Mahabharata · Chapter 12.290

prācetasasya dakṣasya kathaṃ vaivasvatentare / vināśamagamadbrahmanhayamedhaḥ prajāpateḥ /
kathaṃ sa cābhavadbrahmanhayameva prajāpateḥ //

devyā manyukṛtaṃ matvā kruddhaḥ sarvātmakaḥ prabhuḥ / prasādāttasya dakṣeṇa sa yajñaḥ sandhitaḥ katham /
etadveditumiccheyaṃ tanme brūhi yathātatham //
vaiśampāyana uvāca /

purā himavataḥ pṛṣṭhe dakṣo vai yajñamāharat /
gaṅgādvāre śubhe deśe ṛṣisiddhaniṣevite //

gandharvāpsarasākīrṇe nānādrumalatāvṛte /
ṛṣisaṅghaiḥ parivṛtaṃ dakṣaṃ dharmabhṛtāṃ varam //

pṛthivyāmantarikṣe ca ye ca svarlokavāsinaḥ /
sarve prājjalayo bhūtvā upatasthuḥ prajāpatim //

devadānavagandharvāḥ piśācoragarākṣasāḥ /
hāhā hūhūśca gandharvau tumbururnāradastathā //

viśvāvasurviśvaseno gandharvāpsarasastathā /
ādityā vasavo radrāḥ sādhyāḥ saha marudgaṇaiḥ //

indreṇa sahitāḥ sarve āgatā yajñabhāginaḥ /
ūṣmapāḥ somapāścaiva dhūmapā ājyapāstathā //

ṛṣayaḥ pitaraścaiva āgatā brahmaṇā saha /
ete cānye ca bahavo bhūtagrāmāścaturvidhāḥ //

jarāyujāṇḍajāścaiva sahasā svedajodbhijaiḥ /
āhūtā mantritāḥ sarve devāśca saha patnibhiḥ //

virājante vimānasthā dīpyamānā ivāgnayaḥ /
tāndṛṣṭvā manyunā'viṣṭo dadhīcirvākyamabravīt //

nāyaṃ yajño na vā dharmo yatra rudro na ijyate /
vadhabandhaṃ prapannā vai kinnu kālasya paryayaḥ //

kinnu mohānna paśyanti vināśaṃ paryupasthitam /
upasthitaṃ bhayaṃ ghoraṃ na budhyanti yahādhvare //

ityuktvā sa mahāyogī paśyati dhyānacakṣuṣā /
sa paśyati mahādevaṃ devīṃ ca varadāṃ śubhām //

nāradaṃ ca mahātmānaṃ tasyā devyāḥ samīpataḥ /
santoṣaṃ paramaṃ lebhe iti niścitya yogavit //

ekamantrāstu te sarve yeneśo na nimantritaḥ /
tasmāddeśādapakramya dadhīcirvākyamabravīt //

apūjyapūjanāccaiva pūjyānāṃ cāpyapūjanāt /
nṛghātakasamaṃ pāpaṃ śaśvatprāpnoti mānavaḥ //

anṛtaṃ noktapūrvaṃ me na ca vakṣye kadācana /
devatānāmṛṣīṇāṃ ca madhye satyaṃ bravīmyaham //

āgataṃ paśubhartāraṃ sraṣṭāraṃ jagataḥ patim /
adhvare hyagrabhoktāraṃ hyarveṣāṃ paśyata prabhum //
dakṣa uvāca /

santi no bahavo rudrāḥ śūlahastāḥ kapardinaḥ /
ekādaśasthānagatā nāhaṃ vedmi maheśvaram //
dadhīciruvāca /

sarveṣāmeva mantro'yaṃ yenāsau na nimantritaḥ / yathā'haṃ śankarādūrdhvaṃ nānyaṃ paśyāmi daivatam /
tathā dakṣasya vipulo yajño'yaṃ nabhaviṣyati //
dakṣa uvāca /

etanmakheśāya suvarṇapātre haviḥ samastaṃ vidhimantrapūtam /
viṣṇornayāmyapratimasya bhāgaṃ prabhurvibhuścāhavanīya eṣaḥ //
devyuvāca /

kiṃ nāma dānaṃ niyamaṃ tapo vā kuryāmahaṃ yena patirmamādya /
labheta bhāgaṃ ca tathaiva sarvaṃ prabhurvibhuścāhavanīya eṣaḥ / labheta bhāgaṃ bhagavānacintyo hyardhaṃ tathā bhāgamatho tṛtīyam //

