મહાભારત · અધ્યાય 12.39

તતઃ કુન્તીસુતો રાજા ગતમન્યુર્ગતજ્વરઃ ।
કાઞ્ચને પ્રાડ્ભુખો હૃષ્ટો ન્યષીદત્પરમાસને ॥

તમેવાભિમુખૌ પીઠે પ્રદીપ્તે કાઞ્ચને શુભે ।
સાત્યકિર્વાસુદેવશ્ચ નિષીદતુરરિન્દમૌ ॥

મધ્યે કૃત્વા તુ રાજાનં ભીમસેનાર્જુનાવુભૌ ।
નિષીદતુર્મહાત્માનૌ શ્લક્ષ્ણયોર્મણિપીઠયોઃ ॥

દાન્તે શય્યાસને શુભ્રે જામ્બૂનદવિભૂષિતે ।
પૃથાઽપિ સહદેવેન સહાસ્તે નકુલેન ચ ॥

સુધર્મા વિદુરો ધૌમ્યો ધૃતરાષ્ટ્રશ્ચ કૌરવઃ ।
નિષેદુર્જ્વલનાકારેષ્વાસનેષુ પૃથક્પૃથક્ ॥

યુયુત્સુઃ સઞ્જયશ્ચૈવ ગાન્ધારી ચ યશસ્વિની ।
ધૃતરાષ્ટ્રો યતો રાજા તતઃ સર્વે સમાવિશન્ ॥

તત્રોપવિષ્ટો ધર્માત્મા શ્વેતાઃ સુમનસોઽસ્પૃશત્ ।
સ્વસ્તિકાનક્ષતાન્ભૂમિં સુવર્ણં રજતં મણીન્ ॥

તતઃ પ્રકૃતયઃ સર્વાઃ પુરસ્કૃત્ય પુરોહિતમ્ ।
દદૃશુર્ધર્મરાજાનમાદાય બહુમઙ્ગલમ્ ॥

પૃથિવીં ચ સુવર્ણં ચ રત્નાનિ વિવિધાનિ ચ ।
આભિષેચનિકં ભાણ્ડં સર્વસમ્ભારસમ્ભૃતમ્ ॥

કાઞ્ચનૌદુમ્બરાસ્તત્ર રાજતાઃ પૃથિવીમયાઃ ।
પૂર્ણકુમ્ભાઃ સુમનસો લાજા બર્હીષિ ગોરસાઃ ॥

શમીપિપ્પલપાલાશસમિધો મધુસર્પિષી ।
સ્રુવ ઔદુમ્બરઃ શઙ્ખસ્તથા હેમવિભૂષિતઃ ॥

દાશાર્હેણાભ્યનુજ્ઞાતસ્તત્ર ધૌમ્યઃ પુરોહિતઃ ।
પ્રાગુદક્પ્રવણે વેદીં લક્ષણેનોપલિખ્ય ચ ॥

વ્યાઘ્રચર્મોત્તરે શુક્લે સર્વતોભદ્ર આસને ।
દૃઢપાદપ્રતિષ્ઠાને હુતાશનસમત્વિપિ ॥

ઉપવેશ્ય મહાત્માનં કૃષ્ણાં ચ દ્રુપદાત્મજામ્ ।
જુહાવ પાવકં ધીમાન્વિધિમન્ત્રપુરસ્કૃતમ્ ॥

તત ઉત્થાય દાશાર્હઃ શઙ્ખમાદાય પૂરિતમ્ । અભ્યષિઞ્ચત્પતિં પૃથ્વ્યાઃ કુન્તીપુત્રં યુધિષ્ઠિરમ્ ।
ધૃતરાષ્ટ્રશ્ચ રાજર્ષિઃ સર્વાઃ પ્રકૃતયસ્તથા ॥

અનુજ્ઞાતોઽથ કૃષ્ણેન ભ્રાતૃભિઃ સહ પાણ્ડવઃ ।
પાઞ્ચજન્યાભિષિક્તશ્ચ રાજાઽમૃતમુખોઽભવત્ ॥

તતોઽનુવાદયામાસુઃ પણવાનકદુન્દુભીન્ ॥

ધર્મરાજોઽપિ તત્સર્વં પ્રતિજગ્રાહ ધર્મતઃ ।
પૂજયામાસ તાંશ્ચાપિ વિધિવદ્ભૂરિદક્ષિણઃ ॥

તતો નિષ્કસહસ્રેણ બ્રાહ્મણાન્સ્વસ્ત્યવાચયન્ ।
વેદાધ્યયનસમ્પન્નાન્ધૃતિશીલસમન્વિતાન્ ॥

તે પ્રીતા બ્રાહ્મણા રાજન્સ્વસ્ત્યૂચુર્જયમેવ ચ ।
હંસા ઇવ ચ નર્દન્તઃ પ્રશશંસુર્યુધિષ્ઠિરમ્ ॥

યુધિષ્ઠિર મહાબાહો દિષ્ટ્યા જયસિ પાણ્ડવ ।
દિષ્ટ્યા સ્વધર્મં પ્રાપ્તોઽસિ વિક્રમેણ મહાદ્યુતે ॥

દિષ્ટ્યા ગાણ્ડીવધન્વા ચ ભીમસેનશ્ચ પાણ્ડવઃ ।
ત્વં ચાપિ કુશલી રાજન્માદ્રીપુત્રૌ ચ પાણ્ડવૌ ॥

મુક્તા વીરક્ષયાત્તસ્માત્સન્ગ્રામાદ્વિજિતદ્વિષઃ ।
ક્ષિપ્રમુત્તરકાર્યાણિ કુરુ સર્વાણિ ભારત ॥

તતઃ પ્રીત્યાઽર્ચિતઃ સદ્ભિર્ધર્મરાજો યુધિષ્ઠિરઃ ।
પ્રતિપેદે મહદ્રાજ્યં સુહૃદ્ભિઃ સહ ભારત ॥