Mahabharata · Chapter 12.284

kiṃśīlaḥ kiṃsamācāraḥ kiṃvidyaḥ kimparāyaṇaḥ /
prāpnoti brahmaṇaḥ sthānaṃ yatparaṃ prakṛterdhruvam //
bhīṣma uvāca /

mokṣadharmeṣu nirato laghvāhāro jitendriyaḥ /
prāpnoti paramaṃ sthānaṃ yatparaṃ prakṛterdhruvam //

atrāpyudāharantīmamitihāsaṃ purātanam /
hārītena purā gītaṃ taṃ nibodha yudhiṣṭhira //

svagṛhādabhiniḥsṛtya lābhe'lābhe samo muniḥ /
samupoḍheṣu kāmeṣu nirapekṣaḥ parivrajet //

na cakṣuṣā na manasā na vācā dūṣayetparam /
na pratyakṣaṃ parokṣaṃ vā dūṣaṇaṃ vyāharetkvacit //

na hiṃsyātsarvabhūtāni maitrāyaṇagatiścaret /
nedaṃ jīvitamāsādya vairaṃ kurvīta kenacit //

ativādāṃstitikṣeta nābhimanyeta kañcana /
krodhyamānaḥ priyaṃ brūyādākruṣṭaḥ kuśalaṃ vadet //

pradakṣiṇaṃ ca savyaṃ ca grāmamadhye ca nācaret /
bhaikṣacaryāmanāpanno na gacchetpūrvaketanam //

avakīrṇaḥ suguptaśca na vācā'pyapriyaṃ caret /
mṛduḥ syādapratīkāro visrabdhaḥ syādaroṣaṇaḥ //

vidhūme nyastamusale vyaṅgāre bhuktavajjane /
atīte pātrasañcāre bhikṣāṃ lipseta vai muniḥ //

prāṇayātrikamātraḥ syānmātrālābheṣvanādṛtaḥ /
alābhe na vihanyeta lābhaścainaṃ na harṣayet //

lābhaṃ sādhāraṇāṃ necchenna bhuñjītābhipūjitaḥ /
abhipūjitalābhaṃ hi jugupsetaiva tādṛśaḥ //

na cānnadoṣānnindeta na guṇānabhipūjayet /
śayyāsane vivikte ca nityamevābhipūjayet //

śūnyāgāraṃ vṛkṣamūlamaraṇyamathavā guhām /
ajñātacaryāṃ gatvā'nyāṃ tato'nyatraiva saṃviśet //

anurodhavirodhābhyāṃ samaḥ syādacalo dhruvaḥ /
sukṛtaṃ duṣkṛtaṃ cobhe nānurudhyeta karmaṇi //

nityatṛptaḥ susantṛṣṭaḥ prasannavadanendriyaḥ /
vibhīrjapyaparo maunī vairāgyaṃ samupāśritaḥ //

abhyastaṃ bhautikaṃ paśyanbhūtānāmāgatiṃ gatim / vismitaḥ sarvadarśī ca pakvāpakvena vartayan /
ātmārāmaḥ praśāntātmā laghvāhāro jitendriyaḥ //

vāco vegaṃ manasaḥ krodhavegaṃ hiṃsāvegamudaropasthavegam /
etānvegānvinayedvai tapasvī nindā cāsya hṛdayaṃ nopahanyāt //

madhyastha eva tiṣṭheta praśaṃsānindayoḥ samaḥ /
etatpavitraṃ paramaṃ parivrājaka āśrayet //

mahātmā sarvato dāntaḥ sarvatraivānapāśritaḥ /
apūrvacārakaḥ saumyo hyaniketaḥ samāhitaḥ //

vānaprasthagṛhasthābhyāṃ na saṃsṛjyeta karhicit /
ajñātalipsaṃ lipseta na cainaṃ harṣa āviśet //

vijānatāṃ mokṣa eṣa śramaḥ syādavijānatām /
mokṣayānamidaṃ kṛtsnaṃ viduṣāṃ hārito'bravīt //

abhayaṃ sarvabhūtebhyo dattvā yaḥ pravrajedgṛhāt /
lokāstejomayāstasya tathā'nantyāya kalpate //