evaṃ bruvāṇāṃ bhagavānsvapatnīṃ prahṛṣṭarūpaḥ kṣubhitāmuvāca /
na vetsi māṃ devi kṛśodarāṅgi kiṃ nāma yuktaṃ vacanaṃ makheśe //

ahaṃ vijānāmi viśālanetre dhyānena hīnā na vidantyasantaḥ /
tavādya mohena ca sendradevā lokāstrayaḥ sarvata eva mūḍhāḥ //

māmadhvare śaṃsitāraḥ stuvanti rathantaraṃ sāmagāścopagānti /
māṃ brāhmaṇā brahmavido yajante mamādhvaryavaḥ kalpayante ca bhāgam //
devyuvāca /

suprākṛto'pi puruṣaḥ sarvaḥ strījanasaṃsadi /
stauti garvāyate cāpi svamātmānaṃ na saṃśayaḥ //
śrībhagavānuvāca /

nātmānaṃ staumi deveśi paśya me tanumadhyame /
yaṃ srakṣyāmi varārohe yāgārthe varavarṇini //

ityuktvā bhagavānpatnīmumāṃ prāṇairapi priyām /
so'sṛjadbhagavānvakrādbhūtaṃ ghoraṃ praharṣaṇam //

tamuvācākṣipa makhaṃ dakṣasyeti maheśvaraḥ /
tato vakrādvimuktena siṃhenaikena līlayā //

devyā manyuvyapohārthaṃ hato dakṣasya vai kratuḥ /
manyunā ca mahābhīmā mahākālī maheśvarī //

ātmanaḥ karmasākṣitve tena sārdhaṃ sahānugā /
devasyānumataṃ matvā praṇamya śirasā tataḥ //

ātmanaḥ sadṛśaḥ śauryādbalarūpasamanvitaḥ /
sa eva bhagavānkrodhaḥ pratirūpasamanvitaḥ //

anantabalavīryaśca anantabalapauruṣaḥ /
vīrabhadra iti khyāto devyā manyupramārjakaḥ //

so'sṛjadromakūṣebhyo raumyānnāma gaṇeśvarān /
rudratulyā gaṇā raudrā rudravīryaparākramāḥ //

te nipetustatastūrṇaṃ dakṣayajñavihiṃsayā /
bhīmarūpā mahākāyāḥ śataśo'tha sahasraśaḥ //

tataḥ kilakilāśabdairākāśaṃ pūrayanti ca /
tena śabdena mahatā trastāstatra divaukasaḥ //

parvatāśca vyaśīryanta cakampe ca vasundharā /
mārutāścaiva ghūrṇante cukṣubhe varuṇālayaḥ //

agnayo naiva dīpyante naiva dīpyati bhāskaraḥ /
grahā caiva prakāśante nakṣatrāṇi na candramāḥ //

ṛṣayo na prakāśante na devā na ca mānuṣāḥ /
evaṃ tu timirībhūte nirdahantyapamānitāḥ //

praharantyapare ghorā yūpānutpāṭayanti ca /
pramardanti tathā cānye vimardanti tathā'pare //

ādhāvanti pradhāvanti vāyuvegā manojavāḥ /
cūrṇyante yajñapātrāṇi divyānyābharaṇāni ca //

viśīryaramāṇā dṛśyante tārā iva nabhastale /
divyānnapānabhakṣyāṇāṃ rāśayaḥ parvatopamāḥ //

kṣīranadyo'tha dṛśyante dhṛtapāyasakardamāḥ /
dadhimaṇḍedakā divyāḥ khaṇḍaśarkaravālukāḥ //

ṣaḍrasā nivahantyetā guḍakulyā manoramāḥ /
uccāvacāni māṃsāni bhakṣyāṇi vividhāni ca //

pānakāni ca divyāni lehyacoṣyāṇi yāni ca /
bhṛñjate vividhairvakrairvilumpantyākṣipanti ca //

rudrakopānmahākāyāḥ kālāgnisadṛśopamāḥ /
kṣobhayansurasainyāni bhīkṣayantaḥ samantataḥ //

krīḍanti vividhākārāścikṣiṣuḥ surayoṣitaḥ /
rudrakrodhātprayatnena sarvadevaiḥ surakṣitam //

taṃ yajñamadahacchīghnaṃ rudrakarmā samantataḥ /
cakāra bhairavaṃ nādaṃ sarvabhūtabhayankaram //

chittvā śiro vai yajñasya nanāda ca mumoda ca /
tato brahmādayo devā dakṣaścaiva prajāpatiḥ //

