Mahabharata · Chapter 12.32

yudhiṣṭhirasya tadvākyaṃ śrutvā dvaipāyanastadā /
parīkṣya nipuṇaṃ buddhyā ṛṣiḥ provāca pāṇḍavam //
vyāsa uvāca /

mā viṣādaṃ kṛthā rājankṣatradharmamanusmaran /
svadharmeṇa hatā hyete kṣatriyāḥ kṣatriyarṣabha //

kāṅkṣamāṇāḥ śriyaṃ kṛtsnāṃ pṛthivyāṃ ca mabadyaśaḥ /
kṛtāntavidhisaṃyuktāḥ kālena nidhanaṃ gatāḥ //

nṛ tvaṃ hantā na bhīmo'yaṃ nārjuno na yamāvapi /
kālaḥ paryāyadharmeṇa prāṇānādatta dehinām //

na tasya mātāpitarau nānugrāhyo hi kaścana /
karmasākṣī prajānāṃ yastena kālena saṃhṛtāḥ //

hetumātramidaṃ tasya vihitaṃ bharatarṣabha /
yaddhanti bhūtairbhūtāni tadasmai rūpamaiśvaram //

karma mūrtyātmakaṃ viddhi sākṣiṇaṃ śubhapāpayoḥ /
sukhaduḥkhaguṇodarkaṃ kālaṃ kālaphalapradam //

teṣāmapi mahābāho karmāṇi paricintaya /
vināśahetukāni tvaṃ yaistai kālavaśaṃ gatāḥ //

ātmanaśca vijānīhi niyatavrataśīlatām /
yadā tvamīdṛśaṃ karma vidhinā'kramya kāritaḥ //

tvaṣṭreva vihitaṃ yantraṃ yathā ceṣṭayiturvaśe /
karmaṇā kālayuktena tathedaṃ bhrāmyate jagat //

puruṣasya hi dṛṣṭvemāmutpattimanimittataḥ /
yadṛcchayā vināśaṃ ca śokaharṣāvanarthakau //

vyalīkamapi yattvatra cittavaitaṃsikaṃ tava /
tadarthamiṣyate rājanprāyaścittaṃ tadācara //

idaṃ tu śrūyate pārtha yuddhe devāsure purā /
asurā bhrātaro jyeṣṭhā devāścāpi yavīyasaḥ //

teṣāmapi śrīnimittaṃ mahānāsītsamucchrayaḥ /
yuddhaṃ varṣasahasrāṇi dvātriṃśadabhavatkila //

ekārṇavāṃ mahīṃ kṛtvā rudhireṇa pariplutām /
jaghnurdaityāṃstathā devāstridivaṃ cābhilebhire //

tathaiva pṛthivīṃ labdhvā brāhmaṇā vedapāragāḥ /
saṃśritā dānavānāṃ vai sāhyārthaṃ darpamohitāḥ //

śālāvṛkā iti khyātāstriṣu lokeṣu bhārata /
aṣṭāśītisahasrāṇi te cāpi viburdhairhatāḥ //

dharmavyucchittimicchato ye'dharmasya pravartakāḥ /
hantavyāste durātmāno devairdaityā ivolvaṇāḥ //

ekaṃ hatvā yadi kule śiṣṭānāṃ syādanāmayam /
kulaṃ hatvā ca rāṣṭre ca na tadvṛttopaghātakam //

adharmarūpo dharmo hi kaścidasti narādhipa /
dharmarūpo hyadharmaśca tacca jñeyaṃ vipaścitā //

tasmātsaṃstambhayātmānaṃ śrutavānasi pāṇḍava /
devaiḥ pūrvagataṃ mārgamanuyāto'si bhārata //

na hīdṛśā gamiṣyanti narakaṃ pāṇḍavarṣabha /
bhrātṝnāśvāsayaitāṃstvaṃ suhṛdaśca parantapa //

yo hi pāpasamārambhe kārye tadbhāvabhāvitaḥ /
kurvannapi tathaiva syātkṛtvā ca nirapatrapaḥ //

tasmiṃstatkaluṣaṃ sarvaṃ samastamiti śabditam /
prāyaścittaṃ na tasyāsti hrāso vā pāpakarmaṇaḥ //

tvaṃ tu śuklābhijātīyaḥ paradoṣeṇa kāritaḥ /
anicchamānaḥ karmedaṃ kṛtvā ca paritapyase //

aśvamedho mahāyajñaḥ prāyaścittamudāhṛtam /
tamāhara mahārāja vipāpmaivaṃ bhaviṣyasi //

marudbhiḥ saha jitvā'rīnbhagavānpākaśāsanaḥ /
ekaikaṃ kratumāhṛtya śatakṛtvaḥ śatakratuḥ //

dhūtapāpmā jitasvargo lokānprāpya sukhodayān /
marudgaṇairvṛtaḥ śakraḥ śuśubhe bhāsayandiśaḥ //

svarge loke mahīyantamapsarobhiḥ śacīpatim /
ṛṣayaḥ paryupāsante devāśca vibudheśvaram //

seyaṃ tvāmanusamprāptā vikrameṇa vasundharā /
nirjitāśca mahīpālā vikrameṇa tvayā'nadha //

teṣāṃ purāṇi rāṣṭrāṇi gatvā rājansuhṛdvṝtaḥ /
bhrātṝnputrāṃśca pautrāṃśca svesve rājye'bhiṣecaya //

bālānapi ca garbhasthānsāntvena samudācaran /
rañjayanprakṛtīḥ sarvāḥ paripāhi vasundharām //

kumāro nāsti yeṣāṃ ca kanyāstatrābhiṣecaya /
kāmāśayo hi strīvargaḥ śokamevaṃ prahāsyasi //

evamāśvāsanaṃ kṛtvā sarvarāṣṭreṣu bhārata /
yajasva vājimedhena yathendro vijayī purā //

aśocyāste mahātmānaḥ kṣatriyāḥ kṣatriyarṣabha /
svakarmabhirgatā nāśaṃ kṛtāntabalamohitāḥ //

avāptaḥ kṣatradharmaste rājyaṃ prāptamakaṇṭakam /
rakṣa svadharmaṃ kaunteya śreyānyaḥ pretyabhāvikaḥ //