Mahabharata · Chapter 12.299

vṛttiḥ sakāśādvarṇebhyastribhyo hīnasya śobhanā /
prītyopanītā nirdiṣṭā dharmiṣṭhānkurute sadā //

vṛttiścennāsti śūdrasya pitṛpaitāmahī dhruvā /
na vṛttiṃ parato mārgecchuśrūṣāṃ tu prayojayet //

sadbhistu saha saṃsargaḥ śobhate dharmadarśibhiḥ /
nityaṃ sarvāsvavasthāsu nāsadbhiriti me matiḥ //

yathodayagirau dravyaṃ sannikarṣeṇa dīpyate /
tathā satsannikarṣeṇa hīnavarṇo'pi dīyate //

yādṛśena hi varṇena bhāvyate śuklamambaram /
tādṛśaṃ kurute rūpametadevamavehi me //

tasmādguṇeṣu rajyethā mā doṣeṣu kadācana /
anityamiha martyānāṃ jīvitaṃ hi calācalam //

sukhe vā yadi vā duḥkhe vartamāno vicakṣaṇaḥ /
yaścinoti śubhānyeva sa bhadrāṇīha paśyati //

dharmādapetaṃ yatkarma yadyapi syānmahāphalam /
na tatseveta medhāvī na taddhitamihocyate //

dharmeṇa sahitaṃ yattu bhavedalpaphalodayam / tatkāryamaviśaṅkena karmātyantaṃ sukhāvaham //

yo hṛtvā gosahasrāṇi nṛpo dadyādarakṣitā /
sa śabdamātraphalabhāgrājā bhavati taskaraḥ //

svayambhūrasṛjaccāgre dhātāraṃ lokasatkṛtam /
dhātā'sṛjatputramekaṃ lokānāṃ dhāraṇe ratam //

tamarcayitvā vaiśyastu kuryādatyarthamṛddhimat /
rakṣitavyaṃ tu rājanyairupayojyaṃ dvijātibhiḥ //

ajihnairaśaṭhakrodhairhavyakavyaprayoktṛbhiḥ /
śūrdairnirmārjanaṃ kāryamevaṃ dharmo na naśyati //

apranaṣṭe tato dharme bhavanti sukhitāḥ prajāḥ /
sukhena tāsāṃ rājendra modante divi devatāḥ //

tasmādyo rakṣati nṛpaḥ sa dharmeṇeti pūjyate /
adhīte cāpi yo vipro vaiśyo yaścārjane rataḥ //

yaśca śuśrūṣate śūdraḥ satataṃ niyatendriyaḥ /
ato'nyathā manuṣyendra svadharmātparihīyate //

prāṇasantāpanirdiṣṭāḥ kākiṇyo'pi mahāphalāḥ /
nyāyenopārjitā dattāḥ kimutānyāḥ sahasraśaḥ //

satkṛtya hi dvijātibhyo yo dadāti narādhipaḥ /
yādṛśaṃ tādṛśaṃ nityamaśnāti phalamūrjitam //

abhigamya tu yaddattaṃ dharmyamāhurabhiṣṭutam /
yācitena tu yaddattaṃ tadāhurmadhyamaṃ phalam //

avajñayā dīyate yattathaivāśraddhayā'pi vā /
tadāhuradhamaṃ dānaṃ munayaḥ satyavādinaḥ //

atikrāmenmajjamāno vividhena naraḥ sadā /
tathā prayatnaṃ kurvīta yathā mucyeta saṃśayāt //

damena śobhate vipraḥ kṣatriyo vijayena tu /
dhanena vaiśyaḥ śṛdrastu nityaṃ dākṣyeṇa śobhate //