ūcuḥ prāñjalayaḥ sarve kathyatāṃ ko bhavāniti /
vīrabhadra uvāca /
nāhaṃ rudro na vā devī naiva bhoktumihāgataḥ //

devyā manyukṛtaṃ matvā kruddhaḥ sarvātmakaḥ prabhuḥ /
draṣṭuṃ vā naiva viprendrānnaiva kautūhalena vā //

tava yajñavighātārthaṃ samprāptaṃ viddhi māmiha /
vīrabhadra iti khyāto rudrakopādviniḥsṛtaḥ //

bhadrakālīti vikhyātā devyāḥ kopādviniḥ sṛtā /
preṣitau devadevena yajñāntikamihāgatau //

śaraṇaṃ gaccha viprendra devadevamumāpatim /
varaṃ krodho'pi devasya varadānaṃ na cānyataḥ //

vīrabhadravacaḥ śrutvā dakṣo dharmabhṛtāṃ varaḥ /
toṣayāmāsa stotreṇa praṇipatyaṃ maheśvaram //

prapadye devamīśānaṃ śāśvataṃ dhruvamavyayam /
mahādevaṃ mahātmānaṃ viśvasya jagataḥ patim //

dakṣaprajāpateryajñeḥ dravyaistaiḥ susamāhitaiḥ /
āhūtā devatāḥ sarvā ṛṣayaśca tapodhanāḥ //

devo nāhūyate tatra viśvakarmā maheśvaraḥ /
tatra kruddhā mahādevī gaṇāṃstatra vyasarjayat //

pradīpte yajñavāṭe tu vidguteṣu dvijātiṣu /
tārāgaṇamanuprāpte raudre dīpte mahātmani //

śūlanirbhinnahṛdayaiḥ kūjadbhiḥ paricārakaiḥ /
nikhātotpāṭitairyūrapaviddhairitastataḥ //

utpatadbhiḥ patadbhiśca gṛdhrairāmiṣagṛddhibhiḥ /
pakṣavātavinirdhūtaiḥ śivāśatanināditaiḥ //

yakṣagandharvasaṅghaiśca piśācoragarākṣamaiḥ /
prāṇāpānau sannirudhya vakrasthānena yatnataḥ //

vicārya sarvato dṛṣṭiṃ bahudṛṣṭiramitrajit /
sahasā devadeveśo hyagnikuṇḍātsamutthitaḥ //

vibhratsūryasahasrasya tejaḥ saṃvartakopamaḥ /
smitaṃ kṛtvā'vravīdvākyaṃ brūhi kiṃ karavāṇi te //

śrāvite ca makhādhyāye devānāṃ guruṇā tataḥ /
tamuvācājjaliṃ kṛtvā dakṣo devaṃ prajāpatiḥ //

bhītaśaṅkitavitrastaḥ savāṣpavadanekṣaṇaḥ /
yadi prasanno bhagavānyadi cāhaṃ bhavatpriyaḥ //

yadi vā'habhanugrāhyo yadi vā varado mama /
yaddagdhaṃ bhakṣitaṃ pītamaśittaṃ yacca nāśitam //

cūrṇīkṛtāpaviddhaṃ ca yajñasambhāramīdṛśam / dīrghakālena mahatā prayatnena susañcitam /
tanna mithyā bhavenmahyaṃ varametamahaṃ vṛṇe //

tathā'stvityāha bhagavānbhaganetraharo haraḥ /
dharmādhyakṣo virūpākṣastryakṣo devaḥ prajāpatiḥ //

jānubhyāmavanīṃ gatvā dakṣo labdhvā bhavādvaram /
nāmnāmaṣṭasahasreṇa stutavānvṛṣabhadhvajam //
yudhiṣṭhira uvāca /

yairnāmagheyaiḥ stutavāndakṣo devaṃ prajāpatiḥ /
vaktumarhasi me tāta śrotuṃ śraddhā mamānagha //
bhīṣma uvāca /

