Mahabharata · Chapter 12.30

tato rājā pāṇḍusuto nāradaṃ pratyabhāṣata /
bhagavañchrotumicchāmi suvarṇaṣṭhīvisambhavam //

evamuktastu sa munirdharmarājena nāradaḥ /
ācacakṣe yathāvṛttaṃ suvarṇaṣṭhīvinaṃ prati //
nārada uvāca /

evametanmahābāho yathā'yaṃ keśavo'bravīt /
kāryasyāsya tu yaccheṣaṃ tatte vakṣyāmi pṛcchataḥ //

ahaṃ ca parvataścaiva svasrīyo me mahāpnuniḥ /
vastukāmāvabhigatau sṛñjayaṃ jayatāṃ varam //

tatrāvāṃ pūjitau tena vidhidṛṣṭena karmaṇā /
sarvakāmaiḥ suvihitau nivasāvo'sya veśmani //

vyatikrāntāsu varṣāsu samaye gamanasya ca /
parvato māmuvācedaṃ kāle vacanamarthavat //

āvāmasya narendrasya gṛhe paramapūjitau /
uṣitau samaye brahmaṃstadvicintaya sāmpratam //

tato'hamabruvaṃ rājanparvataṃ subhadarśanam /
sarvametattvayi vibho bhāgineyopapadyate //

vareṇa cchandyatāṃ rājā labhatāṃ yadyadicchati /
āvayostapasā siddhiṃ prāpnotu yadi manyase //

tata āhūya rājānaṃ sṛñjayaṃ jayatāṃ varam /
parvato'numato vākyamuvāca kurupuṅgava //

prītau svo nṛpa satkārairbhavadārjavasambhṛtaiḥ /
āvābhyāmabhyanujñāto varaṃ nṛvara cintaya //

devānāmavihiṃsāyāṃ na bhavenmānuṣe kṣamam /
tadgṛhāṇa mahārāja pūjārho nau mato bhavān //
sṛñjaya uvāca /

prītau bhavantau yadi me kṛtametāvatā mama /
eṣa eva paro lābho nirvṛtto me mahāphalaḥ //

tamevaṃvādinaṃ bhūyaḥ parvataḥ pratyabhāṣata /
śṛṇu rājansusankalpaṃ yatte hṛdi ciraṃ sthitam //

abhīpsasi sutaṃ vīraṃ vīryavantaṃ dṛḍhavratam /
āyuṣmataṃ mahābhāgaṃ devarājasamadyutim //

bhaviṣyatyeṣa te kāmo na tvāyuṣmānbhaviṣyati /
devarājābhibhūtyarthaṃ sankalpo hye te hṛdi //

suvarṇaṣṭhīvanāccaiva svarṇaṣṭhīvī bhaviṣyati /
rakṣyaśca devarājātsa devarājasamadyutiḥ //

tacchrutvā sṛñjayo vākyaṃ parvatasya mahātmanaḥ /
prasādayāmāsa tadā naitadevaṃ bhavediti //

āyuṣmānme bhavetputro bhavatostapasa muna /
na ca taṃ parvataḥ kiñciduvācendravyapekṣayā //

tamahaṃ nṛpatiṃ dīnamabravaṃ punareva ca /
smartavyo'smi mahārāja darśayiṣyāmi te sutam //

ahaṃ te dayitaṃ putraṃ pretarājavaśaṃ gatam /
punardāsyāmi tadrūpaṃ mā śucaḥ pṛthivīpate //

evamuktvā tu nṛpatiṃ prayātau svo yathepsitam /
sṛñjayaśca yathākāmaṃ praviveśa svamandiram //

sṛñjayasyātha rājarṣeḥ kasmiṃścitkālaparyaye /
jajñe putro mahāvīryastejasā prajvalanniva //

vavṛdhe sa yathākālaṃ sarasīva mahotpalam /
babhūva kāñcanaṣṭhīvī yathārthaṃ nāma tasya tat //

tadadbhutatamaṃ loke paprathe kurusattama /
bubudhe tacca devendro varadānaṃ manīṣiṇoḥ //

tataḥ svābhibhavādbhīto bṛhaspatimate sthitaḥ /
kumārasyāntaraprekṣī nityamevābhyavartata //

codayāmāsa tadvajraṃ divyāsraṃ mūrtimatsthritam /
vyāghro bhūtvā jahīmaṃ tvaṃ rājaputramiti prabho //

pravṛddhaḥ kila vīryeṇa māmeṣo'bhibhaviṣyati /
sṛñjayasya suto vajra yathainaṃ parvato'bravīt //

evamuktastu śakreṇa vajraḥ parapurañjayaḥ /
kumāramantaraprekṣī nityamevānvapadyata //

sṛñjayo'pi sutaṃ prāpya devarājasamadyutim /
hṛṣṭaḥ sāntaḥ puro rājā vananityo babhūva ha //

tato bhāgīrathītīre kadācinnirjane vane /
dhātrīdvitīyo bālaḥ sa krīḍārthaṃ paryadhāvata //

pañcavarṣakadeśīyo bālo nāgendravikramaḥ /
sahasotpatitaṃ vyāghramāsasāda mahābalam //

sa bālastena niṣpiṣṭo vepamāno nṛpātmajaḥ /
vyasuḥ papāta medinyāṃ tato dhātrī vicukruśe //

hatvā tu rājaputraṃ sa tatraivāntaradhīyata /
śārdūlo devarājasya māyayāntarhitastadā //

dhātryāstu ninadaṃ śrutvā rudatyāḥ paramārtavat /
abhyadhāvata taṃ deśaṃ svayameva mahīpatiḥ //

sa dadarśa śayānaṃ taṃ gatāsuṃ pītaśoṇitam /
kumāraṃ vigatānandaṃ niśākaramiva cyutam //

sa tamutsaṅgamāropya paripīḍitavakṣasam /
putraṃ rudhirasaṃsiktaṃ paryadevayadāturaḥ //

tatastā mātarastasya rudatyaḥ śokakarśitāḥ /
abhyadhāvanta taṃ deśaṃ yatra rājā sa sṛñjayaḥ //

tataḥ sa rājā sasmāra māmeva gatamānasaḥ /
tadā'haṃ cintanaṃ jñātvā gatavāṃstasya darśanam //

mayaitāni ca vākyāni śrāvitaḥ śokalālasaḥ /
yāni te yaduvīreṇa kathitāni mahīpate //

sañjīvitaścāpi punarvāsavānumate tadā /
bhavitavyaṃ tathā tacca na tacchakyamato'nyathā //

tata ūrdhvaṃ kumārastu svarṇaṣṭhīvī mahāyaśāḥ /
cittaṃ prasādayāmāsa pitṛrmātuśca vīryavān //

kārayāmāsa rājyaṃ ca pitari svargate nṛpa /
varṣāṇāṃ śatamekaṃ ca sahasraṃ bhīmavikramaḥ //

tata īje mahāyajñairbahubhirbhūridakṣiṇaiḥ /
tarpayāmāsa devāṃśca pitṝṃścaiva mahādyutiḥ //

utpādya ca bahūnputrānkulasatānakāriṇaḥ /
kālena mahatā rājankāladharmamupeyivān //

sa tvaṃ rājendra sañjātaṃ śokamekaṃ nivartaya /
yathā tvaṃ keśavaḥ prāha vyāmaśca sumahātapāḥ //

pitṛpaitāmahaṃ rājyamāsthāya dhuramudvaha /
iṣṭvā puṇyairmahāyajñairiṣṭaṃ lokamavāpsyasi //