Mahabharata · Chapter 12.287

aho dharmiṣṭhatā tasya vṛtrasyāmitatejasaḥ /
yasya vijñānamatulaṃ viṣṇorbhaktiśca tādṛśī //

durvijñeyamidaṃ tasya viṣṇoramitatejasaḥ /
kathaṃ vā rājaśārdūla padaṃ tu jñātavānasau //

bhavatā kathitaṃ hyetacchraddadhe cāhamacyuta /
bhūyaśca me samutpannā buddhiravyaktadarśanā //

kathaṃ vinihato vṛtraḥ śakreṇa bharatarṣabha /
dhārmiko viṣṇubhaktaśca tattvajñaśca tadanvaye //

etanme saṃśayaṃ brūhi pṛcchate bharatarṣabha /
vṛtraḥ sa rājaśārdūla yathā śakreṇa nirjitaḥ //

yathā caivābhavadyuddhaṃ taccācakṣva pitāmaha /
vistareṇa mahābāho paraṃ kautūhalaṃ hi me //
bhīṣma uvāca /

rathenendraḥ prayāto vai sārdhaṃ suragaṇaiḥ purā /
dadarśāthāgrato vṛtraṃ dhiṣṭhitaṃ parvatopamam //

yojanānāṃ śatānyūrdhvaṃ pañconchritamarindam /
śatāni vistareṇātha trīṇi cābhyadhikāni vai //

tatprekṣya tādṛśaṃ rūpaṃ trailokyenāpi durjayam /
vṛtrasya devāḥ santrastā na śāntimupalebhire //

śakrasya tu tadā rājannūrustambho vyajāyata /
bhayādvṛtrasya sahasā dṛṣṭvā tadrūpamuttamam //

tato nādaḥ samabhavadvāditrāṇāṃ ca niḥsvanaḥ /
devāsurāṇāṃ sarveṣāṃ tasminyuddhe hyupasthite //

atha vṛtrasya kauravya dṛṣṭvā śakramavasthitam /
na sambhramo na bhīḥ kācidāsthā vā samajāyata //

tataḥ samabhavadyuddhaṃ trailokyasya bhayankaram /
śakrasya ca surendrasya vṛtrasya ca mahātmanaḥ //

asibhiḥ paṭṭasaiḥ śūlaiḥ śaktitomaramrudgaraiḥ /
śilābhirvividhābhiśca kārmukaiśca mahāsvanaiḥ //

astraiśca vivirdhaurdivyaiḥ pāvakolkābhireva ca /
devāsuraistataḥ sainyaiḥ sarvamāsītsamākulam //

pitāmahapurogāśca sarve devagaṇāstadā /
ṛṣayaśca mahābhāgāstadyuddhaṃ draṣṭumāgaman //

vimānāgryairmahārāja siddhāśca bharatarṣabha /
gandharvāśca vimānāgrairapsarobhiḥ samāgaman //

tato'ntarikṣamāvṛtya vṛtro dharmabhūtāṃ varaḥ /
aśmavarṣeṇa devendraṃ sarvataḥ samavākirat //

tato devagaṇāḥ kruddhāḥ sarvataḥ śaravṛṣṭibhiḥ /
aśmavarṣamapohanta vṛtrapreritamāhave //

vṛtrastu kuruśārdūla mahāmāyo mahābalaḥ /
mohayāmāsa devendraṃ māyāyuddhena sarvaśaḥ //

tasya vṛtrārditasyātha moha āsīcchatakratoḥ /
rathantareṇa taṃ tatra vasiṣṭhaḥ samabodhayat //
vasiṣṭha uvāca /

devaśreṣṭho'sti devendra daityāsuranibarhaṇa /
trailokyabalasaṃyuktaḥ kasmācchakra viṣīdasi //

eṣa brahmā ca viṣṇuśca śivaścaiva jagatpatiḥ /
somaśca bhagavāndevaḥ sarve ca paramarṣayaḥ //

samudvignaṃ samīkṣya tvāṃ svastītyūcurjayāya te / mā kārṣīḥ kaśmalaṃ śakra kaścidevetaro yathā /
āryāṃ yuddhe matiṃ kṛtvā jahi śatrūnsurādhipa //

eṣa lokagurustryakṣaḥ sarvalokanamaskṛtaḥ /
nirīkṣate tvāṃ bhagavāṃstyaja mohaṃ surādhipa //

ete brahmarṣayaścaiva bṛhaspatipurogamāḥ /
stavena śakra divyena stuvanti tvāṃ jayāya vai //
bhīṣma uvāca /

evaṃ sambodhyamānasya vasiṣṭhena mahātmanā /
atīva vāsavasyāsīdbalamuttamatejasaḥ //

tato buddhimupāgamya bhagavānpākaśāsanaḥ /
yogena mahatā yuktastāṃ māyāṃ vyapakarṣata //

tato'ṅgiraḥ sutaḥ śrīmāṃste caiva sumaharṣayaḥ /
dṛṣṭvā vṛtrasya vikrāntumupāgamya maheśvaram //

ūcurvṛtravināśārthaṃ lokānāṃ hitakāmyayā /
tato bhagavatastejo jvaro bhūtvā jagatpateḥ //

samāviśattadā raudraṃ vṛtraṃ lokapatiṃ tadā /
viṣṇuśca bhagavāndevaḥ sarvalokābhipūjitaḥ //

aindraṃ samāviśudvajraṃ lokasaṃrakṣaṇe rataḥ / tato bṛhaspatirdhīmānupāgamya śatakratum /
vasiṣṭhaśca mahātejāḥ sarve ca paramarṣayaḥ //

te samāsādya varadaṃ vāsavaṃ lokapūjitam /
ūcurekāgramanaso jahi vṛtramiti prabho //
maheśvara uvāca /

eṣa vṛtro mahāñśakre balena mahatā vṛtaḥ /
viśvātmā sarvagaścaiva bahumāyaśca viśrutaḥ //

tadenamasuraśreṣṭhaṃ trailokyenāpi durjayam /
jahi tvaṃ yogamāsthāya māvamaṃsthāḥ sureśvara //

anena hi tapastaptaṃ balārthamamarādhipa /
ṣaṣṭiṃ varṣasahasrāṇi brahmā cāsmai varaṃ dadau //

mahattvaṃ yogināṃ caiva mahāmāyatvameva ca /
mahābalatvaṃ ca tathā tejaścāgryaṃ sureśvara //

etattvāṃ māmakaṃ tejaḥ samāviśati vāsava /
vṛtramevaṃ tvavadhyaṃ taṃ vajreṇa jahi dānavam //
śakra uvāca /

bhagavaṃstvatprasādena ditijaṃ sudurāsadam /
vajreṇa nihaniṣyāmi paśyataste surarṣabha //
bhīṣma uvāca /

āviśyamāne daitye tu jvareṇātha mahāsure /
devatānāmṛṣīṇāṃ ca harṣānnādo mahānabhūt //

tato dundubhayaścaiva śaṅkhyāśca sumahāsvanāḥ /
murajā ḍiṇḍibhāścaiva prāvādyanta sahasraśaḥ //

asurāṇāṃ tu sarveṣāṃ smṛtilopo mahānabhūt /
māyānāśaśca balavānkṣaṇena samapadyata //

tamāviṣṭamatho jñātvā ṛṣayo devatāstathā /
stuvantaḥ śaknamīśānaṃ tathā prācodayannapi //

rathasthasya hi śakrasya yuddhakāle mahātmanaḥ /
ṛṣibhiḥ stūyamānasya rūpamāsīnsudurdṛśam //