śrūyatāṃ devadevasya nāmānyadbhūtakarmaṇaḥ /
gūḍhavratasya guhyāni prakāśāni ca bhārata //

namaste devadeveśa devāribalasūdana /
devendrabalaviṣṭambha devadānavapūjita //

sahasrākṣa virūpākṣa tryakṣa yakṣādhipapriya /
sarvataḥ pāṇipādānta sarvatokṣiśiromukhaṃ //

sarvataḥ śrutimaṃlloke sarvamāvṛtya tiṣṭhasi /
śaṅkukarṇa mahākarṇa kumbhakarṇārṇavālaya //

gajendrakarṇa gokarṇa pāṇikarṇa namostu te /
śatodara śatāvarta śatajihna namostu te //

gāyanti tvā gāyatriṇo'rcantyarkamarkiṇaḥ /
brahmāṇaṃ tvā śatakratumūrdhvaṃ khamiva menire //

mūrtau hi te mahāmūrte samudrāmbarasannibha /
sarvā vai devatā hyasmingāvo goṣṭha ivāsate //

bhavaccharīre paśyāmi somamagniṃ jaleśvaram /
ādityamatha vai viṣṇuṃ brahmāṇaṃ ca bṛhaspatim //

bhagavānkāraṇaṃ kāryaṃ kriyā karaṇameva ca /
asataśca sataścaiva tathaiva prabhavāpyayau //

namo bhavāya śarvāya rudrāya varadāya ca /
paśūnāṃ pataye nityaṃ namostvandhakaghātine //

trijaṭāya triśīrṣāya triśūlavarapāṇine /
tryambakāya trinetrāya tripuraghnāya vai namaḥ //

namaścaṇḍāya kṛṇḍāya aṇḍāyāṇḍadharāya ca /
daṇḍine samakarṇāya daṇḍimuṇḍāya vai namaḥ //

namordhvadaṃṣṭrakeśāya śuklāyāvatatāya ca /
vilohitāya dhūmrāya nīlagnīvāya vai namaḥ //

namostvapratirūpāya virūpāya śivāya ca /
sūryāya sūryamālāya sūryadhvajapatākine //

namaḥ pramathanāthāya vṛṣaskandhāya dhanvine /
śatrundamāya daṇḍāya parṇacīrapaṭāya ca //

namo hiraṇyagarbhāya hiraṇyakavacāya ca /
hiraṇyakṛtacūḍāya hiraṇyapataye namaḥ //

namaḥ stutāya stutyāya stūyamānāya vai namaḥ /
sarvāya sarvabhakṣāya sarvabhūtāntarātmane //

namo hotre'tha mantrāya śukladhvajapatākine /
namo nābhāya nābhyāya namaḥ kaṭakaṭāya ca //

namostu kṛśanāsāya kṛśāṅgāya kṛśāya ca /
saṃhṛṣṭāya vihṛṣṭāya namaḥ kilakilāya ca //

namostu śayamānāya śayitāyotthitāya ca /
sthitāya dhāvamānāya muṇḍāya jaṭilāya ca //

namo nartanaśīlāya mukhavāditravādine /
nādyopahāralubdhāya gītavāditraśāline //

namo jyeṣṭhāya śreṣṭhāya valapramathanāya ca /
kālanāthāya kalyāya kṣayāyopakṣayāya ca //

bhīmadundubhihāsāya bhīmavratadharāya ca /
ugrāya ca namo nityaṃ namostu daśabāhave //

namaḥ kapālahastāya citibhasmapriyāya ca /
vibhīṣaṇāya bhīṣmāya bhīmavratadharāya ca //

namo vikṛtavakrāya khaṅgajihvāya daṃṣṭriṇe /
pakvāmamāṃsalubdhāya tumbīvīṇāpriyāya ca //

namo vṛṣāya vṛṣyāya govṛṣāya vṛṣāya ca /
kaṭankaṭāya daṇḍāya namaḥ pacapacāya ca //

namaḥ sarvavariṣṭhāya varāya varadāya ca /
varamālyagandhavastrāya varātivarade namaḥ //

namo raktaviraktāya bhāvanāyākṣamāline /
sambhinnāya vibhinnāya cchāyāyātapanāya ca //

aghoraghorarūpāya ghoraghoratarāya ca /
namaḥ śivāya śāntāya namaḥ śāntatamāya ca //

ekapādvahunetrāya ekaśīrṣṇe namostu te /
rudrāya kṣudralubdhāya saṃvibhāgapriyāya ca //

pañcālāya sitāṅgāya namaḥ śamaśamāya ca /
namaścaṇḍikaghaṇṭāya ghaṇṭāyāghaṇṭaghaṇṭine //

sahasrādhmātaghaṇṭāya ghaṇṭāmālāpriyāya ca /
prāṇaghaṇṭāya gandhāya namaḥ kalakalāya ca //

