Mahabharata · Chapter 12.338

aśokaṃ śokanāśārthaṃ śāstraṃ śāntikaraṃ śivam /
niśamya labhate buddhiṃ tāṃ labdhvā sukhamedhate //

śokasthānasahasrāṇi bhayasthānaśatāni ca /
divasedivase mūḍhamāviśanti na paṇḍitam //

tasmādaniṣṭanāśārthamitihāsaṃ nibodha me /
tiṣṭhate cedvaśe buddhirlabhate śokanāśanam //

aniṣṭasamprayogācca viprayogātpriyasya ca /
manuṣyā mānasairduḥkhairyujyante svalpabuddhyaḥ //

dravyeṣu samatīteṣu ye guṇāstānna cintayet /
na tānādriyamāṇasya snehabandhaḥ pramucyate //

doṣadarśī bhavettatra yatra rāgaḥ pravartate /
aniṣṭvaddhitaṃ paśyettathā kṣipraṃ virajyate //

nārtho na dharmo na yaśo yo'tītamanuśocati /
apyabhāvena yujyeta taccāsya na nivartate //

guṇairbhūtāni yujyante viyujyante tathaiva ca /
sarvāṇi naitadekasya śokasthānaṃ hi yujyate //

mṛtaṃ vā yadi vā naṣṭaṃ yo'tītamanuśocati /
duḥkhena labhate duḥkhaṃ dvāvanarthau prapadyate //

nāśru kurvanti ye buddhyā dṛṣṭvā lokeṣu santatim /
samyakprapaśyataḥ sarvaṃ nāśrukarmopapadyate //

duḥkhopaghāte śārīre mānase cāpyupasthite /
yasminna śakyate kartuṃ yatnastannānucintayet //

bhaiṣajyametadduḥkhasya yadetannānucintayet /
cintyamānaṃ hi na vyeti bhūyaścāpi pravardhate //

prajñayā mānasaṃ duḥkhaṃ hanyācchārīramauṣadhaiḥ /
etadvijñānamasāmarthyaṃ na bālaiḥ samatāmiyāt //

anityaṃ yauvanaṃ rūpaṃ jīvitaṃ dravyasañcayaḥ /
ārogyaṃ priyasaṃsargo gṛdhyettatra na paṇḍitaḥ //

na jānapadikaṃ duḥkhamekaḥ śocitumarhati /
aśocanpratikurvīta yadi paśyedupakramam //

sukhādbahutaraṃ duḥkhaṃ jīvite nātra saṃśayaḥ /
snigdhatvaṃ cendriyārtheṣu mohānmaraṇamapriyam //

parityajati yo duḥkhaṃ sukhaṃ vā'pyubhayaṃ naraḥ /
abhyeti brahma sotyantaṃ na taṃ śocanti paṇḍitāḥ //

tyajante duḥkhamarthā hi pālanena ca te sukhāḥ /
duḥkhena cādhigamyante nāśameṣāṃ na cintayet //

anyāmanyāṃ dhanāvasthāṃ prāpya vaiśeṣikīṃ narāḥ /
atṛptā yānti vidhvaṃsaṃ santoṣaṃ yānti paṇḍitāḥ //

sarve kṣayāntā nicayāḥ patanāntāḥ samucchrayāḥ /
saṃyogā viprayogāntā maraṇāntaṃ hi jīvitam //

anto nāsti pipāsāyāstuṣṭistu paramaṃ sukham /
tasmātsantoṣameveha dhanaṃ paśyanti paṇḍitāḥ //

nimeṣamātramapi hi vayo gacchanna tiṣṭhati /
svaśarīreṣvanityeṣu nityaṃ kimanucintayet //

bhūteṣu bhāvaṃ sañcintya ye buddhvā manasaḥ param /
na śocanti gatādhvānaḥ paśyantaḥ paramāṃ gatiṃ //

sañcinvānakamevainaṃ kāmānāmavitṛptakam /
vyāghraḥ paśumivāsādya mṛtyurādāya gacchati //

tathā'pyupāyaṃ sampaśyedduḥkhasya parimokṣaṇe /
aśocannārabhetaiva yuktaścāvyasanī bhavet //

śabde sparśe ca rūpe ca gandheṣu ca raseṣu ca /
nopabhogātparaṃ kiñciddhanino vā'dhanasya ca //

prāksamprayogādbhūtānāṃ nāsti duḥkhaṃ parāyaṇam /
viprayogāttu sarvasya na śocetprakṛtisthitaḥ //

dhṛtyā śiśnodaraṃ rakṣetpāṇipādaṃ ca cakṣuṣā /
cakṣuḥśrotre ca manasā mano vācaṃ ca vidyayā //

praṇayaṃ pratisaṃhṛtya sasnigdheṣvitareṣu ca /
vicaredasamunnaddhaḥ sa sukhī sa ca paṇḍitaḥ //

adhyātmaratirāsīno nirapekṣo nirāmiṣaḥ /
ātmanaiva sahāyena yaścaretsa sukhī bhavet //