મહાભારત · અધ્યાય 12.368

અથ તેન નરશ્રેષ્ઠ બ્રાહ્મણેન તપસ્વિના ।
નિરાહારેણ વસતા દુઃખિતાસ્તે ભુજઙ્ગમાઃ ॥

સર્વે સમ્ભૂય સહિતા હ્યસ્ય નાવસ્ય બાન્ધવાઃ ।
ભ્રાતરસ્તનયા ભાર્યા યયુસ્તં બ્રાહ્મણં પ્રતિ ॥

તેઽપશ્યન્પુલિને તં વૈ વિવિક્તે નિયતવ્રતમ્ ।
સમાસીનં નિરાહારં દ્વિજં જપ્યપરાયણમ્ ॥

તે સર્વે સમભિક્રમ્ય વિપ્રમભ્યર્ચ્ય ચાસકૃત્ ।
ઊચુર્વાક્યમસન્દિગ્ધમાતિથેયસ્ય બાન્ધવાઃ ॥

ષષ્ઠો હિ દિવસસ્તેઽદ્ય પ્રાપ્તસ્યેહ તપોધન ।
ન ચાભિભાષસે કિઞ્ચિદાહારં ધર્મવત્સલ ॥

આમાનભિગતશ્ચાસિ વયં ચ ત્વામુપસ્થિતાઃ ।
કાર્યં ચાતિથ્યમસ્માભિરીપ્સિતં તવ ઋદ્ધિમત્ ॥

મૂલં ફલં વા પર્ણં વા પયો વા દ્વિજસત્તમ ।
આહારહેતોરન્નં વા ભોક્તુમર્હસિ બ્રાહ્મણ ॥

ત્યક્તાહારેણ ભવતા વને નિવસતા ત્વયા ।
બાલવૃદ્ધમિદં સર્વં પીડ્યતે ધર્મસન્કરાત્ ॥

ન હિ નો ભ્રૂણહા કશ્ચિત્પન્નગેષ્વિહ વિદ્યતે ।
પૂર્વાશી વા કુલે હ્યસ્મિન્દેવતાતિથિબન્ધુષુ ॥
બ્રાહ્મણ ઉવાચ ।

ઉપદેશેન યુષ્માકમાહારોઽયં કૃતો મયા ।
દ્વિરૂનં દશરાત્રં વૈ નાગસ્યાગમનં પ્રતિ ॥

યદ્યષ્ટરાત્રેઽતિક્રાન્તે નાગમિષ્યતિ પન્નગઃ ।
તદાહારં કરિષ્યામિ તન્નિમિત્તમિદ વ્રતમ્ ॥

કર્તવ્યો ન ચ સન્તાપો ગમ્યતાં ચ યથાગતમ્ ।
તન્નિમિત્તમિદં સર્વં નૈતદ્ભેત્તુગિહાર્હથ ॥

તે તેન સમનુજ્ઞાતા બ્રાહ્મણેન ભુજઙ્ગમાઃ ।
સ્વમેવ ભવનં જગ્મુરકૃતાર્થા નરર્ષભ ॥