hūṃhūṃhūnkārapārāya hūṃhūnkārapriyāya ca /
namaḥ śamaśame nityaṃ girivṛkṣālayāyā ca //

garbhamāṃsasṛgālāya tārakāya tarāya ca /
namo yajñāya yajine hutāya prahutāya ca //

yajñavāhāya dāntāya tapyāyātapanāya ca /
namastaṭāya taṭyāya taṭānāṃ pataye namaḥ //

annadāyānnapataye namastvannabhuje tathā /
namaḥ sahasraśīrṣāya sahasracaraṇāya ca //

sahasrodyataśūlāya sahasranayanāya ca /
namo bālārkavarṇāya bālarūpadharāya ca //

bālānucaragoptāya bālakrīḍanakāya ca /
namovṛddhāya lubdhāya kṣubdhāya kṣobhaṇāya ca //

taraṅgāṅkitakeśāya muñjakeśāya vai namaḥ /
namaḥ ṣaṭ्karmatuṣṭāya trikarmaniratāya ca //

varṇāśramāṇāṃ vidhivatpṛthakkarmanivartine /
namo ghuṣyāya ghoṣāya namaḥ kalakalāya ca //

śvetapiṅgalanetrāya kṛṣṇaraktekṣaṇāya ca /
prāṇabhagnāya daṇḍāya sphoṭanāya kṛśāya ca //

dharmakāmārthamokṣāṇāṃ kathanīyakathāya ca /
sāṅkhyāya sāṅkhyamukhyāya sāṅkhyayogapravartine //

namo rathyavirathyāya catuṣpatharathāya ca /
kṛṣṇājinottarīyāya vyālayajñopavītine //

īśānavajrasanghātaharikeśa namostu te /
tryambakāmbikanāthāya vyaktāvyakta namostu te //

kāma kāmada kāmaghna tṛptātṛptavicāriṇe /
sarva sarvada sarvaghna sanndhyārāga namostu te //

mahābala mahābāho mahāsatva mahādyute / mahāmeghacalaprakhya mahākāla namostu te /
sthūlajīrṇāṅgajaṭile vatkalājinadhāriṇe //

dīptasūryāgnijaṭine vatkalājinavāsase /
rasahasrasūryapratima taponitya tamostu te //

unmādanuśatāvarta gaṅgātoyārdramūrdhaja /
candravarta yugāvarta meghāvarta namostu te //

tvamannamattā bhoktā ca annado'nnabhugeva ca /
annasraṣṭā ca paktā ca pakkabhukpavano'nalaḥ //

jarāyujāṇḍajāścaiva svedajāśca tathodbhijāḥ /
tvameva devadeveśa bhūtagrāmaścaturvidhaḥ //

carācarasya sraṣṭā tvaṃ pratihartā tathaiva ca /
tvāmāhurbrahmaviduṣo brahma brahmavidāṃvara //

manasaḥ paramā yoniḥ khaṃ vāyurjyotiṣāṃ nidhiḥ /
ṛksāmāni tathoṅkāramāhustvāṃ brahmavādinaḥ //

hāyihāyi huvāhāyi hāvuhāyi tathā'sakṛt /
gāyanti tvāṃ suraśreṣṭha sāmagā brahmavādinaḥ //

yajurmayo ṛṅbhayaśca tvamāhutimayastathā /
paṭhyase stutibhiścaiva vedopaniṣadāṃ gaṇaiḥ //

brāhmaṇāḥ kṣatriyā vaiśyāḥ śūdrā varṇāvarāśca ye /
tvameva meghasaṅghāśca vidyutstanitagarjitaḥ //

saṃvatsarastvāmutavo māso māsārdhameva ca /
yugaṃ nimeṣāḥ kāṣṭhāstvaṃ nakṣatrāṇi grahāḥ kalāḥ //

vṛkṣāṇāṃ kakudosi tvaṃ girīṇāṃ śikharāṇi ca /
vyāghro mṛgāṇāṃ patatāṃ tārkṣyo'nantaśca bhoginām //

kṣīrādo hyudadhīnāṃ ca yantrāṇāṃ dhanureva ca /
vajraḥ praharaṇānāṃ ca vratānāṃ satyameva ca //

tvameva dveṣa icchā ca rāgo mohaḥ kṣamākṣame /
vyavasāyo dhṛtirlobhaḥ kāmakrodhau jayājayau //

tvaṃ gadī tvaṃ śarī cāpī khaṭvāṅgī jharjharī tathā /
chettā bhettā prahartā tvaṃ netā mantā pitā mataḥ //

daśalakṣaṇasaṃyukto dharmo'rthaḥ kāma eva ca /
gaṅgā samudrāḥ saritaḥ palvalāni saṃrāsi ca //

latā vallyastṛṇauṣadhyaḥ paśavo mṛgapakṣiṇaḥ /
dravyakarmasamārambhaḥ kālaḥ puṣpaphalapradaḥ //

