbrahmannityevaṃ tamathābravam /
bhavitā bhārgavādrāmādinti māmabravīdbhṛguḥ //

so'hamenāṃ gatiṃ prāpto yathā nakuśalastathā /
tvayā sādho samāgamya vimuktaḥ pāpayonitaḥ //

evamuktvā namaskṛtya yayau rāmaṃ mahāsuraḥ /
rāmaḥ karṇaṃ tu sakrodhamidaṃ vacanamabravīt //

atiduḥkhamidaṃ mūḍha na jātu brāhmaṇaḥ sahet /
kṣatriyasyeva te dhairyaṃ kāmayā satyamucyatām //

tamuvāca tataḥ karṇaḥ śāpādbhītaḥ prasādayan /
brahmakṣatrāntare jātaṃ sūtaṃ māṃ viddhi bhārgava //

rādheyaḥ karṇa iti māṃ pravadanti janā bhuvi /
prasādaṃ kuru me brahmannastralubdhasya bhārgava //

pitā gururna sandeho vedavidyāpradaḥ prabhuḥ /
ato bhārgava ityuktaṃ mayā gotraṃ tavāntike //

tamuvāca bhṛguśreṣṭhaḥ saropaḥ pradahanniva /
bhūmau nipatitaṃ dīnaṃ vepamānaṃ kṛtāñjalim //

yasmānmithyāvicīrṇo'hamastralobhādiha tvayā /
tasmādetanna te mūḍha brahmāstraṃ pratibhāsyati //

anyatra vadhakālātte sadṛśe na samīyupaḥ /
abrāhmaṇe na hi brahma ciraṃ tiṣṭhetkadācana //

gacchedānīṃ na te sthānamanṛtasyeha vidyate /
na tvayā sadṛśo yuddhe bhavitā kṣatriyo bhuvi //

evamuktaḥ sa rāmeṇa nyāyenopajagāmaha /
duryodhanamupāgamya kṛtāstro'smīti cābravīt //