ādiścāntaśca devānāṃ gāyatryoṅkāra eva ca / harito rohito nīlaḥ kṛṣṇo raktastathā'ruṇaḥ /
kadruśca kapilaścaiva kapoto mecakastathā //

avarṇaśca suvarṇaśca varṇakāro ghanopamaḥ /
suvarṇanāmā ca tathā suvarṇapriya eva ca //

tvamindraśca yamaścaiva varuṇo dhanado'nalaḥ /
upaplavaścitrabhānuḥ svarbhānurbhānureva ca //

hotraṃ hotā ca homyaṃ ca hutaṃ caiva tathā prabhuḥ /
trisauparṇaṃ tathā brahma yajuṣāṃ śatarudriyam //

pavitraṃ ca pavitrāṇāṃ maṅgalānāṃ ca maṅgalam /
giriko hiṇḍuko vṛkṣo jīvaḥ pudgala eva ca //

prāṇaḥ sattvaṃ rajaścaiva tamaścāpramadastathā /
prāṇopānaḥ samānaśca udāno vyāna eva ca //

unmeṣaśca nimeṣaśca kṣutaṃ jṛmbhitameva ca /
lohitāntargatā dṛṣṭirmahāvakro mahodaraḥ //

sūcīromā hariśmaśrurūrdhvakeśaścalācalaḥ /
gītavāditratattvajño gītavādanakapriyaḥ //

matsyo jalacaro jālyo'kalaḥ kelikalaḥ kaliḥ /
akālaścātikālaśca duṣkālaḥ kāla eva ca //

mṛtyuḥ kṣuraśca kṛtyaśca pakṣo'pakṣakṣayankaraḥ /
meghakālo mahādaṃṣṭraḥ saṃvartakabalāhakaḥ //

ghaṇṭo'ghaṇṭo ghaṭī ghaṇṭī carucelī milīmilī /
brahmakāyikamagnīnāṃ daṇḍī muṇḍastridaṇḍadhṛk //

caturyugaścaturvedaścāturhotrapravartakaḥ /
cāturāśramyavetā ca cāturvarṇyakaraśca yaḥ //

sadā cākṣapriyo dhūrto gaṇādhyakṣo gaṇādhipaḥ /
raktamālyāmbaragharo giriśo girikapriyaḥ //

śilpikaḥ śilpināṃśreṣṭhaḥ sarvaśilpapravartakaḥ /
bhaganetrāṅkuśaścaṇḍaḥ pūṣṇo dantavināśanaḥ //

svāhāsvadhāvaṣaṭ्kāro namaskāro namo namaḥ /
gūḍhavrato guhyatapāstārakastārakāmayaḥ //

dhātā vidhātā sandhātā vidhātā dhāraṇo dharaḥ /
brahmā tapaśca satyaṃ ca brahmacaryamathārjavam //

bhūtātmā bhūtakṛdbhūto bhūtabhavyavodbhavaḥ /
bhūrbhuvaḥ svaritaścaiva dhruvo dānto maheśvaraḥ //

dīkṣito'dīkṣitaḥ kṣānto durdānto'dāntanāśanaḥ /
candrāvartayugāvartaḥ saṃvartaḥ sampravartakaḥ //

kāmo vinduraṇuḥ sthūlaḥ karṇikārasrajapriyaḥ /
nandīmukho bhīmamukhaḥ sumukho durmukho'mukhaḥ //

caturmukho bahumukho raṇeṣvagnimukhastathā /
hiraṇyagarbhaḥ śakunirmahoragapatirvirāṭ //

adharmahā mahāpārśvaścaṇḍadhāro gaṇādhipaḥ /
gonardo gopratāraśca govṛṣeśvaravāhanaḥ //

trailokyagoptā govindo gomārgo'mārga eva ca /
śreṣṭhaḥ sthiraśca sthāṇuśca niṣkampaḥ kampa eva ca //

durvāraṇo durviṣaho duḥsaho duratikramaḥ /
durdharpo duṣprakampaśca durviṣo durjayo jayaḥ //

śaśaḥ śaśāṅkaḥ śamanaḥ śītoṣṇakṣujjarādhikṛt /
ādhayo vyādhayaścaiva vyādhihā vyādhireva ca //

mama yajñamṛgavyādho vyādhīnāmāgamo gamaḥ /
śikhaṇḍī puṇḍarīkākṣaḥ puṇḍarīkavanālayaḥ //

daṇḍadhārastryambakaśca ugradaṇḍo'ṇḍanāśanaḥ /
viṣāgnipāḥ suraśreṣṭhaḥ somapāstvaṃ marutpatiḥ //

amṛtapāstvaṃ jagannātha devadeva gaṇeśvaraḥ / viṣāgnipā mṛtyupāśca kṣīrapāḥ somapāstathā /
madhuścyutānāmagrapāstvaṃ tvameva tuṣitādyapāḥ //

hiraṇyaretāḥ puruṣastvameva tvaṃ strī pumāṃstvaṃ ca napuṃsakaṃ ca /
bālo yuvā sthaviro jīrṇadaṃṣṭrastvaṃ nāgendra śakrastvaṃ viśvakṛdviśvakartā //

viśvakṛdviśvakṛtāṃ vareṇyastvaṃ viśvabāho viśvarūpastejasvī viśvatomukhaḥ /
candrādityau cakṣuṣī te hṛdayaṃ ca pitāmahaḥ /

mahodadhiḥ sarasvatī vāgbalamanalo nilaḥ ahorātraṃ nimeṣonmeṣakarmā //

na brahmā na ca govindaḥ paurāṇā ṛṣayo na te /
māhātmyaṃ vedituṃ śaktā yāthātathyena te śiva //

yā mūrtayaḥ susūkṣmāste na mahyaṃ yānti darśanam /
trāhi māṃ satataṃ rakṣa pitā putramivaurasam //

rakṣa māṃ rakṣaṇīyo'haṃ tavānagha namostu te /
bhaktānukampī bhagavānbhaktaścāhaṃ sadā tvayi //

yaḥ sahasrāṇyanekāpi puṃsāmāvṛtya durdṛśaḥ /
tiṣṭhatyekaḥ samudrānte sa me goptā'stu nityaśaḥ //

yaṃ vinidrā jitaśvāsāḥ satvasthāḥ saṃyatendriyāḥ /
jyotiḥ paśyanti yuñjānāstasmai yogātmane namaḥ //

jaṭile daṇḍine nityaṃ lambodaraśarīriṇe /
kamaṇḍaluniṣaṅgāya tasmai brahmātmane namaḥ //

yasya keśeṣu jīmūtā nadyaḥ sarvāṅgasandhiṣu /
kukṣau samudrāścatvārastasmai toyātmane namaḥ //

sambhakṣya sarvabhūtāni yugānte paryupasthite /
yaḥ śete jalamadhyasthastaṃ prapadye'mbuśāyinam //

praviśya vadanaṃ rāhoryaḥ somaṃ pibate niśi /
grasatyarkaṃ ca svarbhānurbhūtvā māṃ so'bhirakṣatu //

ye cānupatitā garbhā yathā bhāgānupāsate /
namastebhyaḥ svadhā svāhā prāpnuvantu mudaṃ tu te //

ye'ṅguṣṭhamātrāḥ puruṣā dehasthāḥ sarvadehinām /
rakṣantu te hi māṃ nityaṃ nityaṃ cāpyāyayantu mām //

yena rodanti dehasthā dehino rodayanti ca /
harṣayanti na hṛṣyanti namastebhyo'stu nityaśaḥ //

ye nadīṣu samudreṣu parvateṣu guhāsu ca /
vṛkṣamūleṣu goṣṭheṣu kāntāre gahaneṣu ca //

catuṣpatheṣu rathyāsu catvareṣu taṭeṣu ca /
hastyaśvarathaśālāsu jīrṇodyānālayeṣu ca //

yeṣu pañcasu bhūteṣu diśāsu vidiśāsu ca /
candrārkayormadhyagatā ye ca candrārkaraśmiṣu //

rasātalagatā ye ca ye ca tasmai paraṃ gatāḥ /
namastebhyo namastebhyo namastebhyostu nityaśaḥ //

yeṣāṃ na vidyate saṅkhyā pramāṇaṃ rupameva ca /
asaṃkhyeyaguṇā rudrā namastebhyostu nityaśaḥ //

sarvabhūtakaro yasmātsarvabhūtapatirharaḥ /
sarvabhūtāntarātmā ca tena tvaṃ na nimantritaḥ //

tvameva hījyase yasmādyajñairvividhadakṣiṇaiḥ /
tvameva kartā sarvasya tena tvaṃ na nimantritaḥ //

athavā māyayā deva sūkṣmayā tava mohitaḥ /
etasmātkāraṇādvā'pi tena tvaṃ na nimantritaḥ //

prasīda mama bhadraṃ te bhava bhāvagatasya me /
tvayi me hṛdayaṃ deva tvayi buddhirmanastvayi //

stutvaivaṃ sa mahādevaṃ virarāma prajāpatiḥ /
bhagavānapi suprītaḥ punardakṣamabhāṣata //

parituṣṭo'smi te dakṣa stavenānena suvrata /
bahunātra kimuktena matsamīpe bhaviṣyasi //

aśvamedhasahasrasya vājapeyaśatasya ca /
prajāpate matprasādātphalabhāgī bhaviṣyasi //

athainamabravīdvākyaṃ lokasyādhipatirbhavaḥ /
āśvāsanakaraṃ vākyaṃ vākyavidvākyasammitam //

dakṣa dakṣa na kartavyo manyurvighnamimaṃ prati /
ahaṃ yajñaharastubhyaṃ dṛṣṭametatpurātanam //

bhūyaśca te varaṃ dadmi taṃ tvaṃ gṛhṇīṣva suvrata /
prasannavadano bhūtvā tadihaikamanāḥ śṛṇu //

vedātṣaḍaṅgāduddhṛtya sāṅkhyayogācca yuktitaḥ /
tapaḥ sutaptaṃ vipulaṃ duścaraṃ devadānavaiḥ //

apūrvaṃ sarvatobhadraṃ sarvatomukhamavyayam /
abdairdaśāhasaṃyuktaṃ gūḍhamaprājñaninditam //

varṇāśramakṛtairdharmairviparītaṃ kvacitsamam /
gatāntairadhyavasitamatyāśramamidaṃ vratam //

mayā pāśupataṃ dakṣa śubhamutpāditaṃ purā /
tasya cīrṇasya tatsamyakphalaṃ bhavati puṣkalam //

taccāstu te mahābhāga tyajyatāṃ mānaso jvaraḥ / evamuktvā mahādevaḥ sapatnīkaḥ sahānugaḥ /
adarśanamanuprāpto dakṣasyāmitavikramaḥ //

dakṣaproktaṃ stavamimaṃ kīrtayedyaḥ śṛṇoti vā /
nāśubhaṃ prāpnuyātkiñciddīrghamāyuravāpnuyāt //

yathā sarveṣu deveṣu variṣṭho bhagavāñchivaḥ /
tathā stavo variṣṭho'yaṃ stavānāṃ brahmasammitaḥ //

yaśorājyasukhaiśvaryakāmārthadhanakāṅkṣibhiḥ /
śrotavyo bhaktimāsthāya vidyākāmaiśca yatnataḥ //

vyādhito duḥkhito dīnaścoragrasto bhayārditaḥ /
rājakāryābhiyukto vā mucyate mahato bhayāt //

anenaiva tu dehena gaṇānāṃ samatāṃ vrajet /
tejasā yaśasā caiva yukto bhavati nirmalaḥ //

na rākṣasāḥ piśācā vā na bhūtā na vināyakāḥ /
vighnaṃ kuryurgṛhe tasya yatrāyaṃ paṭhyate stavaḥ //

śṛṇuyāccaiva yā nārī tadbhaktā brahmacāriṇī /
pitṛpakṣe mātṛpakṣe pūjyā bhavati devavat //

śṛṇuyādyaḥ stavaṃ kṛtsnaṃ kīrtayedvā samāhitaḥ /
tasya sarvāṇi karmāṇi siddhiṃ gacchantyabhīkṣṇaśaḥ //

manasā cintitaṃ yacca yacca vācā'nukīrtitam /
sarvaṃ sampadyate tasya stavasyāsyānukīrtanām //

devasya ca guhasyāpi devyā nandīśvarasya ca /
baliṃ suvihitaṃ kṛtvā damena niyamena ca //

tatastu yukto gṛhṇīyānnāmānyāśu yathākramam /
īpsitām̐llabhate sorthānbhogānkāmāṃśca mānavaḥ //

mṛtaśca svargamāpnoti tiryakṣu ca na jāyate /
ityāha bhagavānvyāsaḥ parāśarasutaḥ prabhuḥ //